ရှမ်းပြည်နယ် (အရှေ့ပိုင်း) တာချီလိတ်မြို့တွင် အစာအိမ်၊ အူလမ်းကြောင်းနှင့် အသည်းရောဂါဖောင်ဒေးရှင်း (မြန်မာ)က ၂၀၁၉ ခုနှစ်၊ အောက်တိုဘာလ (၂၁)ရက်နေ့ နေ့လယ်ပိုင်းတွင် အသည်းရောဂါအကြောင်း ဟောပြောဆွေးနွေးပြီး ဘီပိုး၊ စီပိုး အခမဲ့စစ်ဆေးခြင်းနှင့် ကာကွယ်ဆေးထိုးခြင်းကို အောက်တိုဘာလ (၂၂)ရက်နေ့၌ နောက်ဆုံးနေ့အဖြစ် ဆက်လက်ဆောင်ရွက်ပေးမည်ဖြစ်သည်။

နယ်လှည့်ကျန်းမာရေးစောင့်ရှောက်မှုခရီးစဉ် ရောက်ရှိနေသည့် အဆိုပါဖောင်ဒေးရှင်းက အသည်းရောင်အသားဝါရောဂါအကြောင်း ဟောပြောဆွေးနွေးပွဲကို အောင်မြတ်ခန်းမ၌ ကျင်းပရာ ဖောင်ဒေးရှင်း၏ ဂုဏ်ထူးဆောင် နာယက ဒုတိယဗိုလ်ချုပ်ကြီး သီရိပျံချီ အောင်သန်းထွဋ်၊ ဖောင်ဒေးရှင်း ဥက္ကဌ တပ်မတော်ဆေးတက္ကသိုလ် အစာအိမ်၊ အူလမ်းကြောင်းနှင့် အသည်းရောဂါဆေးပညာဌာန၊ ဂုဏ်ထူးဆောင် ပါမောက္ခ၊ ပါမောက္ခ ဒုတိယဗိုလ်မှူးကြီး ကျော်စိုးထွန်း (ငြိမ်း)၊ ဖောင်ဒေးရှင်း ဗဟိုအလုပ်အမှုဆောင် ကော်မတီဝင်၊ ဆေးတက္ကသိုလ် (၁) အသည်းရောဂါဆေးပညာဌာန၊ ပါမောက္ခ/ဌာနမှူး ပါမောက္ခ ဦးဝင်းနိုင်၊ တာချီလိတ်ခရိုင်ပြည်သူ့ဆေးရုံမှ ဆေးရုံအုပ်ကြီး ဒေါက်တာရွှေဝင်း၊ ခရိုင်နှင့် မြို့နယ်အဆင့် တာဝန်ရှိသူများ၊ အသည်းရောဂါအကြောင်း စိတ်ဝင်စားသူများ တက်ရောက်ကြခြင်းဖြစ်သည်။

တာချီလိတ်မြို့ မဟာမြတ်မုနိဘုရားကြီးကျောင်းတိုက် ဆရာတော်၏ အန္တိမအဂ္ဂိဈာပနကို ပူဇော်သည့်အနေဖြင့် အဆိုပါဖောင်ဒေးရှင်းက မဟာမြတ်မုနိဘုရားကြီးကျောင်းတိုက်ဝင်းအတွင်း၌ အသည်းရောင်အသားဝါ ဘီပိုး၊ စီပိုး အခမဲ့ စစ်ဆေးပေးခြင်းနှင့် ကာကွယ်ဆေးတစ်ကြိမ် အခမဲ့ထိုးနှံပေးခြင်းကို အောက်တိုဘာလ (၂၁)ရက်နှင့် (၂၂)ရက်နေ့များ၌ ဆောင်ရွက်ပေးနေခြင်းဖြစ်သည်။

နှစ်ရက်တာကာလအတွင်း လူပေါင်း (၁၀၀၀)ကို အသည်းရောင် အသားဝါ ဘီပိုး၊ စီပိုး ရှိ၊ မရှိ SD Rapid Test ဖြင့် အခမဲ့စစ်ဆေးပေးပြီး ဘီပိုး၊ စီပိုးမရှိသူများကို ကာကွယ်ဆေးတစ်ကြိမ် အခမဲ့ထိုးနှံပေးခြင်းဖြစ်သည်။

ကာကွယ်ဆေးကို (၃)ကြိမ်ထိုးနှံရမည်ဖြစ်ရာ ကာကွယ်ဆေးထိုးနှံသူများအနေဖြင့် နောက်ထပ် (၂)ကြိမ်ကို မိမိအစီအစဉ်ဖြင့် ထိုးနှံကြရမည်ဖြစ်ကာ ကာကွယ်ဆေးအကြိမ်ရေပြည့်အောင်ထိုးနှံပြီး (၂) လအကြာတွင် ကာကွယ်ဆေးအောင်၊ မအောင် ပြန်လည်စစ်ဆေးရမည်ဖြစ်ပြီး ကာကွယ်ဆေးအောင်မှသာ ဘီပိုးကူးစက်စေခြင်းမှ ကာကွယ်တားဆီးပေးနိုင်မည်ဖြစ်သည်။

စမ်းသပ်မှုအတွင်း ဘီပိုး၊ စီပိုးရှိကြောင်း အဖြေထွက်ပါက ဆေးခန်းကြီးများတွင် ELISA စက်ဖြင့် ဆက်လက်စစ်ဆေးအတည်ပြုခြင်းကို မိမိအစီအစဉ်ဖြင့် ဆက်လက်လုပ်ဆောင်ကြရမည်ဖြစ်သည်။
အစာအိမ်၊ အူလမ်းကြောင်းနှင့် အသည်းရောဂါဖောင်ဒေးရှင်း (မြန်မာ)၏ ဘီပိုး၊စီပိုး အခမဲ့စစ်ဆေးပေးခြင်းနှင့် ကာကွယ်ဆေးတစ်ကြိမ် အခမဲ့ထိုးနှံပေးခြင်းအစီအစဉ်တွင် ကျိုင်းတုံမြို့ ကုတင် (၃၀၀) ဆံ့ တပ်မတော်ဆေးရုံမှ ကုသရေးအဖွဲ့ကလည်း ပူးပေါင်းကူညီဆောင်ရွက်ပေးနေသည်ကို တွေ့ရသည်။

ဖေါင်ဒေးရှင်းက လူဦးရေ (၅၀၀)ကို အခမဲ့ စမ်းသပ်စစ်ဆေးပေးခြင်းဖြစ်ပြီး ဝစီပိတ်ဆရာတော်၊ ဦးတင်လှိုင်နှင့် ဦးစိုင်းပွတ်တို့၏ လှူဒါန်းမှုဖြင့် လူဦးရေ (၅၀၀) စုစုပေါင်း လူဦးရေ (၁၀၀၀)ကို အခမဲ့ စမ်းသပ်စစ်ဆေးပေးခြင်းနှင့် ကာကွယ်ဆေးတစ်ကြိမ် အခမဲ့ထိုးနှံပေးခြင်းကို ဆောင်ရွက်ပေးကြမည်ဖြစ်သည်။

အစာအိမ်၊ အူလမ်းကြောင်းနှင့် အသည်းရောဂါဖောင်ဒေးရှင်း (မြန်မာ)၏ ဘီပိုး၊စီပိုး အခမဲ့စစ်ဆေးပေးခြင်းနှင့် ကာကွယ်ဆေးတစ်ကြိမ် အခမဲ့ထိုးနှံပေးခြင်းအစီအစဉ်တွင် တာချီလိတ်မှ ဌာနဆိုင်ရာများကလည်း လိုအပ်သည်များ ပံ့ပိုးကူညီပေးနေပြီး ဝစီပိတ်ဆရာတော်၊ ဦးချစ်ထူ၊ ဦးထွန်းနေဦး၊ ဦးအားမဲ၊ ဦးလောတာ၊ ဦးအားပြာ၊ ဦးအားရင်၊ ဦးဝီလ်ဆင်မိုး၊ ဦးစိုင်းပွတ်၊ ဦးဇော်မြင့်၊ ကိုးကန့်လူမှုဖွံ့ဖြိုးရေးအဖွဲ့တို့က ရန်ကုန်မြို့ အခြေစိုက် အစာအိမ်၊ အူလမ်းကြောင်းနှင့် အသည်းရောဂါ ဖောင်ဒေးရှင်း(မြန်မာ)အတွက် အလှူငွေ ကျပ် (၁၁၅) သိန်းကိုလည်း လှူဒါန်းခဲ့ကြသည်ကို တွေ့ရသည်။

ဖေါင်ဒေးရှင်း၏ နယ်လှည့်ဆေးကုသမှုအစီအစဉ်နှင့်အတူ ဆေးကုမ္ပဏီ (၁၅)ခုလည်း လိုက်ပါလာခြင်းဖြစ်သည်။

Tachileik News Agency
ဓါတ်ပုံ - ကျော်ဇင်ဟိန်း