~~~~~~~~⊰❂ Unicode Version ❂⊱~~~~~~~~

လင်းခေးခရိုင် မောက်မယ်မြို့တွင် နမ့်ယွန်းချောင်းရေကျော်သည့် တံတားမှာ အသုံးမပြုတော့သည့် တံတားဖြစ်၍ လမ်းပန်းဆက်သွယ်ရေး ပြတ်တောက်ခြင်းမရှိ
***************
ရှမ်းပြည်နယ် (တောင်ပိုင်း) လင်းခေးခရိုင်၊ မောက်မယ်မြို့တွင် ၂၀၁၉ ခုနှစ်၊ စက်တင်ဘာလ (၁)ရက်နေ့က နမ့်ယွန်းချောင်းရေကျော်သွားသည့် ရပ်ကွက်ချင်းဆက်တံတားမှာ ယခင်ကတည်းက အသုံးပြု၍မရတော့သည့် ယိုယွင်းပျက်စီးနေသည့် တံတားဖြစ်သဖြင့် လမ်းပန်းဆက်သွယ်ရေး ပြတ်တောက်သွားခြင်း မရှိကြောင်း သိရသည်။

မောက်မယ်မြို့၊ မွေတော်ရပ်ကွက်နှင့် မိုက်ဟုန်းရပ်ကွက်တို့ ဆက်သွယ်ထားသည့် ပျက်စီးယိုယွင်းနေသည့် ရပ်ကွက်ချင်းဆက် တံတားပေါ်သို့ နမ့်ယွန်းချောင်းရေမြင့်တက်သွားခြင်းဖြစ်ပြီး လက်ရှိအသုံးပြုနေသည့် တံတား (၃)စင်းမှာ ရေလွှမ်းမိုးခံရခြင်းမရှိကြောင်း သိရသည်။

“အဲဒီနေ့က မိုးရွာပြီး ချောင်းရေတက်တယ်။ ဒါကြောင့် ကျွန်တော်တို့ မြို့နယ်စီခန့်အဖွဲ့က ရပ်ကွက်တွေမှာ ကွင်းဆင်းကြည့်ပြီး ထမင်းထုပ်ဝေတယ်။ လိုအပ်ရင် ရွှေ့ပြောင်းပေးဖို့ပေါ့။ ညနေ (၄)နာရီမှာ ရေပြန်ကျ သွားတယ်။ ရေတက်တဲ့အချိန်က မိုက်ဟုန်းနဲ့ မွေတော်ဆက်သွယ်ထားတဲ့ လွန်ခဲ့တဲ့ ၁၅ နှစ်က ရပ်ကွက် ကိုယ်ထူကိုယ်ထ ဆောက်ထားတဲ့ ပျက်နေတဲ့တံတားက ဖြတ်လို့မရတော့ဘူး။ ဒါပေမဲ့ နမ့်ယွန်းချောင်း တံတားကို ဖြတ်တဲ့ တံတား (၃)စင်းရှိတယ်။ အဲဒီ တံတားတွေကပဲ ဖြတ်သန်းနေကြတာမို့ မောက်မယ်က လမ်းပန်းဆက်သွယ်ရေး မပြတ်တောက်ပါဘူး”ဟု မောက်မယ်မြို့နယ် အုပ်ချုပ်ရေးမှူး ဦးဟန်သူရက တာချီလိတ်သတင်းအေဂျင်စီသို့ ပြောသည်။

အဆိုပါ ချောင်းရေကျော်သွားသည့်တံတားမှာ ပျက်စီးယိုယွင်းနေသည့် ကားကြီး၊ ကားငယ်များ ဖြတ်သန်းသွားလာခြင်းမပြုရန် မြို့နယ်လမ်းဦးစီးဌာနက ကာကွယ်တိုင်ကွန်ကရစ်တုံးများဖြင့် ကာရံထားရသည့် တံတားတစ်စင်းဖြစ်ကြောင်း သိရသည်။

မောက်မယ်မြို့တွင် နမ့်ယွန်းချောင်းဖြတ်တံတားများအဖြစ် ကျေးလက်လမ်းဦးစီးဌာနပိုင် ပေ(၂၄၀) အရှည်ရှိသည့် စဉ့်ဝင်တံတား၊ လမ်းဦးစီးဌာနပိုင် ပေ (၂၃၀)အရှည်ရှိသည့် ကျောင်းခုံးတံတားနှင့် ပေ(၂၀၀)အရှည်ရှိသည့် တောင်မြို့ - ဆီဆုံတံတားတို့မှသာ ဖြတ်သန်းသွားလာနေကြသဖြင့် မိုက်ဟုန်း - မွေတော်ရပ်ကွက်ချင်းဆက်တံတား ရေကျော်သဖြင့် မောက်မယ်မြို့တွင် လမ်းပန်းဆက်သွယ်ရေး ပြတ်တောက်ခြင်းမရှိကြောင်း သိရသည်။

မိုက်ဟုန်း - မွေတော် ရပ်ကွက်ချင်းဆက်တံတားမှာ ယိုယွင်းနေသည့် တံတားတစ်စီးဖြစ်၍ ရေလမ်းကြောင်း ပိတ်ဆို့မှု မဖြစ်စေရေးအတွက် မြို့နယ်စီမံခန့်ခွဲမှုကော်မတီ၊ လွှတ်တော်ကိုယ်စားလှယ်များ၊ မြို့မိမြို့ဖများနှင့် ဒေသခံပြည်သူများ ညှိနှိုင်းဆောင်ရွက်သွားကြမည်ဖြစ်ကြောင်း သိရသည်။

Tachileik News Agency
ဓါတ်ပုံ - မြို့နယ်ထွေအုပ်