“ဂီတတို့ အနုပညာတို့ အားကစားတို့ဆိုတာ ကျွန်တော်တို့မြို့မှာ တကယ်ကို လိုအပ်နေတဲ့ ဥစ္စာပေါ့။ ကျွန်တော်တို့ မြို့တင် မဟုတ်ပါဘူး နေရာတိုင်းမှာ လိုအပ်နေတဲ့ အရာပေါ့။ လူငယ်တွေ လမ်းမှား မရောက်သွားအောင် ဂီတ အနုပညာ အားကစားဆိုတာ ရှိကို ရှိသင့်တဲ့အရာ သူတို့ရဲ့ လက်တစ်ကမ်းမှာပေါ့”ဟု Tachileik Talent Show စီစဉ်သူအဖွဲ့မှ အဆိုတော် ကိုအိုက်ထွန်းက ပြောသည်။

ပွဲစီစဉ်ကျင်းပရန် အတွက် အစိုးရပိုင်နေရာများတွင် ပြုလုပ်ရန် စီစဉ်ထားသော်လည်း အမြဲတမ်း ကျင်းပသွားနိုင်ရန် ရည်ရွယ်ထားသဖြင့် ပွဲကျင်းပခွင့်လျှောက်ထားရန်ကိစ္စ၊ လျှပ်စစ်မီးကိစ္စများရှိလာသဖြင့် လက်ရှိနေရာဖြစ်သည့် Johnny Fitness Center ရှိ ကွင်းပြင်တွင် စီစဉ်ထားရှိပြီး လျှပ်စစ်မီတာ နှင့် နေရာကိုများကို Johnny Fitness Center မှ စီစဉ်ပေးထားခြင်း ဖြစ်ကြောင်း သိရသည်။

“အဆိုတော် ကိုအိုက်ထွန်းတို့က ကလေးတွေကို ဂီတနဲ့ ပတ်သက်ပြီး မြေတောင်မြှောက်ပေးချင်တယ်လို့ ပြောလာတဲ့အချိန်မှာ ကလေးတွေ မူးယစ်ဆေးဝါးဘက်မှာ စိတ်ဝင်စားမှုမရှိအောင် ဂိမ်းတို့ဘာတို့ လောင်းကစားဘက် မပါသွားအောင် သူတို့ဒီ ဂီတဘက်မှာ စိတ်ပါ ဝင်စားမယ်ဆိုရင် ကျွန်တော်က ကူညီပြီးတော့မှ ဒီနေရာလေးကို တီဝိုင်းလေး ဖြစ်လာအောင် ကျွန်တော်က ခွင့်ပြုလိုက်တာပါ”ဟု Tachileik Talent Show စီစဉ်သူအဖွဲ့တွင် ပါဝင်သူ Johnny Fitness Center ပိုင်ရှင် ဦးဂျော်နီက ပြောသည်။

ဂီတဝါသနာပါသည့် လူငယ်များအတွက် လေ့ကျင့်ရန် နေရာတစ်ခုအဖြစ် ဖန်တီးထားသဖြင့် ပတ်ဝန်းကျင် အနှောက်အယှက် မဖြစ်စေရန်လည်း အချိန်ကန့်သတ်ဖျော်ဖြေသွားမည်ဖြစ်ပြီး လာရောက် အားပေးမည့် သူများအတွက်လည်း ထိုင်ခုံများ စီစဉ်ပေးထားမည်ဖြစ်ကြောင်း သိရသည်။

“ဒီမှာရှိတဲ့ တိုင်းရင်းသားတွေပေါ့ဗျာ။ ကျွန်တော်တို့ဒီမှာ မြန်မာသီချင်းတစ်ခုတည်း မဟုတ်ဘူး။ ကိုယ်ပိုင်ရေးထားတဲ့ သီချင်းတွေလည်း လာပြီးတော့မှ ဆိုပြလို့ရတယ်။ ပရိတ်သတ်ရှေ့လာပြီးတော့မှ ဆိုပြလို့ရတယ်။ ပြီးရင် ရှမ်း၊ အာခါ၊ လားဟူရှိမယ်၊ အခြားအခြားသော တိုင်းရင်းသားတွေလည်း ကိုယ်ပိုင်သံစဉ်တွေနဲ့ လာပြီးတော့မှ သီဆိုဖျော်ဖြေလို့ရပါတယ်။ အဲဒါအတွက်လည်း ကျွန်တော်တို့ ဖိတ်ခေါ်ပါတယ်”ဟု Tachileik Talent Show စီစဉ်သူအဖွဲ့တွင် ပါဝင်သူ ဦးကျော်စွာလင်း(ကိုကြီး)က ပြောသည်။

လက်ရှိအချိန်တွင် Tachileik Talent Show ကို နှစ်ပတ်တစ်ကြိမ် စနေနေ့ ညတိုင်း ကျင်းပပြုလုပ်ရန် စီစဉ်ထားပြီး အစီအစဉ် အောင်မြင်သွားပါက တစ်ပတ်တစ်ကြိမ် စနေနေ့တိုင်း ညတိုင်း ပြုလုပ်သွားမည် ဖြစ်ရာတွင် ဂီတဝါသနာပါသည့် မည်သူမဆို ပါဝင်နိုင်ရန် စီစဉ်ဆောင်ရွက်ထားရာ Tachileik Talent Show၏ Facebook Page တွင် ဝင်ရောက် ဆက်သွယ်နိုင်ကြောင်းနှင့်Tachileik Talent Show အား စနေန့ ညများတွင် ည(၇)နာရီ မှ ည(၉)နာရီခွဲအထိ ပြုလုပ်သွားမည်ဖြစ်ကြောင်း သိရသည်။

တာချီလိတ်မြို့သည် နယ်စပ်မြို့တစ်ခုဖြစ်သဖြင့် မူးယစ်ဆေးနှင့် ဂိမ်းလောင်းကစားဝိုင်းများမှာ လူငယ်များ၏ လက်တကမ်းတွင် ရှိနပြေီး ဂီတဝါသနာပါသည့် လူငယ်များအတွက် လေ့ကျင့်ရေးကွင်း တစ်ခု စီစဉ်ပေးထားခြင်း ဖြစ်ရာ လူငယ်များ အသိုင်းအဝန်းတွင် လာရောက် အပန်းဖြေစရာနေရာတစ်ခုရှိလာပြီး လမ်းမှား မရောက်ရန် အထောက်အကူတစ်ခုဖြစ်လာမည်ဟု ပွဲစီစဉ်သူတို့ မျှော်လင့်ထားသည်။

“ဒီပွဲလေးအထမြောက်သွားပြီ၊ ဖြစ်လာပြီဆိုရင် ကျွန်တော်တို့စဉ်းစားတာက Music ကို ဝါသနာပါတဲ့ ညီငယ် ညီမငယ်တွေက ဒီမှာလာဆိုကြမယ်။ သူတို့ရဲ့ အပေါင်းအသင်းတွေကလည်း ဒီကိုရောက်လာကြမယ်။ ဂိမ်းဆိုင်တွေ၊ မူးယစ်ဆေးတွေ ကနေ နည်းနည်း ကျွန်တော်တို့ ဘက်မှာ အချိန်ပိုရလာမယ်။ ပါဝင်ရင်းနဲ့ပဲ ဖြစ်ဖြစ်။ လာအားပေးရင်းနဲ့ပဲ ဖြစ်ဖြစ် ကျွန်တော်တို့ ဒီ Music ဘက်မှာ ပိုပြီးတော့ အချိန်ပေးလာကြမှာပေါ့။ လူငယ်တွေအတွက် ဂိမ်းတို့၊ မူးယစ်ဆေးတို့ဆိုတာ လက်တကမ်းအကွာမှာ ရှိတာ။ Music က သူတို့ လက်တကမ်းနားမှာ ရှိမနေဘူးလို့ ကျွန်တော်တို့ ခံစားရတယ်။ အဲဒီတော့ သူတို့ရဲ့ အနီးပတ်ဝန်းကျင်မှာ Music ကိုရှိလာအောင်လည်း ကျွန်တော်တို့ ရည်ရွယ်ပါတယ်”ဟု အဆိုတော် ကိုအိုက်ထွန်းက ပြောသည်။

 Tachileik Talent Show ပြုလုပ်သွားမည့် တာချီလိတ်မြို့ ရှမ်းရိုးမကွင်း ဘေးရှိ Johnny Fitness Center ရှိ ကွင်းပြင်၌ ၂၀၁၉ခုနှစ် ဇန်နဝါရီလ(၂၆)ရက်နေ့ ည(၇)နာရီတွင် ဖွင့်ပွဲဖြင့် စတင် ပြုလုပ်သွားမည် ဖြစ်ပြီး ဝါသနာရှင် လူငယ်များအနဖြေင့် Tachileik Talent Show၏ Facebook စာမျက်နှာမှ တဆင့် သိရှိလိုသည်များ နှင့် သတ်မှတ်ချက်များအား မေးမြန်းနိုင်မည်ဖြစ်ကြောင်းလည်း သိရှိရသည်။

Tachileik News Agency