~~~~~~~~⊰❂ unicode ❂⊱~~~~~~~~

တာချီလိတ်မြို့၊ ရီဂျီးနားဟိုတယ်အနီးရှိ ကွင်းထဲတွင် ဆိုင်ကယ်လုယက်မှုနှင့်အတူ ဓားခုတ်မှုဖြစ်ပွားသည့် ဖြစ်စဉ်မှ တစ်ဆင့် တာချီလိတ်မြို့မရဲစခန်းတွင် ပုဒ်မ(၄)ခုဖြင့် အမှုဖွင့်ခံထားရပြီး ရဲစခန်းမှ အလိုရှိ နေသူများ ဖြစ်သည့် တရားခံ(၅)ဦးအား ဖမ်းဆီးရမိထားကြောင်း သိရသည်။

ဖြစ်စဉ်မှာ မတ်လ(၂၀)ရက်နေ့ ည(၉)နာရီဝန်းကျင်က မောင်ချစ်စရာ နှင့် သူငယ်ချင်းနှစ်ဦးသည် ဟိုတယ် အလုပ်မှ အလုပ်ဆင်း၍ MSX-125 အမျိုးအစား နက်ပြာရောင် ဆိုင်ကယ်ဖြင့် နေအိမ် မပြန်သေးဘဲ ရီဂျီးနားဟိုတယ် အနီးရှိ ကွင်းပြင်သို့ သွားကာ ဆိုင်ကယ်ရပ်တန့်ပြီး ဆိုင်ကယ်ပေါ်မှ ဆင်း၍ ဆိုင်ကယ်နှင့် မလှမ်းမကမ်းတွင် ကျောပေးရပ်ပြီး စကားပြောနကြေစဉ် အမည်မသိ အမျိုးသား(၄)ဦးမှ ဆိုင်ကယ် (၂)စီးဖြင့် ရောက်ရှိလာပြီး (၄)ဦးထဲမှ ဆံပင်အဝါရောင် ဆေးဆိုးထားသည့် အမည်မသိ အမျိုးသားက ဆိုင်ကယ်အား တွန်းယူသွားသည်ကို မောင်ချစ်စရာ မှ လှမ်းတွေ့လိုက်ရာမှ ဆိုင်ကယ်အား ပြန်လိုက်ယူကြောင်း သိရသည်။

ဆိုင်ကယ်အား ပြန်လိုက်ယူရာ ကျန်(၃)ဦးမှာ မောင်ချစ်စရာ အနီးသို့ ရောက်လာပြီး ပခုံးအား ဆောင့်တွန်း လိုက်သဖြင့်၎င်းမှာ ယိမ်းယိုင်သွားစဉ် လက်ထဲတွင် အသင့်ကိုင်လာသော ဓားအိမ်ဖြင့် ရိုက်ရာ မောင်ချစ်စရာ မှာ လက်ဖြင့် ကာလိုက်စဉ် ဝဲဘက်လက်မောင်းအား ရိုက်မိသွားခဲ့ခြင်း ဖြစ်ကြောင်း သိရသည်။

ထိုသို့ ဖြစ်ပွားရာမှ တစ်ဆင့် မောင်ချစ်စရာ အား ဓားဖြင့် လိုက်ခုတ်မှုကြောင့် ကျောကုန်းတွင် ပြတ်ရှဒဏ်ရာ(၁)ချက် နှင့်အတူ ပွန်းခြစ်ဒဏ်ရာ(၄)ချက်တို့ ရရှိသွားပြီး မောင်ချစ်စရာ လဲကျသွားစဉ် ဆံပင်အဝါရောင် ဆေးဆိုးထားသည့် အမည်မသိ လူငယ်(၁)ဦးက ဆိုင်ကယ် နှင့် Iphone 7Plus တို့အား ခိုးယူသွားပြီး ကျန်(၃)ဦးမှာလည်း၎င်းတို့ စီးလာသော ဆိုင်ကယ်များဖြင့် မောင်းနှင် ထွက်ပြေးသွားကြောင်း သိရသည်။

အဆိုပါ ဖြစ်စဉ်နှင့် ပတ်သက်၍ တာချီလိတ်မြို့မရဲစခန်းတွင် (ပ)၈၆/၂၀၁၈၊ ရာဇသတ်ကြီးပုဒ်မ ၃၉၄ဖြင့် အမှုရေးဖွင့်စေခဲ့ပြီးနောက် တရားခံများအား ဖမ်းဆီးရမိရေးအတွက် တာချီလိတ်ခရိုင်ရဲတပ်ဖွဲ့မှူး ဒုရဲမှူးကြီးထိန်ဝင်း၏ ညွှန်ကြားမှု၊ မြို့နယ်ရဲတပ်ဖွဲ့မှူး ရဲမှူးသန်းနုနှင့် တာချီလိတ်မြို့မရဲစခန်းမှ စခန်းမှူး ဒုရဲမှူးမျိုးခိုင်တို့၏ အနီးကပ်ကြီးကြပ်ကွပ်ကဲမှုဖြင့် တာချီလိတ်မြို့မရဲစခန်းမှ နယ်ထိန်း ရဲအုပ်ကိုကိုဦး၊ တပ်ကြပ်ကြီးကျော်ဇေယျ၊ ခရိုင်မှုခင်းအကူ(မှု/ကူ)မှ ရဲအုပ်သောင်းရွှေ နှင့် အဖွဲ့တို့ ပါဝင်သည့် ပူးပေါင်း အဖွဲ့ဖြင့် မတ်လ(၂၆)ရက်နေ့ ညနေ(၃)နာရီခွဲဝန်းကျင်အချိန်က တရားခံများအား ဖမ်းဆီးရမိနိုင်ခဲ့ကြောင်း သိရသည်။

တရားခံများအား ဖမ်းဆီးရမိမှုနှင့် ပတ်သက်၍ အဆိုပါ ပူးပေါင်းအဖွဲ့သည် နယ်မြေများအလိုက် လိုက်လံ စုံစမ်းမှုများ ပြုလုပ်ရာတွင် တာချီလိတ်မြို့ ဆန်ဆိုင်း(ခ)ရပ်ကွက်၊ အားကစားရုံလမ်းရှိ ဘီယာဆိုင်တွင် ဆိုင်ကယ်အလဲအထပ် ပြုလုပ်နေကြောင်း သတင်းရရှိသည့်အတွက် သွားရောက်စုံစမ်းရာ ဆိုင်ကယ်အား အလဲအထပ်လုပ်ရန် ဈေးမတည့်ခဲ့ကြောင်းနှင့် ဆိုင်ကယ် အလဲအထပ်ပြုလုပ်ရန် ယူလာသူမှာ မြကျော်(ခ)ရဲကို(ခ)အသေးလေး ဖြစ်နေကြောင်း သိရပြီး ဆက်လက်၍ စုံစမ်းရာမှာ မြကျော်(ခ)ရဲကို(ခ)အသေးလေးသည် ရန်အောင်မြေရပ်ကွက်၊ ပါလျှံ(၂)တွင် နေထိုင်ကြောင်း သိရ၍ ပါလျှံ(၂)သို့ ရဲတပ်ဖွဲ့မှ သွားရောက်စုံစမ်းရာ ရန်အောင်မြေရပ်ကွက်၊ ပါလျှံ(၂)အတွင်းရှိ ဆိုင်ကယ်ပြင်ဆိုင်ရှေ့တွင် ရပ်တန့်ထားသော MSX-125 အမျိုးအစား နက်ပြာရောင်ဆိုင်ကယ်မှာ အလုခံရသော မောင်ချစ်စရာ၏ ဆိုင်ကယ် ဖြစ်နေကြောင်း သိရပြီး ဆက်လက်မေးမြန်းရာ အဆိုပါ ဆိုင်ကယ်အား အလိုက်ပေး အလဲအထပ်ပြုလုပ်သွားခြင်း ဖြစ်ပြီး ဆက်လက်မေးမြန်းရာမှ ဖုန်းနံပါတ်ရရှိကာ ဖုန်းဖြင့် ဆက်သွယ်ခိုင်းစေ၍ ခေါ်ဆောင်ရာ ပြည့်ဖြိုးအောင်(ခ)မိုးဦး၊ မြကျော်(ခ)ရဲကို(ခ)အသေးလေး နှင့် တိုးပြည့်အောင်(ခ)ကိုတိုးတို့အား ဖမ်းဆီးရမိခြင်းဖြစ်ကြောင်း တာချီလိတ်မြို့မရဲစခန်းမှ နယ်ထိန်း ရဲအုပ်ကိုကိုဦးထံက သိရသည်။

"သူတို့က အားကစားရုံနားက ဘီယာဆိုင်မှာ ဆိုင်ကယ်အလဲအထပ်လုပ်တာ သူတို့ ရချင်တဲ့ ငွေအတိုင်းအတာနဲ့ ပေးတာနဲ့က အဆင်မပြေဘူး၊ အဲ့ဒါနဲ့ ပါလျှံ(၂)ထဲက ဆိုင်ကယ်ပြင်ဆိုင်မှာရှိတဲ့ Dream 125 အပြာရောင်ဆိုင်ကယ်နဲ့ ငွေအလိုက်ပေးပြီး အလဲအထပ်လုပ်သွားတာ၊ ဆိုင်ကယ် အလဲအထပ်လုပ်သွားသူတွေရဲ့ ဖုန်းနံပါတ်ကို ရရှိတာနဲ့ ဆိုင်ကယ်ပြင်ဆိုင်က လူကတစ်ဆင့် ဆက်သွယ် ခိုင်းပြီးနောက် သူတို့တွေကို ဖမ်းဆီးရမိတာပါ။ သူတို့တွေဟာ အလုပ်အကိုင်အတိအကျမရှိဘူး၊ ရမ်းကားနေတဲ့ လူငယ်တစ်စုလို့ သိရပါတယ်"ဟု တာချီလိတ်မြို့မရဲစခန်းမှ နယ်ထိန်း ရဲအုပ် ကိုကိုဦးက တာချီလိတ်သတင်းအေဂျင်စီသို့ ပြောသည်။
အဆိုပါ ဖြစ်စဉ်များနှင့် ပတ်သက်၍ ဆက်နွယ်သူများရှိနေသေးကြောင်း စစ်ကြောဖော်ထုတ်ချက်အရ သိရသည့် အတွက် ဆက်နွယ်သူများဖြစ်သည့် ကျော်ရဲသူ နှင့် သက်ဇော်ဦးတို့အား ထပ်မံဖမ်းဆီးရမိပြီး ပြစ်မှုများကို ကျူးလွန်သူများဖြစ်ကြောင်း ဝန်ခံထွက်ဆိုခဲ့ကြကြောင်း သိရသည်။

ဖမ်းဆီးရမိသော အဆိုပါ (၅)ဦးတွင် ခိုးယူ လုယက်လာရာမှ ရရှိလာသည့် ဆိုင်ကယ်များအား ဆိုင်ကယ် ပြင်ဆိုင်များ နှင့် ဆိုင်ကယ်အလဲအထပ်ပြုလုပ်ရာနေရာများတွင် သွားရောက် ရောင်းချပေးသူ (၂)ဦး ပါဝင်ကြောင်း၊ ပြစ်မှုကျူးလွန်ရာတွင် အသုံးပြုသည့် ဓားအိမ်ပါ ဓားရှည်(၂)လက်တို့အား ရှာဖွေ တွေ့ရှိရကြောင်း နှင့် (၅)ဦးအနက် အသက်(၁၉)နှစ်ရှိ သက်ဇော်ဦးသည် ဓားခုတ်မှု၊ ဆိုင်ကယ် လုယက်ခိုးယူမှု နှင့် ခွေးခိုးမှုတို့အား ကျူးလွန်ထားပြီး ထွက်ပြေးတိမ်းရှောင်နေသည့်အတွက် ဖမ်းဝရမ်းထုတ်ခံထားရသော တရားခံပြေးဖြစ်ကြောင်း တာချီလိတ်ခရိုင်ရဲတပ်ဖွဲ့မှ ဒုရဲမှူးစံသိန်းထံက သိရသည်။

ဖမ်းဆီးရမိထားသူ ပြည့်ဖြိုးအောင်(ခ)မိုးဦး၊ မြကျော်(ခ)ရဲကို(ခ)အသေးလေး၊ တိုးပြည့်အောင်(ခ)ကိုတိုး၊ ကျော်ရဲသူ နှင့် သက်ဇော်ဦး တို့ (၅)ဦးသည် တာချီလိတ်မြို့မရဲစခန်းတွင် (ပ)၈၆/၂၀၁၈၊ ရာဇသတ်ကြီး ဥပဒေပုဒ်မ ၃၉၄ဖြင့်လည်းကောင်း၊ သက်ဇော်ဦး၊ ပြည့်ဖြိုးအောင်(ခ)မိုးဦး၊ တိုးပြည့်အောင်(ခ)ကိုတိုး နှင့် မြကျော်(ခ)ရဲကို(ခ)အသေးလေးတို့ (၄)ဦးသည် တာချီလိတ်မြို့မရဲစခန်းတွင် ရာဇသတ်ကြီးဥပဒေပုဒ်မ ၃၈၂ဖြင့် လည်းကောင်း၊ သက်ဇော်ဦးသည် (ပ)၂၂၇/၂၀၁၇၊ ၃၂၆/၁၁၄ တို့ဖြင့်လည်းကောင်း အမှုဖွင့်ထားရှိသော တရားခံများဖြစ်ကြောင်း တာချီလိတ်မြို့မရဲစခန်းက သိရသည်။

ဓာတ်ပုံ - ရဲစခန်း