~~~~~~~~⊰❂ unicode ❂⊱~~~~~~~~

“ အဓိက ကတော့ ရှမ်းပြည်နယ်က လူငယ်တွေအတွက် ဒီလိုအသင်း ရှိတယ်ဆိုတာကို သိစေချင်တာက ပထမအချက်ပါ။ လူငယ်တွေရဲ့ အခွင့်အလမ်းတွေကို ပြောပြရှင်းလင်းပြီး လူငယ်တွေက ဒီအသင်းကို ဘာဖြစ်လို့ ပါဝင်သင့်တယ်ဆိုတာကို ပြောပြ ဆွေးနွေးတာဖြစ်ပါတယ်။ တစ်ချို့လူငယ်တွေမှာ လုပ်ငန်းလုပ်ဖို့ အရည်အချင်း ရှိတယ်။ အလုပ်အကြောင်းကို သေသေချာချာ မသိတဲ့အတွက် ရည်ရွယ်ချက် ပျောက်နေတာမျိုး မဖြစ်စေဖို့ သိသင့် သိထိုက်တာတွေကို သင်ပြ ဆွေးနွေးပေးတာဖြစ်ပါတယ် ” ဟု ရှမ်းပြည်နယ် လူငယ်စွန့်ဦးတီထွင် လုပ်ငန်းရှင်များအသင်း ပြည်သူ့ဆက်ဆံရေးကော်မတီ ဥက္ကဌ ဦးဇော်ဇော်ဦးက တာချီလိတ်သတင်းအေဂျင်စီသို့ ပြောသည်။

ရှမ်းပြည်နယ် လူငယ်စွန့်ဦးတီထွင်လုပ်ငန်းရှင်များအသင်းတွင် ရှမ်းပြည်နယ် အရှေ့ပိုင်း၊ တောင်ပိုင်း နှင့် မြောက်ပိုင်းတို့မှ လူငယ်လုပ်ငန်းရှင်များ ပါဝင်ကြောင်း သိရပြီး မိတ်ဆက်ပွဲအခမ်းအနားသို့ အထွေထွေ အုပ်ချုပ်ရေး ဦးစီးဌာနမှ တာဝန်ရှိသူများ၊ လားရှိုးမြို့ရှိ လူငယ်စီးပွားရေးလုပ်ငန်းရှင်များနှင့် စွန့်ဦးတီထွင် လုပ်ငန်းကို စိတ်ဝင်စားသည့် လူငယ်များ တက်ရောက်ကြခြင်းဖြစ်ကြောင်း သိရသည်။

မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များ အသင်းချုပ် UMFCCI၏ ဦးဆောင် လမ်းညွှန်မှုဖြင့် မြန်မာနိုင်ငံလူငယ်စွန့်ဦးတီထွင် လုပ်ငန်းရှင်များအဖွဲ့ MYEG ကို ၂၀၀၉ ခုနှစ်တွင် စတင် ဖွဲ့စည်းခဲ့ပြီး ၂၀၁၂ ခုနှစ်တွင် မြန်မာနိုင်ငံလူငယ်စွန့်ဦးတီထွင်လုပ်ငန်းရှင်များအသင်း MYEA အဖြစ် အမျိုးသား စီမံကိန်းနှင့် စီးပွားရေး ဖွံ့ဖြိုးတိုးတက်မှုဝန်ကြီးဌာနတွင် တရားဝင်မှတ်ပုံတင်၍ တည်ထောင် ခဲ့ခြင်းဖြစ်ကြောင်း သိရသည်။

သတင်း/ဓာတ်ပုံ - နဖြေိုးမြင့်