“ဒီဒေသအတိုင်းအတာနဲ့ တာချီလိတ်မှာ အဓိကကတော့ ဆိုင်ကယ်ဦးထုပ် မဆောင်းတာ တွေ့ရတယ်။ မှုခင်းဖြစ်စဉ် အများစုမှာလည်း ဆိုင်ကယ်ဦးထုပ်မဆောင်းလို့ သေဆုံးမှုများနေတာပါ။
မော်တော်ယာဉ်မောင်းသူတွေမှာတော့ သတ်မှတ် လိုင်စင်နဲ့မကိုက်ညီတာ အများဆုံး တွေ့ရတယ်”ဟု အမှတ်(၁၁၉) ယာဉ်ထိန်းတပ်ဖွဲ့စု(တာချီလိတ်ခရိုင်) တပ်ဖွဲ့စုမှူး ဒုရဲမှူး ဇော်မင်းသိန်းက တာချီလိတ်သတင်းအေဂျင်စီသို့ အောက်တိုဘာလ (၂၀)ရက်နေ့တွင် ပြောသည်။

ယာဉ်စည်းကမ်း၊ လမ်းစည်းကမ်း လိုက်နာစေရေးအတွက် အမှတ် (၁၁၉) ယာဉ်ထိန်းရဲတပ်ဖွဲ့စု (တာချီလိတ်)မှ အသိပေးဟောပြောမှုများကို အပတ်စဉ် တနင်္ဂနွေနေ့တိုင်း ရွေ့လျားပညာပေးစနစ်ဖြင့် လုပ်ဆောင်နေရာ ၂၀၁၉ ခုနှစ်၊ အောက်တိုဘာလ (၂၀)ရက်နေ့က တာချီလိတ်မြို့တွင်း နေရာနှစ်နေရာခွဲ၍ ဆောင်ရွက်နေသည်ကို တွေ့ရသည်။

ယာဉ်ထိန်းရဲတပ်ဖွဲ့ဝင်များက ဗိုလ်ချုပ်အောင်ဆန်းလမ်းမကြီးတလျှောက် မြန်မာ - ထိုင်းချစ်ကြည်ရေးတံတား (၁)အနီးရှိ အဝိုင်းပတ်နှင့် ရှမ်းရိုးမကွင်းရှေ့တို့တွင် ယာဉ်စည်းကမ်း၊ လမ်းစည်းကမ်းဆိုင်ရာ လိုက်နာစရာများကို အသိပေးရှင်းလင်းခြင်းများ ဆောင်ရွက်နေခြင်းဖြစ်သည်။

Tachileik News Agency
သတင်း၊ဓါတ်ပုံ #ဟန်စိုးထိုက်