~~~~~~~~⊰❂ Unicode Version ❂⊱~~~~~~~~

ကျိုင်းတုံမြို့နယ် (၂၈)မိုင်ရွာမှ မူးယစ်သတင်းရနေအိမ်အား ဝင်ဖမ်းရာ စိတ်ကြွဆေးနှင့် ဘိန်းစိမ်းများ ဖမ်းမိ
***********
ရှမ်းပြည်နယ်အရှေ့ပိုင်း၊ ကျိုင်းတုံမြို့နယ်၊ (၂၈)မိုင်ကျေးရွာမှ မူးယစ်ဆေးရောင်းချကြောင်း သတင်းရနေအိမ်အား ဝင်ရောက်ဖမ်းဆီးရာ အိမ်ရှင်ဇနီးမောင်နှံကို စိတ်ကြွဆေးပြား (၁၂၅)ပြား၊ ဘိန်းစိမ်း (၁၆၀)ဂရမ်တို့နှင့်အတူ ဖမ်းမိထားကြောင်း သိရသည်။

မူးယစ်တပ်ဖွဲ့စု (၂၈)ကျိုင်းတုံမှ တပ်ဖွဲ့ဝင်များသည် သက်သေများနှင့်အတူ ဝမ်တာပုံကျေးရွာအုပ်စု၊ (၂၈)မိုင်ကျေးရွာမှ လိလောင်နှင့် လင်းမွှေးတို့၏နေအိမ်အား ၂၀၁၉ ခုနှစ်၊ ဧပြီလ (၂၈)ရက်နေ့ နေ့လယ် (၂)နာရီ (၄၅)မိနစ်တွင် ဝင်ရောက်ရှာဖွေခြင်းဖြစ်ကြောင်း သိရသည်။

လင်းမွှေး လွယ်ထားသည့်အိတ်အတွင်းမှ စိတ်ကြွဆေးပြား (၁၂၅)ပြား၊ ငွေကျပ် (၁၆၉၀၀၀)နှင့် အခန်းအတွင်းမှ ဘိန်းစိမ်း (၁၆၀)ဂရမ်တို့ကို ရှာဖွေတွေ့ရှိရခြင်းဖြစ်ကြောင်း သိရသည်။

မူးယစ်ဆေးဝါးများနှင့်အတူ ဖမ်းဆီးရမိသည့် လိလောင်နှင့် လင်းမွှေးတို့အား ကျိုင်းတုံမြို့မရဲစခန်းတွင် မယ(ပ) ၁၀၅/၂၀၁၉၊ မူး/စိတ်ပုဒ်မ ၁၉(က)/၂၀(က)/၂၁ အရ အမှုဖွင့်စစ်ဆေးနေကြောင်း သိရသည်။

သတင်း #ငြိမ်းချမ်း(ပြည်)
ဓါတ်ပုံ - ရဲတပ်ဖွဲ့