တစ်နိုင်ငံလုံးမှ ပြည်သူလူထုနှင့်ထပ်တူ ငြိမ်းချမ်းရေးလိုလား၍ နိုင်ငံရေးနည်းလမ်းဖြင့် ဆောင်ရွက်နေဟု RCSS ဆို
တစ်နိုင်ငံလုံးမှ ပြည်သူလူထုနှင့်ထပ်တူ ငြိမ်းချမ်းရေးလိုလား၍ အပစ်အခတ်ရပ်စဲပြီး ငြိမ်းချမ်းရေးဆွေးနွေးကာ နိုင်ငံရေးနည်းလမ်းဖြင့် ပြဿနာဖြေရှင်းနေခြင်းဖြစ်သည်ဟု နေပြည်တော်တွင် ကျင်းပမည့် (၈) ကြိမ်မြောက် JICM တက်ရောက်မည့် RCSS အဖွဲ့က ပြောကြားလိုက်သည်။
"ကျွန်တော်တို့ နိုင်ငံထဲက ပြည်သူလူထုတွေ လိုလားနေတဲ့ ငြိမ်းချမ်းရေး၊ စည်းလုံးညီညွှတ်ရေးတွေကို ကျွန်တော်တို့လည်း လိုလားတယ်။ ဒါကြောင့်မို့လို့ အပစ်အခတ်ရပ်စဲပြီးတော့ သဘောတူညီချက်တွေကို လက်မှတ်ရေးထိုးပြီးတော့ နိုင်ငံရေးနည်းလမ်းတွေနဲ့ အေးချမ်းစွာဖြေရှင်းဖို့ ကျွန်တော်တို့ ကြိုးစားခြင်း ဖြစ်ပါတယ်"
ဟု ရှမ်းပြည်ပြန်လည်ထူထောင်ရေးကောင်စီ (RCSS/SSA) မှ ဒုတိယဗိုလ်မှူးကြီး စိုင်းမိဏ်းက တာချီလိတ်သတင်းအေဂျင်စီသို့ ၂၀၂၀ ခုနှစ်၊ ဇန်နဝါရီလ (၆)ရက်နေ့ နေ့လယ်ပိုင်း၌ ပြောသည်။
နေပြည်တော်တွင် ဇန်နဝါရီလ (၈)ရက်နေ့၌ ကျင်းပမည့် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ် အကောင်အထည်ဖော်မှုဆိုင်ရာ ညှိနှိုင်းအစည်းအဝေး JICM တက်ရောက်ရန် RCSS ကိုယ်စားလှယ်အဖွဲ့သည် ၂၀၂၀ ခုနှစ်၊ ဇန်နဝါရီလ (၆)ရက်နေ့ နေ့လယ်ပိုင်း၌ တာချီလိတ်လေဆိပ်မှနေ၍ သီးသန့်လေယာဉ်ဖြင့် နေပြည်တော်သို့ သွားရောက်ခဲ့ခြင်းဖြစ်သည်။
JICM အစည်းအဝေးများကို တစ်နှစ်ကျော်သည်အထိ ကျင်းပနိုင်ခဲ့ခြင်းမရှိဘဲ ဖြစ်နေရာမှ (၈) ကြိမ်မြောက် JICM အစည်းအဝေး ကျင်းပနိုင်ရေးအတွက် အစိုးရနှင့် NCA လက်မှတ်ရေးထိုးထားသည့် တိုင်းရင်းသား လက်နက်ကိုင် အဖွဲ့အစည်း (NCA-S EAOs) တို့ ၂၀၁၉ ခုနှစ်၊ ဒီဇင်ဘာလ (၂၂)ရက်နေ့ နံနက် (၁၀) နာရီက ရန်ကုန်မြို့၊ ရွှေလီလမ်းရှိ အမျိုးသားပြန်လည် သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) ၌ အကြိုညှိနှိုင်းအစည်းအဝေးအတွင်း သဘောတူညီမှုရခဲ့ကြခြင်းဖြစ်သည်။
တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် အကောင်အထည်ဖော်မှုဆိုင်ရာ ညှိနှိုင်းအစည်းအဝေး (JICM)၏ ( ၇ ) ကြိမ်မြောက်ကို ၂၀၁၈ ခုနှစ် ဖေဖေါ်ဝါရီလ (၂၈) ရက်၊ ( ၆ ) ကြိမ်မြောက်ကို ၂၀၁၇ ခုနှစ် နိုဝင်ဘာလ (၂၇) ရက်၊( ၅ ) ကြိမ်မြောက်ကို ၂၀၁၇ ခုနှစ် ဧပြီလ (၂၄) ရက်၊( ၄ ) ကြိမ်မြောက်ကို ၂၀၁၆ ခုနှစ် သြဂုတ်လ (၂၄) ရက်၊ ( ၃ ) ကြိမ်မြောက်ကို ၂၀၁၅ ခုနှစ် ဒီဇင်ဘာလ (၁၆) ရက်၊( ၂ ) ကြိမ်မြောက်ကို ၂၀၁၅ ခုနှစ် နိုဝင်ဘာလ(၁၇)ရက်နှင့် (၁၈) ရက်၊ ပထမအကြိမ်ကို ၂၀၁၅ ခုနှစ် အောက်တိုဘာလ (၁၅)ရက်မှ (၁၇) ရက်နေ့အထိ ကျင်းပခဲ့ခြင်းဖြစ်သည်။
တစ်နိုင်ငံလုံးအပစ်အခတ်ရပ်စဲရေးစာချုပ် (NCA)ကို တိုင်းရင်းသားလက်နက်ကိုင်အဖွဲ့ (၁၀)ဖွဲ့က လက်မှတ်ရေးထိုးထားပြီး NCA လက်မှတ်ရေးထိုးခြင်းမရှိသေးသည့်အဖွဲ့များလည်း ရှိနေခြင်းဖြစ်သည်။
Tachileik News Agency
သတင်း - ဟန်စိုးထိုက်
