~~~~~~~~⊰❂ Unicode Version ❂⊱~~~~~~~~

ကျိုင်းတုံမြို့တွင် ယာဉ်အန္တရာယ်၊ လမ်းအန္တရာယ်ကင်းရှင်းရေး တနင်္ဂနွေနေ့တိုင်း ရွေ့လျားပညာပေး
**********
ရှမ်းပြည်နယ်အရှေ့ပိုင်း၊ ကျိုင်းတုံမြို့တွင် ယာဉ်အန္တရာယ်၊ လမ်းအန္တရာယ်ကင်းရှင်းရေးနှင့် ယာဉ်မတော်တဆမှုများ လျော့နည်းကျဆင်းရေးအတွက် ပူးပေါင်းအဖွဲ့ဖြင့် ရွေ့လျားဟောပြောခြင်းကို ၂၀၁၉ ခုနှစ်၊ ဇွန်လ (၂၃)ရက်နေ့က ဆောင်ရွက်သည်။

ကျိုင်းတုံမြို့နယ် ယာဉ်စည်းကမ်း လမ်းစည်းကမ်း ကော်မတီ၊ မြို့နယ်ရဲတပ်ဖွဲ့၊  မြို့နယ်ပညာရေးမှူး၊ စည်ပင်သာယာရေးဌာန၊ ကညန၊ ကညန(ကလ)၊ မထသ၊ ဥပဒေစသည့် သက်ဆိုင်ရာဌာနများပါဝင်သည့် ပူးပေါင်းအဖွဲ့က အပတ်စဉ် တနင်္ဂနွေနေ့တိုင်း ယာဉ်စည်းကမ်းလမ်းစည်းကမ်းအသိပညာပေးခြင်းကို ဆောင်ရွက်ပေးနေခြင်းဖြစ်ကြောင်း သိရသည်။

ယာဉ်၊လမ်းစည်းကမ်းအသိပညာပေးခြင်းကို အဝေးပြေးကားဝင်းတွင် တစ်လလျှင်နှစ်ကြိမ်၊ စာသင်ကျောင်းများနှင့် OSS တွင် သောကြာနေ့တိုင်းနှင့် အဖွဲ့ပေါင်းစုံဖြင့် မိုဘိုင်းပညာပေးခြင်းကို တနင်္ဂနွေနေ့တိုင်း လုပ်ဆောင်နေခြင်းဖြစ်ကြောင်း အမှတ်(၁၁၈) ယာဉ်ထိန်းရဲတပ်ဖွဲ့စု(ကျိုင်းတုံ)မှ တပ်ဖွဲ့စုမှူး ဒုရဲမှူးကျော်ဇောအောင်က တာချီလိတ်သတင်းအေဂျင်စီသို့ ပြောသည်။

ယာဉ်အန္တရာယ်၊ လမ်းအန္တရာယ်ကင်းရှင်းရေးအတွက် ပြည်သူလူထုအား ယာဉ်စည်းကမ်း၊ လမ်းစည်းကမ်းအသိပညာပေးခြင်းအပြင် အဝေးပြေးယာဉ်များတွင် ယာဉ်မတော်တဆမှုများ ကြိုတင်ကာကွယ်ရေး၊ ခရီးသည်တင်ယာဉ်များတွင် အရေးပေါ် ထွက်ပေါက်၊ မီးသတ်ဆေးဘူးနှင့် မှန်ခွဲရန်တူ၊ပုဆိန်များ အသုံးပြုစေရေး၊ သတ်မှတ်လမ်းညွှန်အမှတ်အသားများနှင့် အချက်ပြများသိရှိရန် အသိပညာပေးလုပ်ဆောင်ပေးနေခြင်းဖြစ်ကြောင်း သိရသည်။

Tachileik News Agency
ဓါတ်ပုံ -KZA