ကျောက်မဲခရိုင်အတွင်း မဲဆန္ဒရှင်စာရင်း ပြီးခဲ့သည့် ရွေးကောက်ပွဲ ကာလထက် (၅)သောင်းတိုး 

ရှမ်းပြည်နယ်(မြောက်ပိုင်း) ကျောက်မဲခရိုင်တွင် ၂၀၁၅ ခုနှစ် အထွေထွေရွေးကောက်ပွဲက မဲဆန္ဒရှင် (၃၅၀,၀၀၀)  ကျော်ရှိခဲ့သည့်အနက် ၂၀၂၀ ခုနှစ်ရွေးကောက်ပွဲ မဲဆန္ဒရှင်စာရင်းတွင် (၄၀၀,၀၀၀) ကျော်အထိ တိုးလာကြောင်း မြို့နယ်ရွေးကောက်ပွဲ ကော်မရှင်အဖွဲ့ခွဲရုံး( ကျောက်မဲ )ထံမှ သိရသည်။

“အဓိက အကြောင်းအရင်းက (၂) ချက်ရှိတယ်။ တစ်ပြည်လုံးမှာက အသက် (၁၈) နှစ်ပြည့်ပြီးတဲ့ ( First Voter )တွေ (၅) သန်းကျော်ရှိတယ် ဆိုတော့ ကျောက်မဲမှာလည်း  မဲဆန္ဒရှင်အရေအတွက် တိုးလာတယ်။ 

နောက်တစ်ခုက COVID - 19 ကြောင့် ပြည်ပ/ အိမ်နီးချင်းနိုင်ငံတွေ ကနေပြန်လာသူတွေလည်းရှိတဲ့အတွက် ၂၀၂၀ အထွေထွေရွေး ကောက်ပွဲမှာ ၂၀၁၅ ထက် အရေအတွက်တိုးလာနိုင်တယ်။ ဘယ်လောက်တိုးလာတယ် ဆိုတာကကျတော့ တစ်ကယ့်အချိန်နီးကပ်လာတဲ့အခါ မဲဆန္ဒရှင်စာရင်း အတိအကျပြုစုပြီးမှသာ သိရနိုင်မယ်” ဟု မြို့နယ်အထွေထွေ ရွေးကောက် ပွဲကော်မရှင် အဖွဲ့ခွဲရုံးမှ မြို့နယ်ဥက္ကဌ ဦးစိုးထွန်း က တာချီလိတ် သတင်း အေဂျင်စီ သို့ ပြောသည်။

၂၀၂၀ ခုနှစ် အထွေထွေ ရွေးကောက် ပွဲအတွက် မဲဆန္ဒရှင် စာရင်းများ ကောက်ယူရာတွင် အိမ်ထောင်စုထဲတွင်ပါဝင်သော နာမည်များအတိုင်း ကောက်ယူခြင်းမဟုတ်ဘဲ မြေပြင်အခြေအနေတွင် လက်ရှိ တည်ရှိနေသူများအား စာရင်းကောက်ယူသည့် ( ရှိ/ကောက်) စနစ်ဖြင့် ကောက်ယူထားသည့်အတွက် Covid-19 ရောဂါကြောင့် ပြည်ပမှ ပြန်လာသူ များကိုလည်း မဲဆန္ဒရှင်စာရင်းတွင် ထည့်သွင်းကောက်ယူထားခြင်း ဖြစ်ကြောင်း သိရသည်။

“တစ်ချို့က အိမ်ထောင်စုထဲမှာ အသက် ၁၈ နှစ် ပြည့်ပြီးသားဖြစ် ပေမဲ့ မဲဆန္ဒရှင်စာရင်းကပ်ထားတဲ့ နေရာမှာ မပါတာတွေရှိတယ်။ တစ်ချို့မိသားစုတွေဆို တစ်မိသားစုလုံး စာရင်းထဲမပါတာတွေလဲရှိတယ်။ ကျွန်မတို့အိမ်ကတော့ (၁၈) နှစ်ပြည့်ပြီးသူအားလုံး မဲစာရင်းထဲပါတယ်။ နာမည်မှားတာတွေ ဘာတွေကတော့ ရပ်ကွက်ရုံးကို တစ်ခါတည်း အသိပေးခဲ့ရတယ်”ဟု မဲဆန္ဒရှင် စာရင်း ကပ်ထားကြေညာသည်ကို သွားရောက်ကြည့်ရှုခဲ့သူ မမိုးအေး က ပြောသည်။

၂၀၂၀ အထွေထွေ ရွေးကောက်ပွဲအတွက် မဲဆန္ဒရှင်စာရင်းကို  ပထမအကြိမ် မဲဆန္ဒရှင်စာရင်းကို ၂၀၂၀ ခုနှစ်၊  ဇူလိုင်လ (၂၅) ရက်နေ့မှ သြဂုတ်လ (၁၄)ရက်နေ့အထိ ကြေညာခဲ့ကြောင်း သိရသည်။