~~~~~~~~⊰❂ Unicode Version ❂⊱~~~~~~~~

“ကျိုင်းတုံမြို့ပေါ်က စာသင်ကျောင်းတွေမှာရှိတဲ့ မုန့်ဈေးသည်အားလုံးကို အထက(၂)ကျောင်းမှာခေါ်ပြီး ကြိုတင် သိရှိအောင် တစ်ပတ်လောက်က အသိပညာပေးထားပြီးပါပြီ။ အဲဒီတုန်းက ကျောင်းကျန်းမာရေးအဖွဲ့တွေကိုပါ ခေါ်ပါတယ်။ စာသင်ချိန်တွေနဲ့ဆိုတော့ ကျောင်းကျန်းမာရေးအဖွဲ့တွေ မပါဖြစ်တော့ပါဘူး။ အခုလည်း ကျောင်းကျန်းမာရေးအဖွဲ့တွေက ဘယ်လိုစစ်ဆေးရမလဲမသိလို့ အကူအညီတောင်းခံလာကြလို့ ခုလိုကျောင်းတွေဆင်းပြီး ကျောင်းမုန့် ဆိုင်တွေမှာလက်ရှိရောင်းနေတဲ့ စားသောက်ကုန်နဲ့ မုန့်တွေကို လက်တွေ့ နမူယူပြီး မုန့်ဆိုင်တွေကော ကျောင်းကျန်းမာရေးအဖွဲ့တွေရော အသိပညာပေးတာတွေ ထပ်လုပ်ပေးနေတာပါ”ဟု စားသုံးသူရေးရာဦးစီးဌာနမှ ကျိုင်းတုံခရိုင်ဦးစီးမှူး ဦးသန်းစိုးက တာချီလိတ်သတင်းအေဂျင်စီသို့ ပြောသည်။

ထုတ်ကုန်လုံခြုံစိတ်ချမှုရှိစေရေးနှင့် စားသုံးသူ အကာအကွယ်ပေးရေးအတွက် ကျောင်းကျန်းမာရေးအဖွဲ့များနှင့် ကျောင်းမုန့်ဈေးဆိုင်ရှင်များအား ၂၀၁၉ ခုနှစ်၊ ဇူလိုင်လ (၁၂)ရက်နေ့တွင် အထက(၁)၌ အသိပညာပေးဆောင်ရွက်ကြောင်း သိရသည်။

 ယင်းကဲ့သို့ အသိပညာပေးရှင်းလင်းခြင်းကို အခြေခံပညာကျောင်းများတွင် ဆောင်ရွက်ပြီးပါက ကျောင်းကျန်းမာရေးအဖွဲ့များက ကျောင်းမုန့်ဈေးဆိုင်များအား စစ်ဆေးမှုများ ဆက်လက်ဆောင်ရွက်သွားမည်ဖြစ်ကြောင်း သိရသည်။

Tachileik News Agency
ဓာတ်ပုံ - TS