~~~~~~~~⊰❂ Unicode Version ❂⊱~~~~~~~~

သိန်းနီ - ချင်းရွှေဟော်လမ်းမှ တံတား(၂)စင်း မိုင်းခွဲဖျက်ဆီးခံရ၍ လမ်းပန်းဆက်သွယ်ရေး ပြတ်တောက်
************
ရှမ်းပြည်နယ်(မြောက်ပိုင်း) ပြည်ထောင်စုလမ်းမကြီးတစ်လျှောက်တွင် ၂၀၁၉ ခုနှစ်၊ သြဂုတ်လ (၁၆) ရက်နေ့ ညပိုင်းနှင့် (၁၇ ရက်နေ့ နံနက်ပိုင်းတို့၌ တိုက်ပွဲများဆက်တိုက်ဖြစ်ပွားနေပြီး ချင်းရွှေဟော်- သိန်းနီလမ်းပိုင်းမှ တံတား (၂) စင်း မိုင်းခွဲဖျက်ဆီးခံလိုက်ရသည်။

“သိန်းနီ-ချင်းရွှေဟော်လမ်းက နားတီးကျေးရွာနဲ့ ကွမ်းလုံမြို့အကြား ကောင်းဟော်ကျေးရွာအနီးက တံတားတစ်စင်းနဲ့ အဲဒီလမ်းပေါ်က နောက်ထပ်တံတားတစ်စင်း ဒီမနက်မှာ ဖျက်ဆီးခံရပါတယ်။ ကောင်းဟော်နားက တံတားက ပိုရှည်တယ်။ လုံးဝကျိုးကျသွားတယ်။ ခရီးသွားပြည်သူတွေပဲ ဒုက္ခရောက်ရတာပေါ့။ နောက်တံတား တစ်စင်းက အပေါက်ဖြစ်သွားတယ်။ သိန်းနီနဲ့ လားရှိုးအစပ်မှာ တိုက်ပွဲတွေလည်း အခုထိဖြစ်နေကြပါတယ်”ဟု အမှတ် (၂) မဲဆန္ဒနယ်မှ ရှမ်းပြည်နယ်လွှတ်တော်ကိုယ်စားလှယ် ဒေါ်ခင်ထားရီက တာချီလိတ်သတင်း အေဂျင်စီသို့ သြဂုတ်လ(၁၇)ရက်နေ့ နံနက်(၈)နာရီဝန်းကျင်က ပြောသည်။

သိန်းနီနှင့် နမ့်စလပ်ကြား နမ့်တုန်ဆုန်ရွာအနီးမှ တံတား၊ နားတီးနှင့် ကွမ်းလုံကြား ဗြုံးတောင်တံတားတို့ မိုင်းခွဲဖျက်ဆီးခံရလိုက်ရခြင်းဖြစ်ကြောင်း သိရသည်။

သိန်းနီ - ချင်းရွှေဟော်လမ်းပိုင်းမှ တံတား(၂)စင်း ပျက်ဆီးသွားသည့်အတွက် ကုန်စည်နှင့် ခရီးသည်ပို့ဆောင်ရေးများ ရပ်တန့်သွားပြီး လားရှိုး - မန္တလေးလမ်းပိုင်းမှ ဂုတ်တွင်းတံတားမှာလည်း သြဂုတ်လ (၁၅)ရက်နေ့ နံနက်ပိုင်းက မိုင်းခွဲခံထားရသဖြင့် လမ်းပန်းဆက်သွယ်ရေး ပြတ်တောက်နေခြင်းဖြစ်သည်။

TNLA၊ AA နှင့် MNDAA အဖွဲ့များက သြဂုတ်လ (၁၅)ရက်နေ့တွင် မန္တလေးတိုင်းဒေသကြီး ပြင်ဦးလွင်နှင့် ရှမ်းပြည်နယ်မြောက်ပိုင်း ပြည်ထောင်စုလမ်းမကြီးတစ်လျှောက်တွင် တိုက်ခိုက်မှုများပြုလုပ်ခဲ့ပြီး သြဂုတ်လ (၁၆)ရက်နေ့ညပိုင်းက ကျောက်မဲမြို့အဝင်နှင့် သြဂုတ်လ (၁၇) ရက်နေ့ နံနက်ပိုင်းတွင် လားရှိုး - မူဆယ်လမ်းပိုင်းရှိ ကွတ်ခိုင်မြို့အနီးနှင့် လားရှိုး - ချင်းရွှေဟော်လမ်းပိုင်းတစ်လျှောက် တိုက်ပွဲများ ဆက်တိုက်ဖြစ်ပွားနေခြင်းဖြစ်သည်ဟု ဒေသခံများထံမှ သိရသည်။

သတင်း #နေဖြိိိိိိိိုးမြင့်
ဓါတ်ပုံ - Myo Thant Aung, Ah Gyung T. Hpukjawng