တာချီလိတ်၊ ဧပြီလ (၅) ရက် ။ ။ ရှမ်းပြည်နယ်(အရှေ့ပိုင်း)တာချီလိတ်ခရိုင်အတွင်း နိုင်ငံတော်မတည်ငွေနှင့် မြန်မာနိုင်ငံစာကြည့်တိုက်များ ဖောင်ဒေးရှင်း တို့မှ ထောက်ပံ့မှု၊ ကျေးရွာကိုယ့်အားကိုယ်ကိုး အစီအစဉ် တို့ဖြင့် တည်ဆောက်ထားသည့် စာကြည့်တိုက် (၅၈)တိုက် ရှိပြီဖြစ်ကြောင်း တာချီလိတ်ခရိုင် ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ သိရသည်။
တာချီလိတ်ခရိုင်အတွင်းရှိ တာချီလိတ်၊ မိုင်းဖြတ်၊ မိုင်းယောင်း၊ တာလေ၊ ကျိုင်းလပ်၊ မိုင်းယုမြို့ တို့ရှိ အာခါ၊ လားဟူ၊ ရှမ်း စသည့် တိုင်းရင်းသား ကျေးရွာများ၌ ကျေးရွာစာကြည့်တိုက်များကို ဖွင့်လှစ်ထားခြင်း ဖြစ်သည်။
“အဓိက က ကျေးရွာတွေမှာ စာဖတ်စွမ်းရည်တွေ မြှင့်တင်ဖို့နဲ့ လူ့စွမ်းအားအရင်းအမြစ်တိုးတက်ဖို့ စာကြည့်တိုက်အဆောက်အဦတွေအတွက်နိုင်ငံတော်မှ ချပေးတာပါ။ ကျွန်တော်တို့တွေအနေနဲ့ စာကြည့်တိုက် ဖြစ်မြောက်ဖို့အတွက်ပဲ လုပ်ဆောင်ပေးလို့ရပါတယ်။ ထိန်းသိမ်းဖို့နဲ့ ရေရှည်တည်တံ့ဖို့ အတွက်က ရပ်/ကျေးအုပ်ချုပ်ရေးမှူးတွေ ရွာသူရွာသားတွေကပဲ ဆောင်ရွက်ရမှာပါ။”ဟု တာချီလိတ်ခရိုင်ပြန်/ဆက် ဦးစီးအရာရှိ ဦးလှဌေးက ပြောသည်။
စာကြည့်တိုက်များတည်ဆောက်ရာတွင် နိုင်ငံတော်မှ မတည်ငွေကျပ်(၁၀)သိန်းခွင့်ပြုပေးထားရာမှ ၂၀၁၅-၂၀၁၆ ဘဏ္ဍာနှစ်တွင် စာကြည့်တိုက်တစ်ခုအတွက် မတည်ငွေ ကျပ်သိန်း(၂၀)အထိ ခွင့်ပြုခဲ့ခြင်းဖြစ်ကြောင်း သိရသည်။
“ကျေးရွာအနားမှာလည်း ကျောင်းရှိနေတော့ ကလေးသူငယ်ကအစ စာဖတ်ကြပါတယ်။ ဒါကြောင့် စာကြည့်တိုက်မှာ စာဖတ်တဲ့သူတွေလည်း များပါတယ်။ စာအုပ်တွေလည်း အသက်အရွယ်အလိုက် စာဖတ်တတ်နိုင်ရေးအတွက် “အ”သုံးလုံး ကိုလည်း သင်ကြားဖို့ရှိပါတယ်။”ဟု ရန်ကုန်ရွာစာကြည့်တိုက်မှ ဦးယောလှက ပြောသည်။
ပြန်ကြားရေးနှင့် ပြည်သူ့ဆက်ဆံရေးဦးစီးဌာနအနေဖြင့် ကျေးရွာများတွင် စာကြည့်တိုက် အဆောက်အဦများ ဖွင့်လှစ်ရေးအတွက် ကူညီပေးခြင်းသာဖြစ်ပြီး စာအုပ်များထားရှိရန် ကျေးရွာလူထုအနေဖြင့် ဆောင်ရွက်ရမည်ဖြစ်ကြောင်း သိရသည်။
သတင်း။ ။ ဇောင်းညီ