~~~~~~~~⊰❂ unicode ❂⊱~~~~~~~~
*************
ရှမ်းပြည်နယ်(အရှေ့ပိုင်း) ကျိုင်းတုံမြို့ ကွန်ပျူတာတက္ကသိုလ် ကျောင်းသားများသမဂ္ဂ၏ ပထမဆုံးအကြိမ် ရွေးကောက်ပွဲကို ၂၀၁၈ ခုနှစ်၊ ဇူလိုင်လ(၂၃)ရက်နေ့က ကျင်းပကြောင်း သိရသည်။
အဆိုပါ ရွေးကောက်ပွဲတွင် သမဂ္ဂ၏ အမှုဆောင်အဖွဲ့ ဥက္ကဌ၊ ဒုတိယဥက္ကဌနှင့် အထွေထွေအတွင်းရေးမှူး (၃)နေရာအတွက် သမဂ္ဂအဖွဲ့ဝင် (၁၀)ဦး ဝင်ရောက်အရွေးချယ်ခံခဲ့ရာ ဥက္ကဌအဖြစ် ကိုကောင်းမြတ်စံ၊ ဒုတိယ ဥက္ကဌအဖြစ် ကိုရဲရင့်မင်းသွင်နှင့် အထွေထွေအတွင်းရေးမှူးအဖြစ် မဖြိုးမဒီငြိမ်းချမ်းတို့ အရွေးချယ်ခံခဲ့ရကြောင်း သိရသည်။
"ရွေးကောက်ပွဲကို ကျွန်တော်တို့က မနက်(၉)နာရီကနေ (၁၂)နာရီအထိ သတ်မှတ်ပြီး ကျင်းပခဲ့တာဖြစ်ပါတယ်။ ဒီရွေးကောက်ပွဲ မလုပ်ခင်မှာလည်း ကိုယ်စားလှယ်လောင်း အမည်စာရင်းတင်သွင်းတာနဲ့ မဲဆွယ်စည်းရုံးရေး ကာလတွေ သတ်မှတ်ပေးပြီး ဆောင်ရွက်ခဲ့တာဖြစ်ပါတယ်။ ဒီနေ့မှာ မဲပေးခွင့်ရှိသူ (၁၂၂)ဦးမှာ (၁၁၆)ဦး မဲလာပေးပါတယ်။ အဲဒီအထဲမှာမှ ပယ်မဲက (၈)မဲရှိခဲ့ပါတယ်"ဟု ရွေးကောက်ပွဲကော်မရှင် ဥက္ကဌ ဦးယုမောင်က တာချီလိတ်သတင်းအေဂျင်စီသို့ ပြောသည်။
ရွေးကောက်ပွဲတွင် အထွေထွေအတွင်းရေးမှူးနေရာဝင်ရောက်ယှဉ်ပြိုင်သည့် မဖြိုးမဒီငြိမ်းချမ်းက (၇၅)မဲ၊ မသက်ဖူးဝေက (၂၉)မဲနှင့် စိုင်းလျဲန်းစံက (၁၁)မဲ၊ ဒုတိယဥက္ကဌ နေရာအတွက် ကိုရဲရင့်မင်းသွင်က (၃၂)မဲ၊ စိုင်းရှဲန်ဟိန်းက (၃၀)မဲ၊ မဖြိုးဖြိုးသော်က (၂၁)မဲ၊ ကိုနဒီဦးက (၁၈)မဲနှင့် မရွှေယမှုံဇင်က (၁၂)မဲ၊ ဥက္ကဌနေရာအတွက် ကိုကောင်းမြတ်စံက (၁၁၀)မဲနှင့် ကိုဟန်သူထိုက်က (၅)မဲ ရရှိခဲ့ကြခြင်းဖြစ်ကြောင်း သိရသည်။
ကျိုင်းတုံ ကွန်ပျူတာတက္ကသိုလ် ကျောင်းသားများသမဂ္ဂအနေဖြင့် အခြားတက္ကသိုလ်များက ကျောင်းသားသမဂ္ဂများ ဖွဲ့စည်းလိုလျှင် ကူညီသွားမည်ဖြစ်ပြီး သမဂ္ဂအချင်းချင်း ပူးပေါင်းဆောင်ရွက်ခြင်းများလည်း လုပ်ဆောင်သွားမည်ဖြစ်ကြောင်း သိရသည်။
ကွန်ပျူတာတက္ကသိုလ် (ကျိုင်းတုံ) ကျောင်းသားများသမဂ္ဂကို ၂၀၁၈ ခုနှစ်၊ ဇွန်လ(၁၅)ရက်နေ့တွင် စတင်ဖွဲ့စည်းခဲ့ခြင်း ဖြစ်ပြီး ကျိုင်းတုံမြို့တွင် ပထမဆုံး ကျောင်းသားသမဂ္ဂဖြစ်သည်။
သတင်း #ဇွဲမြတ်
ဓါတ်ပုံ #ပြည့်ဖြိုးအောင်
~~~~~~~~~~~~~~~~~~ ေၾကာ္ျငာ ~~~~~~~~~~~~~~~~~~~~
