ရှမ်းပြည်နယ် (အရှေ့ပိုင်း)တာချီလိတ်ခရိုင် မိုင်းယောင်းမြို့နယ် ဝမ်ကောင်းကျေးရွာအုပ်စု၊ ဝမ်တောင်းကျေးရွာ အနီးတွင် ၂၀၂၀ ခုနှစ်၊ ဧပြီလ (၅) ရက်နေ့ ညနေ (၅) နာရီ (၁၅) မိနစ်က တောမီးမှတစ်ဆင့် ထပ်လုံစေတီကုန်းမြင့်ရှိ ဆွမ်းစားဆောင်နှစ်လုံး မီးကူးစက်လောင်ကျွမ်းသွားသည်။
မီးလောင်မှုကို စုပေါင်းငြှိမ်းသတ်ကြရာ ညနေ (၅) နာရီခွဲတွင် မီးညွှန့်ကျိုးခဲ့ပြီး ည (၇) နာရီ (၅၅) မိနစ်တွင် မီးငြိမ်းသည်။
မီးလောင်ရာသို့ မီးသတ်တပ်ဖွဲ့နှင့်တူ ပြည်နယ်လွှတ်တော်ကိုယ်စားလှယ် ဦးအိုက်ခမ်းလှိုင်၊ ယာယီနည်းဗျူဟာမှူး ဒုတိယဗိုလ်မှူးကြီးထွန်းနေဝင်း၊ မြို့နယ်အုပ်ချုပ်ရေးမှူး ဦးညီညီဝင်း၊ မြို့နယ်ရဲတပ်ဖွဲ့မှူး ရဲမှူးမျိုးမြင့်ဦး၊ မြို့နယ်မီးသတ်ဦးစီးမှူး ဦးထွန်းနေလှိုင်နှင့် ဌာနဆိုင်ရာများ၊ နယ်မြေခံတပ်မတော်သားများ၊ ရဲတပ်ဖွဲ့၊ မီးသတ်တပ်ဖွဲ့နှင့် ကြက်ခြေနီတပ်ဖွဲ့ဝင်များ၊ ရပ်မိရပ်ဖများ၊ ဒေသခံပြည်သူများနှင့် လူမှုရေးအသင်းအဖွဲ့များကဝိုင်းဝန်းငြှိမ်းသတ်ပေးကြသည်။
အဆိုပါ မီးလောင်ကျွမ်းမှုကြောင့် လူနှင့် တိရစ္ဆာန်များ ထိခိုက်ပျက်စီးဆုံးရှုံးမှု မရှိကြောင်း သိရသည်။
Tachileik News Agency
သတင်း/ဓါတ်ပုံ - စိုင်းအောင်ဇော်လင်း
