မြန်မာ - ထိုင်းနယ်စပ် ကရင်ပြည်နယ်တွင်းမှ မြန်မာစစ်တပ်အတွက် ထိုင်းစစ်တပ်အနေဖြင့် ရိက္ခာကူညီပေးခြင်းမရှိကြောင်းနှင့် ထိုင်းစစ်တပ်မှ ထောက်ပံ့သည်ဟု သတင်းထွက်နေသည့် ဆန်အိတ်များမှာ တရားမဝင် ရောင်းဝယ်ကြခြင်းသာဖြစ်နိုင်သည်ဟု ထိုင်းစစ်တပ်တာဝန်ရှိသူက ပြန်လည်တုန့်ပြန်လိုက်သည်။

ကရင်ပြည်နယ်နှင့်နယ်စပ် ထိုင်းဘက်တွင် ထိုင်းလုံခြုံရေးတာဝန်ရှိသူများထံမှ ဆန်အိတ်များအပါအဝင် ရိက္ခာများ သံလွင်မြစ်ကမ်းဖြတ်၍ သယ်ဆောင်နေသည်ကို တွေ့ရပြီး အဆိုပါ ရိက္ခာများမှာ KNU က ရိက္ခာလမ်းကြောင်း ဖြတ်တောက်ခံထားရသည့် ကရင်ပြည်နယ်တွင်းမှ မြန်မာစစ်တပ်အတွက် ထိုင်းစစ်တပ်က ပံ့ပိုးခြင်းဖြစ်သည်ဟု ထိုင်းသတင်းဌာနအချို့တွင် ၂၀၂၁ ခုနှစ် မတ်လ (၂၀) ရက်နေ့က ဖေါ်ပြလာပြီးနောက် ထိုင်းစစ်တပ်တာဝန်ရှိသူက တုန့်ပြန်ဖြေရှင်းလာခြင်းဖြစ်သည်။

ထိုင်းစစ်တပ်အနေဖြင့် မြန်မာစစ်တပ်အား ရိက္ခာထောက်ပံ့ရန် တာဝန်မရှိကြောင်းနှင့် မြန်မာစစ်တပ်အနေဖြင့် ဆက်သွယ်အကူအညီတောင်းလာခြင်းလည်းမရှိကြောင်း ထိုင်းစစ်တပ်မှအရာရှိက ပြောကြားထားသည်။ အဆိုပါ ရိက္ခာများမှာ အကောက်ခွန်ဥပဒေကိုချိုးဖေါက်၍ တရားမဝင်ကူးသန်းရောင်းဝယ်ခြင်းဖြစ်နိုင်ပြီး အခြေအနေအား စုံစမ်းမည်ဟု ဆိုထားသည်။

သို့သော် အဆိုပါရိက္ခာများသည် မြဝတီ-မဲဆောက်မှ တစ်ဆင့် ထိုင်းနိုင်ငံအတွင်းမှ ဖြတ်ပြီး မဲစရီးယန်းမြို့အနီး (ကရင်အခေါ်) သော်လဲထကျေးရွာအနီး သံလွင်မြစ်ကမ်းဘေးသို့ ရောက်လာခြင်းဖြစ်ပြီး မြစ်ကြောင်းတလျှောက် စစ်တပ်စခန်းများသို့ ပို့မည့်ရိက္ခာများဖြစ်သည်ဟု ဒေသခံများက ပြောသည်။



Source: matichon