ရခိုင်ပြည်နယ်အတွင်း ကျောက်ဖြူ၊ အမ်း၊ တောင်ကုတ်နှင့် သံတွဲမြို့နယ်များတွင် သြဂုတ်လ (၂၆)ရက်နေ့မှစ၍ Stay at Home စတင် သတ်မှတ် 

ရခိုင်ပြည်နယ်အတွင်း ကျောက်ဖြူ၊ အမ်း၊ တောင်ကုတ်နှင့် သံတွဲမြို့နယ်များကို ၂၀၂၀ ခုနှစ်၊ သြဂုတ်လ (၂၆) ရက်နေ့ နံနက် (၆) နာရီမှစ၍ Stay at Home သတ်မှတ်လိုက်ပြီဖြစ်ရာ ရခိုင်ပြည်နယ်တွင် Stay at Home သက်ရောက်သည့်မြို့နယ် (၅)ခု ရှိလာပြီဖြစ်သည်။

စစ်တွေမြို့နယ်တွင် သြဂုတ်လ (၂၀)ရက်နေ့ ည (၈)နာရီမှစ၍ Stay at Home စတင် သက်ဝင်ခဲ့ခြင်းဖြစ်သည်။

ရခိုင်ပြည်နယ်၊ စစ်တွေမြို့တွင် COVID 19 ပြည်တွင်းကူးစက်မှုအဖြစ် ၂၀၂၀ ခုနှစ်၊ သြဂုတ်လ (၁၆)ရက်နေ့မှစ၍ တွေ့ခဲ့ရပြီးနောက် ရခိုင်ပြည်နယ်တွင်း ပြည်တွင်းကူးစက်လူနာများ ထပ်မံတွေ့လာရသဖြင့် COVID 19 ထိန်းချုပ်ရေးအတွက်  ပြည်သူများ မိမိနေအိမ်တွင်သာ  နေထိုင်ရန်  ကျန်းမာရေးနှင့် အားကစားဝန်ကြီးဌာနက   အမိန့်ထုတ်ပြန်လာခြင်းဖြစ်သည်။

ပြည်သူများ မိမိနေအိမ်တွင် နေထိုင်ရေး (Stay at Home) ကြေညာထားသည့်  မြို့နယ်များတွင် အစိုးရဌာန၊ အဖွဲ့အစည်းများ၊ ကုမ္ပဏီ၊ စက်ရုံ၊ အလုပ်ရုံများတွင် တာဝန်ထမ်းဆောင်ရန် သွားရောက်သူများမှ အပ မိမိနေအိမ်တွင်သာ နေထိုင်ရန်၊ မဖြစ်မနေ ဈေးဝယ်ထွက်ရပါက တစ်အိမ်လျှင်  တစ်ဦးသာထွက်ရန်၊  ဆေးရုံ၊ဆေးခန်းသွားရောက်ရန်ရှိပါက တစ်အိမ်လျှင် နှစ်ဦးသာ သွားရောက်ရန်၊ နေအိမ်ပြင်ပသွားတိုင်း Mask တပ်ရန်၊ တာဝန်ထမ်းဆောင်ရန်သွားသူများကို  ကြိုပို့ယာဉ်များနှင့် ဖြတ်သန်းခွင့်ပြုထားသည့် ယာဉ်များကိုသာ ရပ်ကွက်ကျော်လွန် သွားလာခွင့်ပြုရန်၊ ရပ်ကွက်အတွင်း ဈေးဝယ်ခြင်းအတွက် ယာဉ်မောင်းအပြင် ယာဉ်ပေါ်တွင် တစ်ဦး၊ ဆေးရုံဆေးခန်းသွားရန် ယာဉ်မောင်း အပြင် ယာဉ်ပေါ်တွင် နှစ်ဦးသာသွားရောက်ရန် စသည့်အချက်များကို လိုက်နာကြရမည်ဖြစ်သည်။

အရေးပေါ်ကိစ္စများရှိပါက သက်ဆိုင်ရာ ရပ်ကွက်၊ ကျေးရွာ အုပ်ချုပ်ရေးအဖွဲ့၏ ခွင့်ပြုချက်ဖြင့်သာ ခွင့်ပြုမည်ဖြစ်ပြီး ရပ်ကွက်/ကျေးရွာအတွင်း ဝင်/ထွက်ခွင့်ပြုမည်မဟုတ်ကြောင်း သိရသည်။

အမိန့်ကို လိုက်နာရန်ပျက်ကွက်ပါက ကူးစက်ရောဂါများ ကာကွယ်နှိမ်နှင်းရေးဥပဒေဖြင့် အရေးယူမည်ဖြစ်ကြောင်း ကြေညာထားသည်။