~~~~~~~~⊰❂ Unicode Version ❂⊱~~~~~~~~

"သူတို့က ထောင်မှာ (၉)ရက်နေရတယ်၊ တရားရုံးအချုပ်မှာလည်း ရက်အနည်းငယ်နေရတယ်၊ ပြီးတော့ ပြန်လည်တည်ထောင်ရေးလူငယ် ဂေဟာမှာ (၃)လနေရပြီးမှ ဒီကလေးတွေကို ပြန်လွှဲလိုက်တာ၊ တစ်နေ့တည်းအတူသွားပြီး တစ်နေ့တည်းမှာပဲ သူတို့အတူ ဖမ်းခံရတာ၊ ခေါ်သွားတဲ့ ထိုင်းကားသမားကိုလည်း ထိုင်းဘက်က ဖမ်းဆီးအရေးယူထားတယ်"ဟု လွှဲပြောင်းလက်ခံရေးတွင် ပါဝင်သည့် တာဝန်ရှိသူ တစ်ဦးက တာချီလိတ်သတင်းအေဂျင်စီသို့ ပြောပြသည်။

ဖမ်းဆီးခံရပြီး ပြန်လည်လွှဲပြောင်းပေးလာသည့် (၁၄)ဦးတွင် ရှမ်းပြည်နယ်(တောင်ပိုင်း)မှ အမျိုးသား(၃)ဦး နှင့် အမျိုးသမီး(၁၀)ဦး၊ ရှမ်းပြည်နယ်(မြောက်ပိုင်း)မှ အမျိုးသား(၁)ဦးပါဝင်ရာ၎င်းတို့သည် နယ်မြေကျော်သွားရောက်ခြင်းကြောင့် ဖမ်းဆီးခံရခြင်း ဖြစ်ကြောင်း နှင့် ၂၀၁၉ခုနှစ် မေလ(၁၃)ရက်နေ့က ထိုင်းနိုင်ငံတွင်းသို့ သွားရောက်ခြင်းဖြစ်ပြီး မေလ(၁၈)ရက်နေ့တွင် ဖမ်းဆီးခံရခြင်းဖြစ်ကြောင်း သိရသည်။

ထိုင်းနိုင်ငံဘက်မှ တာဝန်ရှိသူများက လွှဲပြောင်းပေးအပ်ရာတွင် မြန်မာဘက်မှ မြို့နယ်အထွေထွေအုပ်ချုပ်ရေးဦးစီးဌာန၊ အလုပ်သမား လူဝင်မှုကြီးကြပ်ရေးနှင့် ပြည်သူ့အင်အားဆိုင်ရာ ဦးစီးဌာန၊ မြို့နယ်အလုပ်သမားညွှန်ကြားမှုဦးစီးဌာန၊ လူကုန်ကူးမှုတိုက်ဖျက်ရေး ရဲတပ်ဖွဲ့နှင့် ထိုင်းနိုင်ငံ မယ်ဆိုင်မြို့ရောက် မြန်မာနိုင်ငံသားများအား ကူညီစောင့်ရှောက်ရေးနှင့် စေ့စပ်ညှိနှိုင်းရေးကော်မတီ (CNCMC) တို့က စိစစ်လက်ခံကြပြီး နေရပ်ပြန်ရန် အခက်အခဲဖြစ်သူများနှင့် အကူအညီလိုအပ်သူများကို သက်ဆိုင်ရာများဖြင့် ချိတ်ဆက်ဆောင်ရွက်ပေးရသည်များလည်း ရှိကြောင်း သိရှိရသည်။

Tachileik News Agency
ဓာတ်ပုံ - CNCMC