~~~~~~~~⊰❂ Unicode Version ❂⊱~~~~~~~~

H1N1 ရောဂါပိုးတွေ့လူနာ (၁၆)ဦးအနက် ရန်ကုန်နှင့် စစ်ကိုင်းတိုင်းဒေသကြီးတို့မှ လူနာ(၆)ဦး သေဆုံး
***************
ရန်ကုန်တိုင်းဒေသကြီးနှင့် စစ်ကိုင်းတိုင်းဒေသကြီးတို့တွင် H1N1 ကြောင့် ၂၀၁၉ ခုနှစ်၊ ဇွန်လ (၂၀)ရက်နေ့အထိ သေဆုံးသူ(၆)ဦးရှိနေသဖြင့် ဆေးရုံများတွင် ရာသီတုပ်ကွေးရောဂါကုသမှုအတွက် လိုအပ်သည့်ပြင်ဆင်မှုများ ဆောင်ရွက်ထားကြောင်း ပြည်သူ့ကျန်းမာရေးဦးစီးဌာနက သတင်းထုတ်ပြန်သည်။

၂၀၁၉ ခုနှစ်၊ ဇန်နဝါရီလ (၁) ရက်နေ့မှ ဇွန်လ (၂၀) ရက်နေ့အထိ Influenza A(H1N1)pdm09 တုပ်ကွေးပိုးတွေ့ရှိသူ (၁၆)ဦးရှိသည့်အနက် ရန်ကုန်တိုင်းဒေသကြီးမှ (၅) ဦးနှင့် စစ်ကိုင်းတိုင်းဒေသ ကြီးမှ (၁) ဦး၊ စုစုပေါင်း (၆) ဦး သေဆုံးခဲ့ခြင်းဖြစ်ကြောင်း သိရသည်။

အဆိုပါ တုပ်ကွေးရောဂါပိုးကြောင့် သေဆုံးသူများမှာ အသက်အရွယ်ကြီးရင့် သူများ၊ အသက်အရွယ်ငယ်လွန်းသူများနှင့် ဆီးချိုရောဂါ၊ သွေးတိုးရောဂါ၊ နှလုံးရောဂါ၊ အသက်ရှူ လမ်းကြောင်းရောဂါ စသည့် နာတာရှည်ရောဂါအခံရှိသူများဖြစ်သည်ကို တွေ့ရကြောင်း ပြည်သူ့ကျန်းမာရေးဦးစီးဌာနက သတင်းထုတ်ပြန်ထားသည်။  
 
  ပြည်သူလူထုအနေဖြင့် ရောဂါကြိုတင် ကာကွယ်နိုင်ရန် ပါးစပ်နှင့် နှာခေါင်းကို ကာ၍ နှာချေချောင်းဆိုးခြင်း၊ နှာချေချောင်းဆိုးပြီးချိန်၊ ရောဂါပိုးရှိသူအား ကိုင်တွယ်ပြီးချိန်နှင့် အများသုံး အရာဝတ္ထုပစ္စည်းများ ထိတွေ့ပြီးချိန်တိုင်း လက်ဆေးခြင်း၊ လူထုထပ်သောနေရာများသို့ မလိုအပ်ဘဲ သွားလာခြင်းမှ ရှောင်ကြဉ်ခြင်း စသည်တို့ကို လိုက်နာဆောင်ရွက်သွားကြရန်နှင့် တုပ်ကွေးဆန်သော ရောဂါလက္ခဏာများအပြင် အဖျားကြီးခြင်း၊ အသက်ရှူကြပ်ခြင်း၊ အသက်ရှူခက်ခြင်း၊ သတိလစ် ခြင်းနှင့် ဂနာမငြိမ်ခြင်း စသည့်လက္ခဏာများ ဖြစ်ပွားလာပါက နီးစပ်ရာကျန်းမာရေးဌာနများသို့ သတင်းပေးပို့ကုသမှုခံယူကြရန် တိုက်တွန်းထားသည်။

  Influenza A(H1N1)pdm09 တုပ်ကွေးရောဂါပိုးသည် ရာသီတုပ်ကွေးရောဂါအနေဖြင့် နှစ်စဉ်ဖြစ်ပွားလေ့ရှိပြီး မြန်မာနိုင်ငံတွင် ၂၀၁၇ ခုနှစ် တုပ်ကွေးရောဂါဖြစ်ပွားသူ (၄၀၆) ဦးတွင် Influenza A(H1N1)pdm09 ပိုးတွေ့ရှိခဲ့ပြီး သေဆုံးသူ (၃၈) ဦးရှိခဲ့ကာ ၂၀၁၈ ခုနှစ်အတွင်း Influenza A(H1N1)pdm09 ပိုးတွေ့ရှိသူ (၁၃)ဦးရှိခဲ့ကာ သေဆုံးသူမရှိခဲ့ကြောင်း သိရသည်။

Tachileik News Agency