ကိုရိုနာဗိုင်းရပ်စ်အခြေအနေကြောင့် နယ်စပ်ဒေသ တာချီလိတ်မှ ဒေသတွင်းနေ ပြည်သူများအကြား ပြန့်နှံ့နေသည့် မြန်မာ - ထိုင်း ချစ်ကြည်ရေး အမှတ်(၁)တံတား ပိတ်မည်ဆိုသော ကောလဟာလ နှင့် ပတ်သက်၍ တံတားပိတ်မည် ဆိုသည်မှာ ညွန်ကြားထားခြင်း မရှိကြောင်း ၂၀၂၀ခုနှစ် မတ်လ(၁၈)ရက်နေ့တွင် တာချီလိတ် နှင့် မယ်ဆိုင် မြို့နယ်အုပ်ချုပ်ရေးမှူးတို့က တာချီလိတ်သတင်းအေဂျင်စီသို့ အတည်ပြု ပြောကြားလိုက်သည်။
အမှတ် (၁)ချစ်ကြည်ရေးတံတား ပိတ်တယ်ဆိုတာက ကျွန်တော်တို့ဘက်ကဆို ပြည်ထောင်စုအဆင့်အထိ တင်ပြပြီးတော့ လုပ်ရတဲ့ ကိစ္စမျိုးဖြစ်ပါတယ်။ လက်ရှိအနေအထားမှာတော့ နှစ်နိုင်ငံဆက်သွယ်ပြောထားတာလည်း မရှိဘူး။ ကျွန်တော်တို့ ဘက်ခြမ်းမှာလည်း လတ်တလောပိတ်ဖို့ ညွှန်ကြားချက် တစ်စုံတစ်ရာ မရှိပါဘူး
ဟု တာချီလိတ်မြို့နယ်အုပ်ချုပ်ရေးမှူး ဦးချမ်းမြေ့စောက တာချီလိတ်သတင်းအေဂျင်စီသို့ မတ်လ (၁၈)ရက်နေ့ ညနေပိုင်းက အတည်ပြု ပြောကြားထားခြင်း ဖြစ်သည်။
တံတားပိတ်မည်ဆိုသည့် ကောလဟာလနှင့် ပတ်သက်၍ ၂၀၂၀ခုနှစ် မတ်လ(၁၈)ရက်နေ့ နေ့လည်ပိုင်းက ထိုင်းနိုင်ငံ မယ်ဆိုင်မြို့နယ်အုပ်ချုပ်ရေးမှူး နိုင်းဆုံမ်ဆတ်ခနားခမ်း ထံ တာချီလိတ်ခရိုင်အုပ်ချုပ်ရေးမှူးရုံးမှ မြန်မာ - ထိုင်း ဆက်ဆံရေးတာဝန်ခံ ဦးထွန်း(မယ်ဆိုင်)မှ တစ်ဆင့် ဆက်သွယ်မေးမြန်းသည့်အခါ ညွှန်ကြားချက် မရှိကြောင်း ပြန်လည်ဖြေကြားလိုက်သည်။
မယ်ဆိုင်မြို့နယ်အုပ်ချုပ်ရေးမှူးပြောတာက အခုလောလောဆယ်မှာ တံတားပိတ်ဖို့ အစီအစဉ် လုံးဝမရှိပါဘူး၊ ပိတ်မယ်ဆိုရင်လည်း သက်ဆိုင်ရာ နိုင်ငံခြားရေးရာဝန်ကြီးဌာနတွေက နေပြီး ညွှန်ကြားချက်ထုတ်မှာပါ၊ ညွှန်ကြားချက်ထုတ်ပြီး နှစ်နိုင်ငံ သဘောတူညီပြီးတော့မှပဲ ပိတ်မှာပါ၊ အခုလောလောဆယ်မှာတော့ ပိတ်ဖို့လည်း အစီအစဉ် မရှိပါဘူးဆိုပြီး မယ်ဆိုင်မြို့နယ်အုပ်ချုပ်ရေးမှူး နိုင်းဆုံမ်ဆတ်ခနားခမ်းက ပြန်ပြောလာပါတယ်
ဟု တာချီလိတ်ခရိုင်အုပ်ချုပ်ရေးမှူးရုံးမှ မြန်မာ - ထိုင်း ဆက်ဆံရေးတာဝန်ခံ ဦးထွန်း(မယ်ဆိုင်)က တာချီလိတ်သတင်းအေဂျင်စီသို့ ပြန်လည်ပြောပြသည်။
တာချီလိတ် နှင့် မယ်ဆိုင်အကြားရှိ မြန်မာ - ထိုင်း ချစ်ကြည်ရေး အမှတ်(၁)တံတားအား ကိုရိုနာဗိုင်းရပ်စ်အခြေအနေကြောင့် ပိတ်မည်ဆိုသည့် ကောလဟာလများကြောင့် မြို့တွင်းရှိ ကုန်စုံဆိုင်အချို့မှာ ငါးသေတ္တာ၊ မားမား ခေါက်ဆွဲခြောက် နှင့် အဆင်သင့် စားသုံးနိုင်မည့် အစားအစာများ၊ ကလေးအသုံးအဆောင်များ အရောင်း သွက်မှုများရှိနေပြီး၊ ဈေးများတွင်လည်း ဆန်၊ ဆီ စသည့် စားသောက်ကုန်များလည်း ပုံမှန်အခြေအနေထက် အရောင်းသွက်ကြောင်းနှင့် အချို့စားသောက်ကုန်များမှာ ဈေးနှုန်းမြှင့်တက်လာမှုများရှိနေကြောင်း သိရသည်။
Tachileik News Agency
သတင်း - ကိုဇောင်း
