စစ်ကိုင်းတိုင်း ကလေးဝမြို့နယ် စခန်းကြီးရွာအနီးတွင် ၂၀၂၃ခုနှစ် ဇွန်လ(၁၆)ရက်နေ့ မနေ့က ဖြစ်ပွားခဲ့သည့် တိုက်ပွဲအတွင်း စစ်ကောင်စီတပ်ထံမှ လက်နက်ခဲယမ်းများ သိမ်းဆည်း ရရှိခဲ့ကြောင်း NUG ကာကွယ်ရေးဝန်ကြီးဌာနက ယနေ့ ဇွန်လ(၁၇)ရက်နေ့တွင် သတင်းထုတ်ပြန်သည်။



ကလေးဝမြို့မှ တစ်ဆင့် မင်းကင်းမြို့နယ်သို့ ယာကြီးလမ်းအတိုင်း လူ၊ လက်နက်နှင့် ရိက္ခာများပို့ရန် Fawကား (၃)စီးအပါအဝင် ခမရ -၃၆၂ (ကျီကုန်းအခြေစိုက်) ရဲနှင့် ပျုစောထီးအင်အား (၁၃၀)ဦးခန့်ဖြင့် လာသော စစ်ကြောင်းကို ပြည်သူ့ကာကွယ်ရေးတပ်မတော် (PDF) (ကလေးခရိုင်) အမှတ်(၉)တပ်ရင်းက ကြားဖြတ် တိုက်ခိုက်ခဲ့ခြင်းဖြစ်ကြောင်း သိရသည်။



တိုက်ပွဲအတွင်း Fawကား(၂)စီး မီးရှို့ဖျက်ဆီးနိုင်ခဲ့ပြီး MA-(11) (၂)လက်၊ G-3 (၂)လက်၊ MA-11 ကျည်ဘောက် (၃)ခု၊ G-3ကျည်ဘောက် (၆)ခု၊ MG(3) ငါးကြင်းမြှီး (၁)လက်၊ MA-7 60 MM တာဝေးစိန်ပြောင်း (၁)လက်၊ 60 MM ဗုံးသီးများ၊ RPG ထိပ်ဖူး(၅)လုံး၊ အီနာဂါ ဗုံးသီး(၅)လုံး၊ .38 Webly Wesson (၆)လုံးပြူး (၁)လက်၊ Jammer (၁)လုံး၊ M-14 နင်းမိုင်း (၂)လုံး၊ လက်ပစ်ဗုံး အလုံး (၃၀)ကျော်၊ ကျည်ဆံများနှင့် တခြားဆက်စပ်ပစ္စည်းများ သိမ်းဆည်းရရှိခဲ့သည်ဟု သိရသည်။



တိုက်ပွဲအတွင်း စစ်ကောင်စီတပ်သား သေဆုံးမှုကို စိစစ်ဆဲဖြစ်ပြီး ပြည်သူ့ကာကွယ်ရေးတပ်ဘက်က အထိအခိုက်မရှိ ဆုတ်ခွာနိုင်ခဲ့ကြောင်း သတင်းထုတ်ပြန်ထားသည်။



#TachileikNewsAgency

Photo : Ministry of Defence- National Unity Government of Myanmar