~~~~~~~~⊰❂ Unicode Version ❂⊱~~~~~~~~

မြန်မာရွှေ့ပြောင်းလုပ်သားတစ်ဦးကို ဘိန်းစာမှုန့် (၁၁၂)ကီလိုဂရမ်နှင့်အတူ ထိုင်းနိုင်ငံအတွင်း ဖမ်းမိ
************
ဘိန်းစာမှုန့် (၁၁၂)ကီလိုဂရမ် သယ်ဆောင်လာသည့် မြန်မာရွှေ့ပြောင်းလုပ်သားတစ်ဦးကို ထိုင်း - မြန်မာနယ်စပ် ကင်းလှည့်သည့် ထိုင်းရဲတပ်ဖွဲ့က ဖမ်းဆီးရမိထားကြောင်း သိရသည်။

ထိုင်း - မြန်မာနယ်စပ်ကင်းလှည့်သည့် ထိုင်းစစ်တပ်၊ နယ်စပ်ရဲတပ်ဖွဲ့၊ လူဝင်မှုကြီးကြပ်ရေးနှင့် နယ်မြေခံရဲတပ်ဖွဲ့တို့ပါဝင်သည့် ပူးပေါင်းအဖွဲ့က ၂၀၁၉ ခုနှစ်၊ ဧပြီလ (၁၆)ရက်နေ့တွင် ကင်းလှည့်နေစဉ် မော်တော်ဆိုင်ကယ်ဖြင့် ဘိန်းစာမှုန့်များသယ်လာသည့် အမျိုးသားကို ဖမ်းမိခြင်းဖြစ်ကြောင်း သိရသည်။

ကင်းလှည့်သည့်အဖွဲ့က မော်တော်ဆိုင်ကယ်စီးနင်းလာသည့်အမျိုးသားအား စစ်ဆေးရန် ရပ်တန့်ခိုင်းစဉ် ထွက်ပြေးသဖြင့် လိုက်လံဖမ်းဆီးခဲ့ရခြင်းဖြစ်ပြီး ၎င်းသယ်ဆောင်လာသည့် မြေသြဇာအိတ်အတွင်း ဘိန်းစာမှုန့်အထုပ်များအား စစ်ဆေးတွေ့ရှိရခြင်းဖြစ်ကြောင်း သိရသည်။

ဖမ်းဆီးရမိသည့် အသက် (၄၀)အရွယ် မြန်မာအမျိုးသားသည် တရားဝင်အလုပ်လုပ်ကိုင်ခွင့်ဖြင့် နေထိုင်သူဖြစ်ပြီး မူးယစ်ဆေးဝါးရောင်းဝယ်ခြင်းကို လုပ်ဆောင်နေကြောင်းနှင့် တောထဲတွင် ဝှက်ထားသည့် ဘိန်းစာမှုန့်အိတ်များကို ထုတ်ဖေါ်ပြောဆိုခဲ့ကြောင်း သိရသည်။

၎င်းသည် ဘိန်းစာမှုန့်များကို မြန်မာနိုင်ငံဘက်မှဝယ်ယူပြီး နယ်စပ်ဖြတ်ကျော်ကာ မြန်မာရေလုပ်သားများအား ပြန်လည်ရောင်းချနေခြင်းဖြစ်သည်ဟု ထွက်ဆိုထားသဖြင့် ဥပဒေအရ အရေးယူရန် ဆောင်ရွက်နေကြောင်း သိရသည်။

Tachileik News Agency
Ref: Bangkok Post