"ရှမ်းပြည်နယ်အရှေ့ပိုင်းမှာရှိတဲ့ ကျောင်းကြီးတွေပေါ့။ (၁၅၀) ကျော်တယ်။ သံဃာတော်တွေကတော့ အများကြီးပဲပေါ့။ မနေ့ကကျတော့ ဘုရားနှလုံးသွင်းတာပေါ့။ အရင်ကကျွန်တော်တို့မတွေ့ဖူးဘူး။ ဆရာတော်နဲ့ကျမှ တွေ့ဖူးတာပေါ့။ အသည်းတို့၊ အူတို့၊ အဆုတ်တို့ အစုံလုပ်ပြီးမှ ရွှေတွေ ကျောက်စိမ်း၊ ပတ္တမြားတွေနဲ့ ဌာပနာထည့်ပြီးမှ နှလုံးသွင်းတာပေါ့။ ညကျတော့ ဘုရားအနေကဇာတင်တယ်။ တောင်ပေါ်မှာ ထီးတင်တယ်။ တစ်ဆူကို ဌာပနာထည့်တာပေါ့။ လွယ်စတုံတောင်ပေါ်မှာပေါ့။ (၇) လပိုင်း (၇) ရက်နေ့မှာ ဆရာတော် မြောင်းမြမှာထီးတင်မယ်။ ထီးတင်ပြီးရင် ပုဂံမှာလည်း ဒကာတွေကျောင်းလှူထားတဲ့ဟာ ပန္နက်ရိုက်ဖို့ ကြွရမယ်"ဟု ဆရာတော်၏ ဒကာရင်းဖြစ်သူ ဦးစိုင်းစိုင်းက တာချီလိတ်သတင်းအေဂျင်စီသို့ ပြောသည်။

ဆရာတော်၏မွေးနေ့အကြိုအဖြစ် ၂၀၁၉ ခုနှစ် ဇွန်လ(၁)ရက်နေ့က ဝေဿန္တရာတရားဇာတ်တော်ရွတ်ဖတ်ပူဇော်ခြင်း၊ ဉာဏ်တော်(၅၀)ပေနှင့်(၉)လက်မ အမြင့်ရှိ ဗုဒ္ဓမေတ္တာမဟာဗောဓိဘုရားကြီး နှလုံးတော်သွင်းပူဇော်ခြင်း၊ ဗုဒ္ဓဘိသေက ရေသပ္ပာယ်တော်မူခြင်း နှင့် အနေကဇာတင်ခြင်းအပြင် လွယ်စတုံတောင်ပေါ်ရှိ ဟုမ့်ယိမ်ဆိုင်မိန်းစေတီတော်ကြီးအား စိန်ဖူးတော်အသစ်နှင့်ထီးတော်အသစ် တင်လှူပွဲ အစီအစဉ်များကို ပြုလုပ်ခဲ့ကြောင်း သိရသည်။

Tachileik News Agency