~~~~~~~~⊰❂ Unicode Version ❂⊱~~~~~~~~

မဲခေါင်မြစ်ကြောင်းလုံခြုံရေးအတွက် ကင်းလှည့်ရေယာဉ်များဖြင့် ကင်းလှည့်ဆောင်ရွက်ခြင်းသာမက မြစ်ကြောင်းနှင့် ဆက်စပ်နေသည့် ကုန်းနယ်နမိတ်များတွင်လည်း နယ်မြေခံတပ်မတော်၊ နယ်မြေခံရဲတပ်ဖွဲ့များဖြင့် ပူးပေါင်း၍ လုံခြုံရေးဆောင်ရွက်သွားရန် အဆိုပါ အစည်းအဝေးတွင် ဆွေးနွေးခဲ့သည်။

မဲခေါင်မြစ်ကြောင်းတလျှောက်နိုင်ငံများဖြစ်သည့် မြန်မာ၊ တရုတ်၊ ထိုင်းနှင့် လာအို (၄)နိုင်ငံ၏ အလယ်အလတ်အဆင့် သတင်းအချက်အလက်ဖလှယ်ရေးအစည်းအဝေးကို မြန်မာက အိမ်ရှင်အဖြစ်လက်ခံကာ ရှမ်းပြည်နယ်(အရှေ့ပိုင်း) တာချီလိတ်မြို့နယ်၊ ဝမ်ပုံဆိပ်ကမ်းရှိ ရေကြောင်းရဲတပ်ဖွဲ့ခွဲ(ဝမ်ပုံ)ရုံးတွင် ကျင်းပခြင်းဖြစ်သည်။

မဲခေါင်မြစ်ကြောင်းတွင် တရားမဝင် မူးယစ်ဆေးဝါးနှင့် လက်နက်ခဲယမ်းများ သယ်ဆောင်ရောင်းဝယ်နေမှုများ၊ လူကုန်ကူးမှုများ၊ တရားမဝင် နယ်စပ်ဖြတ်ကျော်ဝင်ရောက်မှုများကို (၄)နိုင်ငံချိတ်ဆက်၍ တားဆီးနှိမ်နှင်းရေးကို နံနက်(၈)နာရီမှ (၉)နာရီခွဲအထိ ဆွေးနွေးခဲ့ခြင်းဖြစ်သည်။

အဆိုပါ အစည်းအဝေးသို့ မြန်မာနိုင်ငံဘက်မှ အမှတ်(၁)ရေကြောင်းရဲကွပ်ကဲရေးအဖွဲ့ခွဲမှူးရုံးမှ အဖွဲ့ခွဲမှူး ရဲမှူးကြီး အောင်ဇော်မိုး၊ ရေကြောင်းရဲတပ်ဖွဲ့မှူးရုံးမှ ဦးစီးအရာရှိ(ပထမတန်း) ဒုတိယရဲမှူးကြီး လှမိုး၊ ရေကြောင်းရဲတပ်ဖွဲ့ခွဲ(ဝမ်ပုံ)မှ ရေယာဉ်မှူး ရဲမှူးသန်းနိုင်ဦး၊ နိုင်ငံဖြတ်ကျော်မှုခင်းဌာနကြီး (တားဆီးနှိမ်နှင်းရေးဌာနမှ ယာယီရဲမှူး မြင့်လွင်၊ မူးယစ်ဆေးဝါး တားဆီးနှိမ်နှင်းရေးရဲတပ်ဖွဲ့၊ အမှတ်(၃၀) မူးယစ်ရဲတပ်ဖွဲ့စုမှ တပ်ဖွဲ့စုမှူး ယာယီရဲမှူး မျိုးမင်းလှိုင်၊ လူကုန်ကူးမှုတားဆီးနှိမ်နှင်းရေးရဲတပ်ဖွဲ့မှ တပ်ဖွဲ့စိတ်မှူး ရဲမှူး ရင်ရင်အေးတို့ ပါဝင်သည့်အဖွဲ့၊ တရုတ်နိုင်ငံ ရဲတပ်ဖွဲ့ဌာနချုပ်၊ ရေကြောင်းကင်းလှည့်ရေးတပ်ဖွဲ့မှ တပ်ဖွဲ့မှူး ဗိုလ်ချုပ် Yuan Yaping ဦးဆောင်သည့် (၅)ဦးအဖွဲ့၊ လာအိုနိုင်ငံ နမ့်ထားပြည်နယ်တိုင်းစစ်ဌာနချုပ်မှ တပ်ဖွဲ့မှူး ဗိုလ်မှူးကြီး Soubin ဦးဆောင်သည့် (၅)ဦးအဖွဲ့၊ ထိုင်းနိုင်ငံ မဲခေါင်မြစ်ကြောင်းပြစ်မှုကာကွယ်တိုက်ဖျက်ရေးဗဟိုဌာနမှ ဌာနမှူး ရဲမှူးကြီး Nikom ဦးဆောင်သည့် (၆)ဦးအဖွဲ့တို့ တက်ရောက်ဆွေးနွေးကြခြင်းဖြစ်သည်။

Tachileik News Agency
သတင်း/ဓာတ်ပုံ - ဟန်စိုးထိုက်