ရှမ်းပြည်နယ် (အရှေ့ပိုင်း) တာချီလိတ်နှင့် ကျိုင်းတုံမြို့များသို့ ဓမ္မခရီး ကြွရောက်သည့် မဲခေါင်မြစ်ဝှမ်း (၅)နိုင်ငံမှ သံဃာတော်များသည် ၂၀၁၉ ခုနှစ်၊ အောက်တိုဘာလ (၁၈)ရက်နေ့ နေ့လယ်ပိုင်းတွင် တာချီလိတ်မြို့ရှိ မြန်မာ - ထိုင်းချစ်ကြည်ရေးတံတားမှတစ်ဆင့် ထိုင်းနိုင်ငံဘက်သို့ ပြန်လည်ကြွရောက်သွားပြီ ဖြစ်သည်။

မဲခေါင်မြစ်ဝှမ်း (၅)နိုင်ငံမှ သံဃာတော်များသည် ရှမ်းပြည်နယ်အရှေ့ပိုင်းဒေသသို့ အောက်တိုဘာလ (၁၆)ရက်နေ့က ကြွရောက်လာခြင်းဖြစ်သည်။

ထိုင်း၊ လာအို၊ ဗီယက်နမ်၊ ကမ္ဘောဒီးယားနိုင်ငံများသို့ ဆက်လက်၍ ဓမ္မခရီးကြွရောက်ကြမည့် သံဃာတော်များကို တာချီလိတ်မြို့ရှိ မြန်မာ - ထိုင်းချစ်ကြည်ရေးတံတားအမှတ်(၁)တွင်  အစိုးရအဖွဲ့ဝင် ဝန်ကြီးများ၊ ခရိုင်၊မြို့နယ်အဆင့် ဌာနဆိုင်ရာများ၊ ဓမ္မခရီးစဉ်၏အလှူရှင်ဖြစ်သည့် မြန်မာနိုင်ငံလုံးဆိုင်ရာ ထေရဝါဒ ဗုဒ္ဓဘာသာအဖွဲ့ချုပ်နှင့် နယ်စပ်တောင်တန်းဒေသသာသနာနုဂ္ဂဟအသင်း(ဗဟို)ဥက္ကဌ ဝဏ္ဏကျော်ထင် ဒေါက်တာခင်ရွှေ၊ မြန်မာနိုင်ငံလုံးဆိုင်ရာ ထေရဝါဒ ဗုဒ္ဓဘာသာအဖွဲ့ချုပ်နှင့် နယ်စပ်တောင်တန်းဒေသသာသနာနုဂ္ဂဟအသင်း(ဗဟို)မှ အဖွဲ့ဝင်များက ပို့ဆောင်နှုတ်ဆက်ကြသည်။

ထိုင်း၊ မြန်မာ၊ ဗီယက်နမ်၊ ကမ္ဘောဒီးယားနှင့် လာအိုနိုင်ငံများမှ သံဃာတော်များ၏ ဒုတိယအကြိမ် ဓမ္မခရီးကို အောက်တိုဘာလ (၁၄) ရက်နေ့မှ အောက်တိုဘာလ (၃၁) ရက်နေ့အထိ ကြွချီကြမည်ဖြစ်ပြီး ဓမ္မခရီးစဉ်ကို့် ထိုင်းနိုင်ငံ ချင်းဆဲန်မြို့ရှိ Wat Phrathat Phangao ကျောင်းတိုက်တွင်  အောက်တိုဘာလ (၁၅) ရက်နေ့က ဖွင့်လှစ်ခဲ့ခြင်းဖြစ်သည်။

အဆိုပါ ဓမ္မခရီးစဉ်ကို မြန်မာနိုင်ငံလုံးဆိုင်ရာ ထေရဝါဒဗုဒ္ဓဘာသာအဖွဲ့ချုပ်နှင့် နယ်စပ်တောင်တန်းဒေသ သာသနာနုဂ္ဂဟအသင်းနှင့် ထိုင်းနိုင်ငံ ဗောဓိဂယာဝိဇ္ဇာလျ ၉၈၀ အဖွဲ့ချုပ်တို့ ပူးပေါင်း၍ စီစဉ်ခြင်းဖြစ်သည်။

Tachileik News Agency
ဓါတ်ပုံ -ဟန်စိုးထိုက်၊ ကျော်ဇင်ဟိန်း