တာချီလိတ်မြို့မှ မဲဆန္ဒရှင်များ ဆန္ဒမဲပေးနိုင်ရန်အတွက် ရပ်ကွက်/ကျေးရွာအုပ်ချုပ်ရေးမှူးရုံးတို့တွင် မဲဆန္ဒရှင်သက်သေခံလက်မှတ်များ သွားရောက် ထုတ်ယူရန် လိုအပ်

ရှမ်းပြည်နယ်(အရှေ့ပိုင်း) တာချီလိတ်မြို့နယ်အတွင်းမှ မဲဆန္ဒရှင်များအနေဖြင့် voter slip (မဲဆန္ဒရှင်သက်သေခံလက်မှတ်)များကို သက်ဆိုင်ရာ ရပ်ကွက်၊ ကျေးရွာအုပ်ချုပ်ရေးမှူးရုံးများ၌ ၂၀၂၀ ခုနှစ်၊ နိုဝင်ဘာလ (၈)ရက်နေ့အထိ ထုတ်ပေးမည်ဖြစ်ကြောင်း သိရသည်။

"voter slip တွေကို ထုတ်ပေးနေပါပြီ။ စောစောထုတ်ပေးထားရင် ဒီစလစ်လေးတွေကို သိမ်းမထားနိုင်ဘဲ ပျောက်သွားတာမျိုးတွေ မဖြစ်အောင် နီးမှထုတ်ပေးနေတာပါ။ ရပ်ကွက်၊ ကျေးရွာအားလုံးမှာ ထုတ်လို့ရပါပြီ။ မဲသွားမပေးခင် ကိုယ့်ရပ်ကွက်ရုံးမှာ ကြိုတင်ပြီး ယူထားကြလို့ရပါပြီ။"ဟု တာချီလိတ်မြို့နယ် ရွေးကောက်ပွဲကော်မရှင်အဖွဲ့ခွဲဥက္ကဌ ဦးအောင်မင်းက တာချီလိတ်သတင်းအေဂျင်စီသို့ ပြောသည်။

ရွေးကောက်ပွဲ ဆန္ဒမဲထည့်ရမည့် နေ့ဖြစ်သည့် ၂၀၂၀ ခုနှစ်၊ နိုဝင်ဘာလ (၈)ရက်နေ့တွင် မဲဆန္ဒရှင်အနေဖြင့် မဲဆန္ဒရှင် သက်သေခံလက်မှတ်နှင့် နိုင်ငံသားစိစစ်ရေးကတ် (သို့မဟုတ်) ယာယီသက်သေခံလက်မှတ် ယူဆောင်သွားရန်လိုအပ်မည် ဖြစ်သည်။

"မဲဆန္ဒရှင် သက်သေခံလက်မှတ်က မဲလာထည့်တဲ့အခါ မဲစာရင်းနံပါတ်ပြန်ရှာရလွယ်အောင်လို့ ထုတ်ပေးထားတာပါ။ သူတို့မှတ်ပုံတင်နံပါတ်နဲ့ ရှာပေးနေရမယ်ဆိုရင် အချိန်ပိုကြာမှာဖြစ်လို့ မဲဆန္ဒရှင်သက်သေခံလက်မှတ် ထုတ်ပေးထားတာပါ။ နိုင်ငံသားစိစစ်ရေးကတ်ရော မဲဆန္ဒရှင်သက်သေခံကတ်ပါ ယူလာကြဖို့ ကျွန်တော်တို့ မှာထားပါတယ်"ဟု မိုင်းဖုန်း(က)ကျေးရွာအုပ်စု ကော်ရှင်အဖွဲ့ခွဲမှ ဦးရဲမြင့်ဦးက ပြောသည်။

၂၀၂၀ ပြည့်နှစ် ပါတီစုံဒီမိုကရေစီအထွေထွေရွေးကောက်ပွဲအတွက် တာချီလိတ်မြို့နယ်အတွင်း မဲရုံပေါင်း (၇၀)ရှိပြီး မဲဆန္ဒရှင်ဦးရေမှာ ဒုတိယအကြိမ်ထုတ်ပြန်ပြီးသည်အထိ (၁၂၉,၇၈၃) ဦးရှိခြင်းဖြစ်သည်။