~~~~~~~~⊰❂ Unicode Version ❂⊱~~~~~~~~

တာချီလိတ်ခရိုင်နှင့် နီးစပ်သည့် ထိုင်းနိုင်ငံ ချင်းရိုင်းခရိုင်အတွင်း အာဖရိကဝက်အပြင်းဖျားရောဂါသံသယကြောင့် ဝက်ကောင်ရေ (၂၀၀) ရှင်းလင်းထားရ
***********
မြန်မာနိုင်ငံ တာချီလိတ်ခရိုင်နှင့် နီးစပ်သည့် ထိုင်းနိုင်ငံ၊ ချင်းရိုင်းခရိုင်အတွင်း၌ ၂၀၁၉ ခုနှစ်၊ စက်တင်ဘာလ တတိယပတ်အတွင်း ဖျားနာသေဆုံးသည့် ဝက်နှစ်ကောင်တွင် အအာဖရိကဝက်အပြင်းဖျားသံသယရှိသည့်အတွက် မွေးမြူရေးခြံ(၂)ခြံမှ ဝက်အကောင်ရေ (၂၀၀)ကျော်ကို ရှင်းလင်းထားကြောင်း တာဝန်ရှိသူများက ၂၀၁၉ ခုနှစ်၊ စက်တင်ဘာလ (၁၈)ရက်နေ့တွင် ထုတ်ဖေါ်ပြောကြားကြောင်း  ဘန်ကောက်ပို့စ်သတင်းတွင် ဖေါ်ပြထားသည်။

ချင်းရိုင်းခရိုင်တွင် ဝက်နှစ်ကောင် သေဆုံးမှုဖြစ်သဖြင့် စက်တင်ဘာလ (၁၆)ရက်နေ့က လန်းပန်းခရိုင်ရှိ ဓါတ်ခွဲခန်းသို့ ပို့စစ်ထားပြီး ဓါတ်ခွဲခန်းအဖြေရရန် (၁၄)ရက် စောင့်ဆိုင်းရမည်ဖြစ်သော်လည်း ဝက်အချင်းချင်း ကူးစက်ဖြစ်ပွားစေပြီး ကာကွယ်ဆေးမရှိသေးသဖြင့် ရောဂါဖြစ်ပွားသေဆုံးသည့် ခြံနှစ်ခြံမှ ဝက်များကို ရှင်းလင်းလိုက်ပြီး ကာကွယ်ရေးလုပ်ဆောင်ထားခြင်းဖြစ်သည်ဟု သိရသည်။

“အဲဒီရောဂါဖြစ်ရင်တော့ ဖြစ်တဲ့ခြံမှာဆိုရင်တော့ ရှင်းထုတ်ရတယ်။ အနီးဝန်းကျင် တစ်ကီလိုဝန်းကျင်ကို ကူးစက် ဧရိယာအဖြစ် သတ်မှတ် ကန့်သတ်ရတယ်။ ဒါကတော့ ကာကွယ်ရေး လုပ်ငန်းစဉ်အတွက် လုပ်ရတာတွေပေါ့။ အကွာအဝေးသတ်မှတ်ချက်ကတော့ တစ်နိုင်ငံနဲ့ တစ်နိုင်ငံတော့ မတူဘူးပေါ့။ ကျွန်တော်တို့ ကျိုင်းတုံတို့ တာချီလိတ်တို့မှာဖြစ်တာက ဝက်အားနည်းရောဂါပေါ့။ အာဖရိကဝက်အပြင်းဖျားနဲ့ ဝက်အားနည်းရောဂါတွေက ဝက်အချင်းချင်းသာ ရောဂါကူးစက်ဖြစ်ပွားတာတော့ တူတယ်။  မတူတာက အာဖရိကဝက်အပြင်းဖျားက လောလောဆယ် ကာကွယ်ဆေးမပေါ်သေးတော့ ဖြစ်တဲ့ခြံကို ရှင်းရတာတွေ လုပ်ရတယ်။ ဝက်အားနည်းရောဂါက ကာကွယ်ဆေးရှိတော့ အဲဒီလောက်ထိတော့ လုပ်ဖို့ မလိုဘူးပေါ့”ဟု  မွေးမြူရေးနှင့် ကုသရေးဦးစီးဌာနမှ တာချီလိတ်ခရိုင်ဦးစီးမှူး ဒေါက်တာ တင်ကိုကိုက တာချီလိတ်သတင်း အေဂျင်စီသို့ ပြောသည်။

အာရှဒေသတွင်အာဖရိကဝက်အပြင်းဖျားရောဂါဖြစ်ပွားမှုမှာ တရုတ်နိုင်ငံတွင် စတင်ခဲ့ပြီးနောက် မွန်ဂိုလီးယား၊ ဗီယက်နမ်၊ ကမ္ဘောဒီးယား၊ လာအိုနှင့် ဖိလစ်ပိုင်နိုင်ငံများတွင် ပျံ့နှံ့ခဲ့ခြင်းဖြစ်သည်။

တရုတ်နိုင်ငံနှင့်နယ်စပ်ဒေသဖြစ်သည့် မြန်မာနိုင်ငံ မိုင်းလားဒေသတွင်လည်း သြဂုတ်လအတွင်း အာဖရိကဝက်အပြင်းဖျား ကူးစက်ဖြစ်ပွားခဲ့ကာ ကျိုင်းတုံနှင့် တာချီလိတ်တို့တွင် ဝက်အားနည်းရောဂါကြောင့် ဝက်သေဆုံးမှုများ ဖြစ်ပွားခဲ့ခြင်းဖြစ်သည်။

Tachileik News Agency
Photo: siamrath