~~~~~~~~⊰❂ Unicode Version ❂⊱~~~~~~~~

တာချီလိတ်ခရိုင် တာကြန့်ကျေးရွာမှ တောင်သူ ၆၃ ဦးကို ရာသီဥတုပြောင်းလဲမှုအတွင်း သီးနှံပိုးမွှားကာကွယ်ရေး သင်တန်းပေး
***********
ရှမ်းပြည်နယ် (အရှေ့ပိုင်း)၊ တာချီလိတ်ခရိုင်၊ စိုက်ပျိုးရေးဦးစီးဌာန၊ ခရိုင်ဦးစီးမှူးရုံးမှ တောင်သူပညာပေး အဖွဲ့သည် တာလေမြို့၊ နားယောင်းကျေးရွာအုပ်စု၊ တာကြန့်ကျေးရွာမှ ဒေသခံတောင်သူ (၆၃)ဦးကို ရာသီဥတု ပြောင်းလဲဖေါက်ပြန်မှုကြောင့် သီးနှံများတွင် ပိုးမွှားကျရောက်မှုကို ကာကွယ်နိုင်ရေး သင်တန်းပို့ချသည်။

တာကြန့်ကျေးရွာရှိ ခရိုင်အဆင့် ဘက်စုံအဆင့်မြင့်နည်းပညာသုံးစံပြကျေးရွာ၌ ၂၀၁၉ ခုနှစ်၊ စက်တင်ဘာလ (၂)ရက်နေ့က ဒေသခံတောင်သူများအား တာချီလိတ်ခရိုင်ဦးစီးမှူး ဦးလှဝင်းက ပိုးမွှားရောဂါ၊ ကြွက်နှင့် အာဟာရဓါတ်ချို့တဲ့မှု လက္ခဏာများကို စနစ်တကျ ခွဲခြားပြသပြီး တောင်သူများကြုံတွေ့နေရသော စိုက်ခင်းအတွင်းမှ ပြဿနာများကို ရှင်းလင်းဆွေးနွေးခဲ့ကြောင်း သိရသည်။

ဒေသခံတောင်သူများက မိမိတို့လယ်မြေတွင် စိုက်ပျိုးထားသော စပါးပင်များ ယူဆောင်လာပြီး ပိုးမွှားရောဂါ ကျရောက်မှုရှိ/မရှိ၊ အာဟာရဓါတ်ချို့တဲ့မှုများနှင့် ရေလုံလောက်မှုရှိ/မရှိ၊ အချို့သော တောင်သူများမှလည်း ကြွက်ကျရောက်မှု ကြိုတင်ကာကွယ် နှိမ်နှင်းနည်းများကို မေးမြန်းဆွေးနွေးကြကြောင်း သိရသည်။

 တောင်သူများ၏ မေးမြန်းဆွေးနွေးမှုကို ခရိုင်သီးနှံကာကွယ်ရေးတာဝန်ခံ ဦးခင်မောင်ထူး၊ တာလေမြို့ဦးစီးမှူး ဦးနေလင်းနှင့် တာဝန်ရှိဝန်ထမ်းများက ပြန်လည်ရှင်းလင်းဆွေးနွေးပြီး ပိုးမွှားကျရောက်နေသော စိုက်ခင်းများအတွက် ပိုးသတ်ဆေးများ ၊  ကြွက်သတ်ဆေးများ နှင့် အပင်အားတိုးဆေးများအား အခမဲ့ဖြန့်ဝေပေးခဲ့ကြောင်း သိရသည်။

Tachileik News Agency
ဓါတ်ပုံ - စိုက်ပျိုးရေးဦးစီးဌာန