~~~~~~~~⊰❂ unicode ❂⊱~~~~~~~~

ရှမ်းပြည်နယ်(အရှေ့ပိုင်း) တာချီလိတ်မြို့နယ်၊ မိုင်းဖုန်း(က)ကျေးရွာအုပ်စုအတွင်းရှိ ဇွဲသာယာ ကမ်းခြေတွင် ဆိုင်ခန်းများ ဆောက်လုပ်ထားခြင်းမှာ ဥပဒေနှင့် ညီညွတ်မှု မရှိသဖြင့် သက်ဆိုင်ရာက တားမြစ်လိုက်သည့် အတွက် ဆိုင်ခန်းများအား ဧပြီလ(၄)ရက်နေ့ကစ၍ ဖျက်သိမ်းနေလျက်ရှိရာ သင်္ကြန်အပြီးထိ ရောင်းချခွင့်ရရေးအတွက် ငွေတိုးများယူ၍ ဖွင့်လှစ်ထားသည့် ဈေးသည်များက လွှတ်တော်ကိုယ်စားလှယ်များထံ အကူအညီတောင်းခံလာကြောင်း သိရသည်။

ဆိုင်ခန်းများအား ဧပြီလ(၄)ရက်နေ့က ဇွဲသာယာဆိပ်ကမ်းမှ တာဝန်ရှိသူများက ဖျက်သိမ်း ပေးနေလျက်ရှိပြီး ဈေးရောင်းချသူ လူဦးရေ(၅၀)ဝန်းကျင်က လွှတ်တော်ကိုယ်စားလှယ်များနှင့် ဧပြီလ(၄)ရက်နေ့ နေ့လယ်ပိုင်းက တွေ့ဆုံခဲ့ကြရာ၎င်းတို့အနဖြေင့် သင်္ကြန်ကာလအတွင်း ဈေးရောင်းချရန်အတွက် ငွေတိုးချေး၍သော်လည်းကောင်း၊ ငွေအမြောက်အများဖြင့် ရင်းနှီးမြှုပ်နှံ ထားရသည်ဖြစ်တာကြောင့်လည်းကောင်း သင်္ကြန်အပြီးထိ ဈေးဆိုင်ဖွင့်လှစ်ခွင့်မရှိပါက ဆုံးရှုံးနစ်နာမှုများ ဖြစ်ပေါ်လာမည် ဖြစ်ကြောင်းနှင့် ငွေတိုးဆပ်ဖို့လည်း အခက်တွေ့မှာ ဖြစ်သည့်အတွက် လွှတ်တော်ကိုယ်စားလှယ်များ အနဖြေင့် သက်ဆိုင်ရာများဖြင့် ညှိနှိုင်းဆောင်ရွက်ပေးနိုင်ရန် အကူအညီတောင်းခံလာခြင်း ဖြစ်သည်။

"ခရိုင်အုပ်ချုပ်ရေးမှူးနဲ့ သွားရောက်တွေ့ဆုံ ညှိနှိုင်းခဲ့တာကတော့ အဲ့ဒီနေရာမှာ ဥပဒေနဲ့ မညီတာတွေရှိတယ် ဆိုတာကိုလည်း ပြောလာတယ်။ နောက်ပြီး ဈေးသည်များအနေနဲ့ နစ်နာမှု မရှိစေရေးအတွက် မိုင်းဖုန်း(က)ကျေးရွာအုပ်စုက အုပ်ချုပ်ရေးမှူး နဲ့ ရပ်မိရပ်ဖတွေနဲ့ ဆွေးနွေးညှိနှိုင်းကြည့်၊ အဆင်ပြေရင် သင်္ကြန်ကာလအတွင်း ဈေးရောင်းလို့ အဆင်ပြေနိုင်တယ်ဆိုတာမျိုး ပြောလာတယ်"ဟု အမျိုးသားလွှတ်တော်ကိုယ်စားလှယ် ဦးစိုင်းလုံစံခတ်က ပြောသည်။

အဆိုပါ ကိစ္စနှင့် ပတ်သက်၍ ဈေးသည်များ၏ အကူအညီ တောင်းခံလာမှုကြောင့် အမျိုးသားလွှတ်တော် ကိုယ်စားလှယ် ဦးစိုင်းလုံစံခတ်၊ ပြည်သူ့လွှတ်တော်ကိုယ်စားလှယ် ဦးဌေးဝင်း နှင့် တာချီလိတ်ခရိုင်စီမံခန့်ခွဲမှု ကော်မတီဥက္ကဌ၊ ခရိုင်အုပ်ချုပ်ရေးမှူး ဦးတင်ဝင်းရွှေတို့ ဧပြီလ(၄)ရက်နေ့ နေ့လယ်ပိုင်းက ဆွေးနွေးညှိနှိုင်းခဲ့ကြောင်း သိရသည်။

“ဥပဒေအရဆိုရင် ဇွဲသာယာက ကမ်းခြေဖွင့်ခွင့် မရှိဘူး။ သူက နှစ်နိုင်ငံ နယ်ခြားအဖြစ်သုံးတဲ့ မြစ်လည်း ဖြစ်တယ်။ မြစ်ချောင်းတိုးတက်ရေးဦးစီးဌာနက ထုတ်ပြန်ထားတဲ့ ဥပဒေ၊ ညွှန်ကြားချက်တွေနဲ့ မညီညွတ်တာလည်း ပါတယ်။ မိုင်းဖုန်းဒေသအတွင်းမှာ ဇွဲသာယာကမ်းခြေရှိလာတဲ့အတွက် လူငယ်တွေ အရက်သေစာ လာရောက်သောက်စားကြတော့ ပြဿနာ မကြာခဏဖြစ်တယ်လို့ ဒေသခံတွေက ပြောလာတယ်။ နောက် အဲဒီမြေနေရာကလည်း လယ်ယာမြေ အမျိုးအစားဖြစ်တဲ့အတွက် ကမ်းခြေ လုပ်လို့မရဘူး။ သူတို့လုပ်တဲ့ ဧရိယာက ချောင်းနယ်နိမိတ်ဧရိယာထဲမှာ ပါတယ်။ ဒီနေရာမှာ ဒီလိုတွေ ရှိခြင်းအားဖြင့် ကမ်းခြေကနေ ပစ္စည်းသယ်တာတွေလို ကမ်းခြေကို အလွယ်တကူ ဆိုက်ကပ်နိုင်တဲ့ အနေအထားတွေကြောင့် တစ်ချိန်ချိန်မှာ မလိုလားအပ်တဲ့ ပြဿနာတွေ ဖြစ်လာနိုင်တဲ့ အနေ အထားဖြစ်တဲ့ အတွက် ဒါကို လတ်တလောမှာ အသုံးမပြုဖို့အတွက် တားမြစ်ထားတာပေါ့”ဟု တာချီလိတ်ခရို်င်စီမံခန့်ခွဲမှုကော်မတီ ဥက္ကဌ၊ တာချီလိတ်ခရိုင် အုပ်ချုပ်ရေးမှူး ဦးတင်ဝင်းရွှေက တာချီလိတ်သတင်းအေဂျင်စီသို့ ဧပြီလ(၃)ရက်နေ့ ညနေပိုင်းက ပြောကြားခြင်း ဖြစ်သည်။

ဇွဲသာယာဆိပ်ကမ်းရှိ ဈေးသည်များသည် ၂၀၁၇ခုနှစ်ထက် ယခု ၂၀၁၈ သင်္ကြန်ကာလအတွင်း ကောင်းမွန်စွာ ဈေးရောင်းချနိုင်ရန် မျှော်မှန်းထားသည့်အတွက် ရင်းနှီးမတည်ငွေများစွာဖြင့် စားသောက်ပစ္စည်းများအား တိုးချဲ့ဖြည့်စွက်ထားကြောင်း သိရသည်။
"ကျွန်တော်တို့ ဇွဲသာယာမှာ ဈေးရောင်းနေတာဟာ ကျွန်တော်တို့က သူများဆီက ငွေတိုးနဲ့ယူပြီး ရောင်းနေတာ။ အခုလိုမျိုး မရောင်းရဘူးဆိုတော့ ကျွန်တော်တို့မှာ ဒုက္ခရောက်ပါတယ်၊ ကျွန်တော် တစ်ယောက်တည်းလည်း မဟုတ်ပါဘူး၊ အများလည်း အဲ့လိုပါပဲ၊ အခု ပြန်ပိတ်ဆိုရင် ကျွန်တော်တို့ ယူထားတဲ့ အတိုးတွေကို ဘယ်လိုမှ ပြန်ဆပ်နိုင်မှာ မဟုတ်ပါဘူး၊ ကျွန်တော်တို့ သင်္ကြန်တွင်းမှာ ရောင်းရမယ်ဆိုပြီတော့မှ ပစ္စည်းတွေ ဝယ်ထားကြတာ၊ သင်္ကြန်အပြီးထိ ရောင်းခွင့်ပြုပါလို့ တောင်းဆိုချင်ပါတယ်ခင်ဗျ၊"ဟု ဇွဲသာယာဆိပ်ကမ်းတွင် သင်္ကြန်အတွင်း ဈေးရောင်းချရန်အတွက် ဆို်င်ခန်းဖွင့်လှစ်ထားသူ ကိုကျော်သူရက ပြောသည်။

လူစည်ကားလာသည့် ဇွဲသာယာကမ်းခြေအား ယခင်က ဆိုင်ခန်းများဖြင့် ပြုလုပ်ပေးထားခြင်း မရှိသော်လည်း ၂၀၁၈ သင်္ကြန်နားနီးတွင် ဆိုင်ခန်းများဖြင့် ဈေးသည်များအတွက် ပြုလုပ်ပေးထားခြင်း ဖြစ်ကြောင်း သိရသည်။

“ဒီနေရာမှာ လူစည်ကားလာတော့ မိုးရွာဘာရွာနဲ့ မထူးပါဘူးဆိုပြီး ဆိုင်ခန်းလေးတွေ ဆောက်ပေး လိုက်တယ်။ သူတို့လည်းရောင်းကောင်းတော့ လာကြတယ်။ ကျွန်တော်က သူတို့ကို နင်တို့ ငါးထောင်တော့ပေးဆိုတော့ သူတို့လည်း ပေးကြတယ်။ ကျွန်တော်လည်း တပည့်တွေနဲ့ သန့်ရှင်းရေး လုပ်တာ လုပ်ပေးတယ်။ သင်္ကြန်တွင်းမှာ လမ်းနှစ်လမ်း လုပ်ပေးမှရမယ်ဆိုပြီးတော့ ဟိုနေ့ကပဲ ကျွန်တော် လမ်းနှစ်လမ်းလည်း လုပ်ပေးထားတာပါ။ ဆိုင်ခန်းက (၂၀)ကျော်၊ (၃၀)ကျော်လောက်တော့ ရှိတာပေါ့။ ဆိုင်တွေကလည်း ပြည့်နေတယ်။ လူတွေကလည်း လာလည်ကြနဲ့ ပြည့်နေတာပေါ့နော်”ဟု ကမ်းခြေတွင် ဆိုင်ခန်းများ ဖွင့်လှစ်ထားသည့် ဦးဇွဲက ဧပြီလ(၃)ရက်နေ့ ညပိုင်းက တာချီလိတ်သတင်းအေဂျင်စီသို့ ပြောသည်။

အဆိုပါကမ်းခြပြေုလုပ်ထားသည့်နေရာမှာ ဥပဒေအရ ခွင့်ပြု၍ မရနိုင်သည့်နေရာဖြစ်သည့်အပြင် ကမ်းခြေတွင် လူငယ်များ လာရောက်သောက်စားကာ မကြာခဏပြဿနာဖြစ်ပွားသည်ဟု ဒေသခံများက တိုင်ကြားမှုများလည်း ရှိသဖြင့် သက်ဆိုင်ရာဌာနများက သွားရောက်စစ်ဆေးခဲ့ခြင်းဖြစ်ကြောင်း သိရသည်။