( ၇) ကြိမ်မြောက် ကယားတစ်မျိုးသားလုံးဆိုင်ရာ စုပေါင်းအဲ့ဒိုပေါ်မီပွဲတော်အား အောက်တိုဘာလ(၃) ရက်နေ့မှစ၍ ကျင်းပခဲ့ခြင်းဖြစ်ပြီး အားကစားပြိုင်ပွဲများ၊ ဖက်ရှင်ရှိုးပြိုင်ပွဲများ၊ တေးဂီတဖျော်ဖြေပွဲများပါ ထည့်သွင်းထားပြီး  ပွဲတော်နေ့ရက်ကြီးအခမ်းအနားကို  ရိုးရာကြက်ရိုးထိုးကာ ရွေးချယ်ထားသည့် အောက်တိုဘာလ (၅)ရက်နေ့တွင်ကျင်းပခြင်း ဖြစ်သည်။

ရိုးရာအဲ့ဒိုပေါ်မီပွဲတော်တွင် ကရင်နီအလံတော်အား စုပေါင်းအလေးပြုခြင်း၊ ကယားရိုးရာ အဲ့ဒိုပေါ်မီနှင့်သက်ဆိုင်သော တေးကဗျာရွတ်ဖက်ခြင်း၊  သက်ဆိုင်ရာခေါင်းဆောင်အသီးသီးမှ အမှာစကားများပြောကြားခြင်း ၊ ဂုဏ်ပြုမှတ်တမ်းလွှာများပေးအပ်ခြင်းနှင့် အဲ့ဒိုပေါ်မီအကအား တက်ရောက်လာသူများ စုပေါင်းပါဝင်ကခုန်ခြင်းများ ပြုလုပ်ခဲ့ကြသည်။

ပွဲတော်တွင်လာရောက်ကြသူများအား အဲ့ဒိုပေါ်မီပွဲတော်၏ အမှတ်လက္ခဏာဖြစ်သည့်  ဒီးကူနှင့် ခေါင်ရည်များအားကျွေးမွေးဧည့်ခံခြင်းအပြင်  ထမင်း၊ဟင်းများ၊ ရိုးရာအစားအစာများအား တည်ခင်းဧည့်ခံကျွေးမွေးခဲ့ကြပြီး ကျေးရွာအလိုက် လာရောက်ကြသူများကလည်း အဲ့ဒိုပေါ်မီအကများဖြင့် ကျေးရွာတွင်း လှည့်လည်ကပြ ခဲ့ကြသည်။

ကယားရိုးရာ အဲ့ဒိုပေါ်မီပွဲတော် နှစ်စဉ်ကျင်းပရခြင်းရည်ရွယ်ချက်မှာ လယ်ယာတွင်စိုက်ပျိုးထားသည့်  သီးနှံများ ဖြစ်ထွန်းရေး၊ ဒေသတွင်း ရောဂါဘယကင်းဝေးရေးတို့အတွက် ရိုးရာပူဇော်ပသပြီး မကောင်းဆိုးဝါးများကို ကျေးရွာတွင်းမှ နှင်ထုတ်ကြခြင်းဖြစ်သည်။

အဆိုပါ အခမ်းအနားသို့ ရှမ်းပြည်နယ် အစိုးရအဖွဲ့ဝင်များ၊ ကယားပြည်နယ် လွှတ်တော်ဥက္ကဌ ၊ ဗမာနှင့်ကယန်း တိုင်းရင်းသားရေးရာဝန်ကြီးများ ၊လွှတ်တော်ကိုယ်စားလှယ်များ၊ ဘာသာရေးခေါင်းဆောင်များ၊KNPP မှ ကိုယ်စားလှယ်များ၊ နိုင်ငံရေးပါတီများ ၊ ဒေသအသီးသီးမှ တိုင်းရင်းသားများနှင့် လာရောက်လည်ပတ်သည့် ဧည့်သည်များ  တက်ရောက်ခဲ့ကြသည်။

သတင်း၊ဓါတ်ပုံ #ဆန်းဖြိုးထွန်း