~~~~~~~~⊰❂ unicode ❂⊱~~~~~~~~

မန္တလေးတိုင်းဒေသကြီး ဝမ်းတွင်းမြို့တွင် ဆိုင်ကယ်အားနောက်မှဝင်တိုက်၍ လူသေဆုံးမှုဖြစ်သွားသဖြင့် စာရင်းစစ်ဦးစီးမှူး အမျိုးသမီးအား အမှုဖွင့်လှစ်အရေးယူထားကြောင်း သိရသည်။

“မောင်းလာတဲ့ အရှိန်ကတော့ သိပ်မများဘူး။ ရှေ့ကသွားနေတဲ့ ဆိုင်ကယ်ကို ဝင်တိုက်လိုက်တာ ကတ္တရာလမ်းပေါ် ခေါင်းနဲ့ကျတယ်။ ဦးထုပ်မပါတော့ အသက်ဆုံးပါးတဲ့အထိ ဖြစ်သွားတယ်။ မြစ်သားမြို့နယ် စာရင်းစစ်ဦးစီးမှူးပါ။ ရုံးပိတ်ရက်မို့ပြန်လာပြီး အပြင်ခဏထွက်တာထင်ပါတယ်”ဟု ယာဉ်တိုက်မှုဖြစ်ပွားရာ အနီးရောက်နေသည့် ဒေသခံတစ်ဦးက ပြောသည်။

အောက်တိုဘာလ (၂၉) ရက်က မျိုးဇော်အောင် စီးနင်းလာသည့် ဆိုင်ကယ်အား ဒေါ်လဲ့လဲ့အေး၏ ဆိုင်ကယ်က အနောက်မှဝင်တိုက်မိခြင်းဖြစ်ပြီး အဆိုပါယာဉ်တိုက်မှုကြောင့် ရရှိသည့် ဒဏ်ရာဖြင့် မျိုးဇော်အောင်အား မန္တလေးပြည်သူ့ဆေးရုံသို့ ကုသမှုခံယူရန် ပို့ဆောင်စဉ် လမ်းတွင်သေဆုံးသွားကြောင်း သိရသည်။

အဆိုပါ ယာဉ်တိုက်မှုနှင့်ပတ်သက်၍ ဒေါ်လဲ့လဲ့အေးအား ဝမ်းတွင်းမြို့မရဲစခန်းတွင် ယာဉ်(ပ)၂၅/၂၀၁၆ ယာဉ်မဆင်မခြင်မောင်းနှင်ပြီး မိမိနဲ့တခြားသူအား ပြင်းထန်ဒဏ်ရာရရှိစေမှုပုဒ်မ (၃၃၈) ဖြင့် အမှုဖွင့်ဆောင်ရွက်နေရာမှ သေဆုံးစေမှုပုဒ်မ ၃၀၄(က)သို့ ပြောင်းလဲဖွင့်လှစ်လိုက်ကြောင်း သိရသည်။

သတင်း - ကိုလင်း