စစ်ကိုင်းတိုင်း၊ စစ်ကိုင်းမြို့မှ မုံရွာမြို့သို့ထွက်လာသည့် စစ်ကောင်စီတပ်၏ ထောက်ပို့ယာဉ်တန်းကို ချောင်းဦးမြို့နယ်ပြည်သူ့ကာကွယ်ရေးတပ်ဖွဲ့က ၂၀၂၂ ခုနှစ်၊ စက်တင်ဘာလ (၂၅)ရက်နေ့က မိုင်းဆွဲတိုက်ခိုက်မှုအတွင်း စစ်ကောင်စီတပ်မှ (၆)ဦးသေ၊ (၂)ဦးအရှင်ဖမ်းမိကာ လက်နက်ခဲယမ်းအချို့ သိမ်းဆည်းရမိသည်ဟု သိရသည်။

အဆိုပါယာဉ်တန်းကို ချောင်းဦးမြို့နယ်ပြည်သူ့ကာကွယ်ရေးတပ်ဖွဲ့ (CHUPDF) တပ်ခွဲ ၄ (မိုင်းတပ်ခွဲ) မှ ရဲဘော်များက ချောင်းဦးမြို့နှင့် ခင်မွန်ကျေးရွာကြား၌ မိုင်းဆွဲတိုက်ခိုက်ရာ စစ်ကောင်စီတပ်၏ကား (၁) စီး ပျက်စီးရပ်တန့်သွားခဲ့ရာ စစ်ကောင်စီကား နောက်တစ်စီးက ရပ်တန့်ကူညီခဲ့ကြောင်း သိရသည်။

အဆိုပါကားနှစ်စီးကို ချောင်းဦးမြို့နယ် ပကဖ အင်အားစုဖွဲ့ရေးနှင့် လေ့ကျင့်ရေးတာဝန်ခံဦးစီး အင်အား ၄ ဦးနှင့် CHUPDF တပ်ခွဲ (၁)၊ တပ်ခွဲ (၄) ပူးပေါင်းအဖွဲတို့က ဝင်ရောက်တိုက်ခိုက်ရာ  စစ်ကောင်စီတပ်မှ (၆)ဦးသေဆုံးပြီး နောက်ထပ် (၂)ဦးကို ဒဏ်ရာဖြင့် ဖမ်းမိခဲ့ကြောင်း သိရသည်။

ဖမ်းမိသူ (၂)ဦးအနက် (၁)ဦးမှာ လမ်းတွင် သေဆုံးသွားပြီး ကျန် (၁)ဦးမှာ စခန်းတွင် ဆေးကုပေးစဉ် ထပ်မံသေဆုံးသွားခြင်းဖြစ်ကြောင်းသိရသည်။

အဆိုပါတိုက်ခိုက်မှုအတွင်း စစ်ကောင်စီတပ်ဖွဲ့ထံမှ  BA-72(G1) ၁လက်၊ MA-3 ၁လက်၊ BA-94(Uzhi) ၁လက်၊ 7.62(ကပစ) ၂၀  တောင့်၊ 5.56(ကပစ) ၂၆တောင့်၊ 9mm(ကပစ) ၁၅တောင့်၊ ဓားမြှောင် ၁လက်၊ Mytel Keypad ၁လုံး၊ walkitalki (ဆက်သွယ်ရေးစကားပြောစက်) ၁လုံးတို့ကို ချောင်းဦးမြို့နယ်ပြည်သူ့ကာကွယ်ရေးတပ်ဖွဲ့က သိမ်းဆည်းရရှိခဲ့ကြောင်း သိရသည်။