~~~~~~~~⊰❂ Unicode Version ❂⊱~~~~~~~~

နယ်စပ်မြို့ တာချီလိတ်တွင် လမ်းများ၌ အမှိုက်ပုံးများထားရှိပေးသည့်စနစ် ကျင့်သုံးရန် ကြိုးစားနေ
**************
ထိုင်းနိုင်ငံနှင့်နယ်စပ် ရှမ်းပြည်နယ်(အရှေ့ပိုင်း) တာချီလိတ်မြို့တွင် လမ်းသွားလမ်းလာများ စည်းကမ်းမဲ့ အမှိုက်စွန့်ပစ်ခြင်းအစား အမှိုက်ပုံးများတွင် စနစ်တကျစွန့်ပစ်သည့်စနစ်ကို ကျင့်သုံးလာစေရန် လမ်းများတွင် အမှိုက်ပုံးထားပေးခြင်းကို ၂၀၁၉ ခုနှစ်၊ သြဂုတ်လ (၂၀)ရက်နေ့က စတင်ဆောင်ရွက်နေသည်။

လမ်းသွားလမ်းလာများ အမှိုက်စနစ်တကျစွန့်ပစ်နိုင်ရန်အတွက် မြို့ပေါ် (၁၁) ရပ်ကွက်တွင် အမှိုက်ပုံး (၆၄) ပုံး ချထားပေးခြင်းကို သြဂုတ်လ (၂၀)ရက်နေ့မှစ၍ စက်တင်ဘာလအတွင်း အပြီးသတ် ဆောင်ရွက်မည် ဖြစ်ကြောင်း သိရသည်။

" ဒီအမှိုက်ပုံးတွေ စောင့်ရှောက်ဖို့အတွက်က ရာအိမ်မှူး၊ ဆယ်အိမ်မှူးတွေကို မှာကြားထားပြီးပါပြီ။ ဒါပေမဲ့ ညပိုင်းအချိန်တွေမှာ ဖျက်စီးခဲ့တဲ့ အတွေ့အကြုံတွေရှိတာပေါ့။ ဒါကြောင့်မို့ ပြည်သူတွေကလည်း ကိုယ့်မြို့ ကိုယ်ရွာ သန့်ရှင်းသာယာလှပရေးဖြစ်တဲ့အတွက်ကြောင့် တာချီလိတ်မှာနေတဲ့ပြည်သူတွေကပဲ စောင့်ရှောက်ပေးဖို့ အကူအညီတောင်းခံအပ်ပါတယ်"ဟု တာချီလိတ်မြို့နယ် အုပ်ချုပ်ရေးမှူး ဦးချမ်းမြေ့စောက တာချီလိတ်သတင်းအေဂျင်စီသို့ ပြောသည်။

လမ်းသွားလမ်းလာများအနေဖြင့် အမှိုက်ပုံးများတွင် အမှိုက်စွန့်ပစ်စေရန်ဖြစ်ပြီး မိမိတို့နေအိမ်၊ ဆိုင်ခန်းများမှ ထွက်ရှိသည့်အမှိုက်များကို နေ့စဉ် အမှိုက်ကားလာသိမ်းချိန်တွင် စွန့်ပစ်ကြရမည်ဖြစ်ကြောင်း သိရသည်။

"လမ်းသွားလမ်းလာတွေ ပါလာတဲ့အမှိုက်တွေကို ဒီမှာပစ်ဖို့။ ဒီအမှိုက်တွေကို ပုံးမပြည့်ခင် စည်ပင်တို့ ပုဂ္ဂလိက အမှိုက်သိမ်းတဲ့သူတွေက လာသိမ်းပေးရမှာပေါ့။ ဒီစည်းကမ်းတွေလိုက်နာမှ မြို့ကြီးသားပီသမှာပေါ့ဗျာ"ဟု မြို့ပေါ်ရပ်ကွက်များတွင် အမှိုက်ပုံးများထားရှိရေးအတွက် ကူညီဆောင်ရွက်နေသည့် မဇ္ဇိမလူမှုကူညီရေးအသင်း ဥက္ကဌ ဦးတင့်ဆွေက ပြောသည်။ 

ရပ်ကွက်များအလိုက်ထားရှိမည့် အမှိုက်ပုံးများတွင် မြို့ရွာသန့်ရှင်းရေးလှုံ့ဆော်စာသားများ ကပ်ထားရန်အတွက် မြို့နယ်အုပ်ချုပ်ရေးမှူး ဦးချမ်းမြေ့စောက ကျပ်ငွေ(၁)သိန်းကိုလည်း ပံ့ပိုးပေးသည်ကို တွေ့ရသည်။

ရပ်ကွက်အလိုက် အမှိုက်ပုံးထားရှိလိုသည့်နေရာအရေအတွက်ကို သက်ဆိုင်ရာ ရပ်ကွက်အုပ်ချုပ်ရေးမှူးများက မြို့နယ်စီမံခန့်ခွဲရေးကော်မတီသို့ တင်ပြထားရာတွင် ပုန်းထွန်ရပ်ကွက်က (၅)နေရာ၊တာလော့ရပ်ကွက်က (၄) နေရာ၊ ဝမ်ကောင်းရပ်ကွက်က (၁၅) နေရာ၊ မကာဟိုခမ်းရပ်ကွက်က (၅)နေရာ၊ ဆန်ဆိုင်း(က)ရပ်ကွက်မှ (၃) နေရာ၊ ဆန်ဆိုင်း (ခ) ရပ်ကွက်မှ (၅)နေရာ၊ မယ်ခေါင်ရပ်ကွက်မှ (၇)နေရာ၊ ရန်အောင်မြေရပ်ကွက်မှ (၄)နေရာ၊ ဝိန်းကျောက်ရပ်ကွက်မှ (၅)နေရာ၊ ပါဆတ်ရပ်ကွက်မှ (၁၁)နေရာ တင်ပြထားကြောင်း သိရသည်။

တာချီလိတ်မြို့တွင် စည်းကမ်းမဲ့စွန့်ပစ်ထားသည့်အမှိုက်များအား အပတ်စဉ် စနေနေ့တိုင်း စုပေါင်းသန့်ရှင်းရေးလုပ်ဆောင်ခြင်းကိုလည်း ဆောင်ရွက်နေခြင်းဖြစ်သည်။

သတင်း၊ဓါတ်ပုံ #ဟန်စိုးထိုက်