မိုင်းယန်းမြို့မှ ပြည်သူများ တာချီလိတ်မြို့ကို အလည်မသွားရန် နှင့် မဖြစ်မနေ သွားမည်ဆိုပါက အပြန်တွင် Quarantine ဝင်ရမည်
ရှမ်းပြည်နယ်(အရှေ့ပိုင်း)၊ ကျိုင်းတုံခရိုင်၊ မိုင်းယန်းမြို့နယ်အတွင်းမှ ပြည်သူများအား Covid-19 ကူးစက်ဖြစ်ပွားမှုရှိနေသည့် တာချီလိတ်မြို့နယ်တွင်းသို့ အလည်မသွားရန်နှင့် မဖြစ်မနေ သွားရောက်မည်ဆိုပါကလည်း အပြန်တွင် facility quarantine ဝင်ရမည်ဖြစ်ကြောင်း မိုင်းယောင်းမြို့နယ် Covid-19 ရောဂါ ကာကွယ်ထိန်းချုပ် ကုသရေး လုပ်ငန်းကော်မတီမှ ဒီဇင်ဘာလ (၁)ရက်နေ့က အသိပေးပန်ကြားလိုက်သည်။
မိုင်းယန်းမြို့နယ်အတွင်းမှ ပြည်သူများအနေဖြင့် တာချီလိတ်မြို့နယ်အတွင်းသို့ မဖြစ်မနေ သွားရောက်မည်ဆိုပါက ရပ်ကွက်/ကျေးရွာအုပ်ချုပ်ရေးမှူးများ၏ ခရီးသွားထောက်ခံချက် ယူဆောင်သွားကြရန်လိုအပ်မည်ဖြစ်ပြီး အပြန်တွင်လည်း ကော်မတီက သတ်မှတ်သည့် facility quarantine အစီအစဉ်ကိုလည်း လိုက်နာရမည်ဖြစ်ကြောင်း အသိပေးကြေညာထားခြင်း ဖြစ်သည်။
တာချီလိတ်မြို့သို့ လာမည်ဆိုပါကလည်း မည်သည့်ဒေသက လာသူမဆို ရပ်ကွက်/ကျေးရွာအုပ်ချုပ်ရေးမှူး၏ ထောက်ခံချက်လိုအပ်မည်ဖြစ်ပြီး တာချီလိတ်မြို့အဝင် မယ်ယန်း Covid-19 စစ်ဆေးရေးစခန်းတွင် စစ်ဆေးနေလျက်ရှိသည်။
တာချီလိတ်မြို့ပေါ် ရပ်ကွက်ပေါင်း (၁၁)ခုအနက် (၉)ခု နှင့် ကျေးရွာအုပ်စု (၃)စုတို့တွင် ၂၀၂၀ခုနှစ် ဒီဇင်ဘာလ(၁)ရက်နေ့အထိ မြို့နယ်တွင်း ကူးစက်သည့် Covid-19 အတည်ပြုလူနာ (၄၆)ဦး နှင့် အခြားဒေသက လာ၍ စစ်ဆေးတွေ့ရှိရသည့် (၄)ဦး အပါအဝင် စုစုပေါင်း (၅၀)ဦးအထိ ရှိနေပြီဖြစ်ပြီး လက်ရှိတွင် (၅၀)ဦးလုံးမှာ ကုသမှု ခံယူနေဆဲ ဖြစ်သည်။
