~~~~~~~~⊰❂ unicode ❂⊱~~~~~~~~

လွိုင်ကော်မြို့နယ်တွင် စိတ်ကြွရူးသွပ်ဆေးပြား (၁၀၀၀၀)နှင့် လက်နက်ခဲယမ်းများ ဖမ်းဆီးရမိ
***************
ကယားပြည်နယ်၊ လွိုင်ကော်မြို့နယ်၊ ကုန်းသာကျေးရွာအုပ်စု ၊ ဆောင်ကန်ကျေးရွာအနီးတွင် အောက်တိုဘာလ (၂၉) ရက်နေ့ညက စိတ်ကြွရူးသွပ်ဆေးပြား (၁၀၀၀၀)သယ်ဆောင်လာသည့် အမျိုးသားထံမှ သေနတ်နှင့် လက်ပစ်ဗုံးတို့ကိုပါ ဖမ်းဆီးရမိထားကြောင်း သိရသည်။

မူးယစ်တပ်ဖွဲ့စု (၂၀) လွိုင်ကော်မှ တာဝန်ရှိသူများ၊ ခလရ(၂၆၁) တပ်ရင်းမှ တာဝန်ရှိသူများနှင့် သတင်း တပ်ဖွဲ့များ ပူးပေါင်း၍ မူးယစ်ဆေးဝါး သတင်းအရ လွိုင်ကော် - မိုးဗြဲ ကားလမ်းတွင် စစ်ဆေးမှုများဆောင်ရွက်နေစဉ် စိတ်ကြွရူးသွပ်ဆေးပြားများနှင့် လက်နက်ခဲယမ်းများ ဖမ်းဆီးရမိခဲ့ခြင်းဖြစ်ကြောင်း သိရသည်။

ကုန်းသာကျေးရွာအုပ်စု၊ ဆောင်ကန်းကျေးရွာအနီးတွင်  ဖယ်ခုံဘက်မှ လွိုင်ကော်ဘက်သို့ မောင်းနှင်လာသည့် TOYOTA MAJESTA CROWN အမျိုးအစား မော်တော်ယာဉ်အား ရှာဖွေစစ်ဆေးခဲ့ရာ ယာဉ်မောင်းဖြစ်သူ မောင်လောင်၏ ဘောင်းဘီခါးကြား၌ ရှမ်းစက္ကူဖြင့်ထုပ်ထားသည့် WY စာတန်းပါ စိတ်ကြွရူးသွပ်ဆေးပြား (၁၀၀၀၀)၊ 9mm ကျည် (၁၈)တောင့် ထည့်ထားသည့် SIG SAUER အမျိုးအစား အနက်ရောင်ပစ္စတိုသေနတ် တစ်လက်နှင့် MG1 အမျိုးအစား အစိမ်းရောင်လက်ပစ်ဗုံးတစ်လုံးတို့ကို ဖမ်းဆီးရမိခြင်းဖြစ်ကြောင်း သိရသည်။

မူးယစ်ဆေးဝါး၊ လက်နက်များနှင့်အတူ ဖမ်းဆီးရမိသည့် မောင်လောင်အား လွိုင်ကော်မြို့မရဲစခန်းတွင် အမှုဖွင့်အရေးယူဆောင်ရွက်ထားကြောင်း သိရသည်။
သတင်း #ဆန်းဖြိုးထွန်း