တာချီလိတ်မြို့တွင် ဒီဇင်ဘာလ(၃)ရက်နေ့ နံနက်ပိုင်း၌ Fever Clinic သို့ လာရောက် စစ်ဆေးမှု ခံယူသူ (၃၈)ဦးစလုံး ကိုဗစ် ပိုးမတွေ့

ရှမ်းပြည်နယ်(အရှေ့ပိုင်း)၊  တာချီလိတ်မြို့ရှိ တာချီလိတ်ဆေးရုံဟောင်းထဲက Covid-19 စစ်ဆေးပေးနေသည့် Fever Clinic တွင် ၂၀၂၀ခုနှစ် ဒီဇင်ဘာလ(၃)ရက်နေ့ နံနက် (၁၁)နာရီအချိန်အထိ  လာရောက်စစ်ဆေးမှု ခံယူသူ (၃၈)ဦးရှိရာတွင် တစ်ဦးမှ Covid-19 ပိုး မတွေ့ရကြောင်း သိရသည်။

"ဒီနေ့ကတော့ အားလုံး Negative ပဲ၊ ဒီနေ့တော့ ပြီးပြီ၊  အားလုံးပေါင်း (၃၇)ဦး လူနာတစ်ယောက် အပါဆိုရင် (၃၈)ပါ။"ဟု  တာချီလိတ်မြို့နယ် ပြည်သူ့ကျန်းမာရေးဦးစီးဌာနမှ ကျန်းမာရေးမှူး အဆင့်(၁) ဦးဇော်လင်းဦးက တာချီလိတ်သတင်းအေဂျင်စီသို့  ပြောသည်။

တာချီလိတ်မြို့တွင် နိုဝင်ဘာလ(၂၂)ရက်နေ့က စ၍ ဒီဇင်ဘာလ(၂)ရက်နေ့ ညပိုင်းအထိ Covid-19 အတည်ပြုလူနာ စုစုပေါင်း (၅၅)ဦးအထိ ရှိနေရာ နိုဝင်ဘာလ(၂၂)ရက်နေ့က တွေ့ရှိရသည့် အခြားဒေသမှ ရောက်လာပြီး လမ်းလုပ်ငန်းဆောင်ရွက်မည့် လမ်းလုပ်သား (၂)ဦးအနက် ပထမတစ်ဦးသည် ဒီဇင်ဘာလ(၂)ရက်နေ့က ဆေးရုံမှ ဆင်းသွားပြီဖြစ်သည်။

တာချီလိတ်မြို့တွင် အခြားဒေသမှ လာရောက်၍ ပိုးတွေ့သူ (၄)ဦးနှင့် တာချီလိတ်မြို့တွင်း ကူးစက်မှုအဖြစ် စုစုပေါင်း (၅၁)ဦးရှိရာ လက်ရှိတွင် (၅၄)ဦး ကုသမှုခံယူနေဆဲ ဖြစ်ကြောင်း သိရသည်။