~~~~~~~~⊰❂ Unicode Version ❂⊱~~~~~~~~

ကွတ်ခိုင်နှင့် မူဆယ်ကြားတွင် ပစ်ခတ်မှုများကြောင့် မော်တော်ယာဉ်များ ပိတ်မိနေ၍ အနီးဝန်းကျင် ဒေသခံများက ကူညီပေးနေ
*************
ရှမ်းပြည်နယ် (မြောက်ပိုင်း) ကွတ်ခိုင်မြို့နှင့် မူဆယ်မြို့ဘက်သို့အဝင် ခိုမုန်းကျေးရွာကြားတွင် သြဂုတ်လ (၂၄)ရက်နေ့အထိ ပိတ်မိနေသည့်ကားများ ရှိနေပြီး အနီးဝန်းကျင်ကျေးရွာများတွင် ခိုလှုံနေကြရဆဲဖြစ်ကြောင်း သိရသည်။

“ဒီနေ့အခြေအနေအထိက တစ်ရွာနဲ့တစ်ရွာလည်း သွားလို့ လာလို့မရဖြစ်နေတယ်။ ရွာပြင်ကို ထွက်လို့မရ ဖြစ်နေတယ်။ ကွတ်ခိုင်ကနေ နမ့်ဖက်ကာအကျော် ခိုမုန်းအထိ ပြည်ထောင်စုလမ်းတလျှောက်တော့ ကားတွေက လမ်းပေါ်မှာ သူ့နေရာနဲ့သူတော့ ပိတ်မိနေကြတာပဲ။ ပိတ်မိနေကြတဲ့ကားတွေက နမ့်ဖက်ကာ အထွက်နားနဲ့ ရွာထဲမှာ နှစ်ဖွဲ့ ရှိနေတယ်။ သူတို့ဆို စဖြစ်နေကတည်းက ပိတ်မိနေကြတာ။ ကားကြီးသမားရော ကားလေးသမားရော အကုန်ပိတ်မိနေကြတာ။ ဘယ်သူမှ သွားလို့မရဘူး။ ကားလေးတွေက ခရီးသည်တင်တဲ့ ကားလေးတွေပေါ့”ဟု မေတ္တာရှင် လူမှုကူညီရေးအသင်း (နမ့်ဖက်ကာ)၏ အဖွဲ့ဝင်တစ်ဦးက တာချီလိတ်သတင်းအေဂျင်စီသို့ ပြောသည်။

ကွတ်ခိုင်နှင့် မူဆယ်ကြားတွင် ၂၀၁၉ ခုနှစ်၊ သြဂုတ်လ (၁၇)ရက်နေ့မှစ၍ ပစ်ခတ်တိုက်ခိုက်မှုများ ဖြစ်ပွားနေခြင်းဖြစ်ပြီး ပစ်ခတ်မှုများစတင်ချိန်က နမ့်ဖက်ကာကျေးရွာအနီး တိုက်ပွဲအတွင်းမှ ဒဏ်ရာရ လူနာသွားသည်သည့် မေတ္တာရှင်လူမှုကူညီရေးအသင်း(နမ့်ဖက်ကာ)၏ လူနာတင်ယာဉ် (၂)စီး ပစ်ခတ်ခံရကာ အသင်းသား (၂)ဦး ဒဏ်ရာရသွားခဲ့ပြီးနောက် လမ်းတလျှောက် ပိတ်မိနေသည့် ကားများက အကူအညီတောင်းခံလာသည်ကို သွားရောက်ကူညီရန် လုံခြုံရေးကြောင့် အခက်အခဲဖြစ်နေကြောင်း သိရသည်။

“သြဂုတ်လ (၂၀)ရက်နေ့က လမ်းတလျှောက် ပိတ်မိနေတဲ့ ကားသမားတွေ စားရေးသောက်ရေး အခက်အခဲဖြစ်နေလို့ သွားကူညီချင်ပေမဲ့ လမ်းကြောင်းကို ခွင့်ပြုမယ့်သူတွေကလည်း ဘယ်သူမှ တက်မလာဘူး။ ဒီတော့ လမ်းတလျှောက်ရွာတွေက အသင်းတော်တို့ စာပေယဉ်ကျေးမှုအဖွဲ့တို့ကို လှမ်းချိတ်ပြီး ကူညီပေးဖို့နဲ့ အကူအညီတောင်းလာတဲ့ ကားတွေကိုလည်း နီးစပ်ရာရွာမှာ အကူအညီတောင်းဖို့ ပြောထားရတယ်”ဟု မေတ္တာရှင် လူမှုကူညီရေးအသင်း (နမ့်ဖက်ကာ)၏ အဖွဲ့ဝင်က ပြောသည်။

နမ့်ဖက်ကာကျေးရွာအနီးတွင် ပစ်ခတ်မှုများစတင်ကတည်းက ပိတ်မိနေသည့် ကုန်တင်ယာဉ်ကြီး (၆)စီးအပါအဝင် ကားအစီးရေ (၂၀)ကျော်ရှိနေပြီး ကားသမားများကို ကျေးရွာလူထုက ကူညီပေးနေကြကြောင်း သိရသည်။

ရှမ်းပြည်နယ်မြောက်ပိုင်း ပြည်ထောင်စုလမ်းမကြီးတလျှောက်တွင် သြဂုတ်လ (၁၅)ရက်နေ့မှစပြီး TNLA၊ AA နှင့် MNDAA တို့၏ ပစ်ခတ်တိုက်ခိုက်မှုများကြောင့် မန္တလေး - မူဆယ် နယ်စပ်ကုန်သွယ်ရေးလမ်းကြောင်း ပြတ်တောက်နေခြင်းဖြစ်ပြီး အရေးပေါ်သွားလာရသူများအနေဖြင့် ရှောင်ကွင်းလမ်းများမှ သွားလာနေကြခြင်းဖြစ်သည်။

Tachileik News Agency
ဓါတ်ပုံ - [ပြည်ထောင်စုလမ်းမှ ပစ်ခတ်မှုများကြောင့် ၁၀၅ မိုင်ယာဉ်စစ်ကွင်းတွင် ပိတ်မိနေသည့် ကားသမားများအား ၁၀၅ မိုင်လူငယ်အဖွဲ့က အများပြည်သူလှူဒါန်းမှုဖြင့် ကူညီပေးနေခြင်းဖြစ်ပါသည်။]