ချင်းပြည်နယ်၊ ပလက်ဝမြို့နယ်နှင့် အိန္ဒိယနယ်စပ်ရှိ အာဏာသိမ်းစစ်ကောင်စီ၏ တပ်စခန်းအပါအဝင် ရက္ခိုင့်တပ်တော်(AA)က ပိတ်ဆို့ထားသည့် တပ်စခန်းများနှင့် ရိက္ခာလမ်းကြောင်းများပြန်ပွင့်ရန် စစ်ကောင်စီတပ်က မြေပြင်၊ ဝေဟင်ပူးပေါင်းထိုးစစ်ဖြင့် နေ့စဉ်တိုက်ခိုက်နေသည်မှာ တစ်လနီးပါးကြာမြင့်နေပြီဖြစ်ကြောင်း ၂၀၂၂ ခုနှစ် စက်တင်ဘာလ (၁၈) ရက်နေ့တွင် AA က သတင်းထုတ်ပြန်ထားသည်။

AA က ပလက်ဝမြို့နယ်အတွင်းရှိ  စစ်ကောင်စီတပ်၏ အထိုင်ချတပ်စခန်းအချိုနှင့် ၎င်းတို့၏ လှုပ်ရှားစစ်ကြောင်းအချို့ကို ဖြတ်တောက်ပိတ်ဆို့ဝန်းရံထားသည့်အပြင် လှုပ်ရှားစစ်ကြောင်းများ၏ ရိက္ခာထောက်ပို့၊ ဒဏ်ရာရလူနာသယ်ယူပို့ဆောင်ရေးလမ်းကြောင်းများကိုပါ ပိတ်ဆို့ထားခြင်းဖြစ်ကြောင်း သိရသည်။

လက်ရှိတွင် AA သည် ရက္ခိုင်-ဘင်္ဂလားနယ်စပ်ရှိ စစ်ကောင်စီတပ်၏  မိုင်တိုင်အမှတ် (၄၀)စခန်း၊ ခမရ(၃၅၂)တပ်ရင်း စခန်းကုန်းနှင့်  သံတောင်ဗျူဟာစခန်းကုန်းတို့ကို လနှင့်ချီ၍ ပိတ်ဆို့ဝန်းရံထားပြီးနောက် တပ်စခန်းများကို သိမ်းပိုက်ထားပြီးဖြစ်သည်။

လက်ရှိတွင်လည်း အိန္ဒိယ-ဘင်္ဂလားဒေ့ရှ်-မြန်မာ” သုံးနိုင်ငံနယ်စပ်အနီးရှိ"မြိတ်ဝစခန်း" အပါအဝင် စစ်ကောင်စီတပ်၏ နောက်ထပ်တပ်စခန်းအချို့ကိုလည်း ဖြတ်တောက်ပိတ်ဆို့ထားကာ စစ်ကောင်စီတပ်ကလည်း လက်နက်ကြီး၊ လေကြောင်းပစ်ခတ်မှုများဖြင့် လနှင့်ချီ၍ ပြန်လည်တိုက်ခိုက်နေသော်လည်း ပိတ်ဆို့ထားနိုင်ဆဲဖြစ်ကြောင်း သိရသည်။