~~~~~~~~⊰❂ Unicode Version ❂⊱~~~~~~~~

ရှမ်းမြောက်တွင် တိုက်ခိုက်နေသည့် မဟာမိတ် (၃)ဖွဲ့က စစ်ရေးမဟုတ်သည့် ပစ်မှတ်များကို တိုက်ခိုက်နေသည့် တပ်သား၊ အရာရှိများကို အရေးယူမည်ဟု ထုတ်ပြန်
*************
ရှမ်းပြည်နယ်(အရှေ့ပိုင်း) ကျိုင်းတုံမြို့တွင် ငြိမ်းချမ်းရေးကော်မရှင်နှင့် ဆွေးနွေးပွဲစတင်မည့် ၂၀၁၉ ခုနှစ်၊ သြဂုတ်လ (၃၁)ရက်နေ့၌ မြောက်ပိုင်းဒေသ ပြည်ထောင်စုလမ်းမကြီးတလျှောက် ပစ်ခတ်တိုက်ခိုက်မှုများ ပြုလုပ်နေသည့် မဟာမိတ် (၃)ဖွဲ့က အရပ်ဖက်မော်တော်ယာဉ်များအား မီးရှို့ဖျက်ဆီးခြင်းများနှင့်ပတ်သက်၍ ထုတ်ပြန်ချက်တစ်စောင် ထုတ်ပြန်လိုက်သည်။

ပြည်ထောင်စုလမ်းမကြီးတလျှောက်တွင် ၂၀၁၉ ခုနှစ်၊ သြဂုတ်လ (၁၅)ရက်နေ့မှစတင်၍ တိုက်ခိုက်မှုများ ပြုလုပ်နေသည့် ညီနောင်မဟာမိတ်အဖွဲ့မှ TNLA၊ AA နှင့် MNDAA တို့က  သိန်းနီမြို့နယ်နှင့် ကွတ်ခိုင်မြို့နယ်အတွင်း ပြည်ထောင်စုလမ်းမကြီးတလျှောက်တွင် အရပ်သား မော်တော်ယာဉ်များအား မီးရှို့ဖျက်ဆီးမှုများ ပြုလုပ်ခဲ့ကြခြင်းဖြစ်သည်။

ယင်းကဲ့သို့ စစ်ရေးမဟုတ်သည့် ပစ်မှတ်များကို တိုက်ခိုက်မှုအတွက် အဆိုပါ မဟာမိတ်တပ်ဖွဲ့ (၃)ဖွဲ့၏ ငယ်သားတပ်မှူးအချို့နှင့် အောက်ပိုင်းအဆင့် စစ်သည်များကို သက်ဆိုင်ရာတပ်များက အရေးယူမည်ဟု သတင်းထုတ်ပြန်ချက်တွင် ဖေါ်ပြထားသည်။

ရှမ်းပြည်နယ်မြောက်ပိုင်းဒေသတွင် တိုက်ခိုက်နေသည့် TNLA၊ AAနှင့် MNDAA အပြင် KIA တို့ပါဝင်သည့် တိုင်းရင်းသားလက်နက်ကိုင်အဖွဲ့များနှင့် ပြည်ထောင်စု ငြိမ်းချမ်းရေးကော်မရှင်တို့သည် ကျိုင်းတုံမြို့တွင် သြဂုတ်လ (၃၁)ရက်နေ့၌ ဆွေးနွေးကြတော့မည်ဖြစ်သည်။

Tachileik News Agency