ရှမ်းပြည်နယ်(မြောက်ပိုင်း) ကျောက်မဲမြို့နယ် နောင်ပိန်ကျေးရွာမှ NLD ရပ်ကျေးအဖွဲ့ဝင် အသက် ( ၆၀ ) ဝန်းကျင် အမျိုးသားတစ်ဦးကို အာဏာသိမ်းအဖွဲ့၏စစ်တပ်က ၂၀၂၂ ခုနှစ် ဇန်နဝါရီ( ၁၉ ) ရက် ညနေပိုင်းတွင် လာရောက်ဖမ်းဆီးပြီး ဦးခေါင်းကို အဝတ်ဖြင့်စွပ်၍ ခေါ်သွားကြောင်း သိရသည်။
ရွာကလူတွေက လေးတူး/ ကိုတူးလို့ခေါ်ကြတာ များတယ်။ နာမည်အရင်းက ဦးကျော်လွင်။ သူ့ကို စစ်မေးစရာရှိတယ်ဆိုပြီး နောင်ပိန်ရွာက နေအိမ်မှာ လာဖမ်းသွားတာ။ လာဖမ်းတော့ ခေါင်းကိုအဝတ်နဲ့စွပ်ပြီး ဖမ်းသွားတာ
ဟု တွေ့မြင်လိုက်သူ တစ်ဦးက Tachileik News Agency သို့ ပြောသည်။
ဦီးကျော်လွင်၏ နောင်ပိန်ကျေးရွာမှ နေအိမ်တွင် ရှိနေစဉ် ယနေ့ ညနေ ၅ နာရီ ၁၅ မိနစ်ခန့်တွင် အာဏာသိမ်းစစ်ကောင်စီ၏ တပ်သားများက အိမ်စီးကားသုံးစီးဖြင့် ရောက်လာကာ ဖမ်းဆီးသွားကြခြင်းဖြစ်ကြောင်း သိရသည်။
အာဏာသိမ်းစစ်ကောင်စီသည် ကျောက်မဲမြို့နယ်အတွင်းမှ NLD ရပ်/ကျေး ပါတီဝင်များကို လိုက်လံဖမ်းစီးမည်ဟု သတင်းများ ထွက်ပေါ်နေသည့်အပြင် CDM ဝန်ထမ်းများအား ကူညီသူများ၊ စစ်အာဏာရှင်တော်လှန်ရေးအား ပံ့ပိုးသူများကိုလည်း ရှာဖွေနေသည်ဟု သတင်းများထွက်နေခြင်းဖြစ်သည်။
အာဏာသိမ်းအဖွဲ့သည် ဖေဖေါ်ဝါရီလ (၁) ရက်နေ့ အာဏာသိမ်းသည့်နေ့ကတည်းကစ၍ NLD ပါတီဝင်များအား တောက်လျှောက်ဖမ်းဆီးနေသည့်အပြင် အာဏာသိမ်းမှုလက်မခံသူများနှင့် ၎င်းတို့အား ဆန့်ကျင်သည်ဟု ယူဆသူမှန်သမျှကို အကြမ်းဖက်ဖမ်းဆီးခြင်းများကို တောက်လျှောက်လုပ်နေခြင်းဖြစ်သည်။
