~~~~~~~~⊰❂ Unicode Version ❂⊱~~~~~~~~

ကျိုင်းတုံမြို့နယ် ကျိုင်းလိတ်ရွာမှ အသက် (၁၈)နှစ်အရွယ် မိန်းကလေးတစ်ဦး ကြိုးဆွဲချသေဆုံး
********
ရှမ်းပြည်နယ်အရှေ့ပိုင်း၊ ကျိုင်းတုံမြို့နယ်၊ နောင်ကုန်ကျေးရွာအုပ်စု၊ ကျိုင်းလိတ်ရွာမှ အသက် (၁၈)နှစ်အရွယ် မိန်းကလေးတစ်ဦး ၂၀၁၉ ခုနှစ်၊ ဧပြီလ (၂၉)ရက်နေ့က နေအိမ်ခြံဝန်းတွင် ကြိုးဆွဲချသေဆုံးသွားကြောင်း သိရသည်။

ကျိုင်းလိတ်ရွာတွင် မိခင်၊အဖိုး၊အဖွားတို့နှင့်အတူနေထိုင်သည့် မသက်ငုံဖူးကို သေဆုံးသည့်နေ့ နံနက် (၁၁)နာရီခွဲဝန်းကျင်က နေအိမ်တွင်မတွေ့ရသဖြင့် မိခင်ဖြစ်သူက နေအိမ်ခြံဝင်းအတွင်း လိုက်လံရှာဖွေရာ နေအိမ်နှင့် ပေ (၅၀)အကွာရှိ ကြက်ခြံအဖြစ်အသုံးပြုသည့်အဆောက်အဦတွင် ကြိုးဆွဲချသေဆုံးနေသည့် သမီးဖြစ်သူကို တွေ့ခဲ့ရခြင်းဖြစ်ကြောင်း သိရသည်။

မိခင်ဖြစ်သူက မသက်ငုံဖူးအား ပွေ့ချီလိုက်စဉ် ပါးစပ်မှအသံမြည်လာသဖြင့် အဖိုးဖြစ်သူ၏အကူအညီဖြင့် ကြိုးဖြုတ်ချပြီး အသက်ရှုသွင်းစေရန် ရှေးဦးသူနာပြုစုခြင်းကို လုပ်ဆောင်ကာ ကျိုင်းတုံပြည်သူ့ဆေးရုံသို့ ပို့ဆောင်ခဲ့ရာ ရဲတပ်ဖွဲ့က နေ့လယ် (၁၂)နာရီ (၄၅)မိနစ်အချိန်တွင် သတင်းရရှိသဖြင့် ဆေးရုံသို့ လာရောက်စစ်ဆေးခဲ့ခြင်းဖြစ်ကြောင်း သိရသည်။

သေဆုံးရသည့်အကြောင်းရင်းကိုသိရှိရန် အလောင်းအား စစ်ဆေးနေပြီး ကျိုင်းတုံမြို့မရဲစခန်းတွင် သေမှုသေခင်းအမှတ်စဉ် ၁၅/၂၀၁၉ ဖြင့် အမှုဖွင့်ထားကြောင်း သိရသည်။

သတင်း #ငြိမ်းချမ်း(ပြည်)