ရှမ်းပြည်နယ်(အရှေ့ပိုင်း) တာချီလိတ်မြို့ ဗယ်လင်တိုင်းကဖေးရှေ့တွင် ဖွင့်လှစ်ထားသည့် ရခိုင်ပြည်နယ် ကူညီထောက်ပံ့ရေးကော်မတီ (တာချီလိတ်မြို့) ၏ အလှူခံဌာနအား စက်တင်ဘာလ( ရ ) ရက်နေ့အထိသာ ဖွင့်လှစ်မည်ဖြစ်သော်လည်း ကော်မတီသို့ အလှူငွေများ ဆက်လက်လှူဒါန်းနိုင်မည်ဖြစ်ကြောင်း သိရသည်။

ကော်မတီအနေဖြင့် ရခိုင်ပြည်နယ် ပဋိပက္ခဖြစ်ပွားနေသည့်ဒေသမှ ကူညီထောက်ပံ့ရေးနှင့် ရန်ပုံငွေရှာဖွေရေးလုပ်ငန်းများအား ဆက်လက်ဆောင်ရွက်သွားမည်ဖြစ်ရာ လှူဒါန်းလိုသူများအနေဖြင့် ကော်မတီနာယကများဖြစ်သည့် မြို့နယ်အုပ်ချုပ်ရေးမှူး ဦးထွန်းဝင်းအောင်၏ ဖုန်း ၀၉ ၄၅၂၈၀၈၀၄၄၊ မြို့နယ်ရဲတပ်ဖွဲ့မှူး ရဲမှူးသန်းနု၏ ဖုန်း ၀၉ ၂၀၁၆၉၇၄၊ ကော်မတီဥက္ကဌ ဦးအောင်ဖြိုးရှိန်၏ ဖုန်း ၀၉ ၄၃၁၃၆၄၃၁၊ ကော်မတီအတွင်းရေးမှူး  ဦးစောထွန်းဦး၏ ဖုန်း ၀၉ ၅၂၄၂၀၄၉ တို့သို့ ဆက်သွယ်နိုင်ကြောင်း သိရသည်။

ရခိုင်ပြည်နယ် ကူညီထောက်ပံ့ရေးကော်မတီ (တာချီလိတ်မြို့)၏ အလှူခံဌာန စတင်ဖွင့်လှစ်သည့် သြဂုတ်လ(၂၈)ရက်နေ့မှစ၍ စက်တင်ဘာလ(၅)ရက်နေ့အထိ စုပေါင်း မတည်အလှူငွေနှင့် စေတနာရှင်များ၏ လာရောက်လှူဒါန်းငွေ စုစုပေါင်းကျပ်သိန်း(၃၂၀)၀န်းကျင်ရရှိထားပြီဖြစ်ကာ ရခိုင်ပြည်နယ်အစိုးရအဖွဲ့မှတစ်ဆင့် ရခိုင်ပြည်သူများထံသို့ ကျပ်သိန်း(၁၀၀)နှင့် ကျပ်သိန်း(၁၀၂)သိန်းကျော်တန်ဖိုးရှိသည့် ဆန်နှင့်ဆီတို့ကို ပေးပို့လှူဒါန်းထားပြီးဖြစ်ကြောင်း သိရသည်။

အစွန်းရောက် ဘင်္ဂါလီအကြမ်းဖက်သမားများနှင့် ARSA တို့ တိုက်ခိုက်ခံနေရသည့် ရခိုင်ပြည်နယ်အတွင်းမှ ဒေသခံပြည်သူများ၊ နိုင်ငံ့ဝန်ထမ်းများနှင့် တပ်မတော်သားများအား ထောက်ပံ့ပေးနိုင်ရန်အတွက် ရခိုင်ပြည်နယ် ကူညီထောက်ပံ့ရေးကော်မတီ (တာချီလိတ်မြို့)အား သြဂုတ်လ (၂၇)ရက်နေ့က ဖွဲ့စည်းလိုက်ခြင်းဖြစ်သည်။

အဆိိုပါကော်မတီ၏အလှူခံဌာနအား တာချီလိတ်မြို့ ဗယ်လင်တိုင်း ကဖေးနှင့်အအေး စားသောက်ဆိုင်တွင် ဖွင့်လှစ်ထားခြင်းဖြစ်ပြီး အလှူခံသည့်ကာလအတွင်း ကော်မတီဝင်များနှင့် လာရောက်လှူဒါန်းသူများကို အဆိုပါဆိုင်က အခမဲ့ဧည့်ခံကျွေးမွေးမှုများဖြင့် ဒါနပြုထားကြောင်း သိရသည်။