Ref: The Nation

~~~~~~~~⊰❂ Unicode Version ❂⊱~~~~~~~~

ထိုင်းလယ်သမားများ ပိုးသတ်ဆေး၊ပေါင်းသတ်ဆေးများကို သင်တန်းဆင်းပြီးမှ အသုံးပြုခွင့်ရတော့မည်
***************
ထိုင်းနိုင်ငံတွင် လယ်သမားများကို ပိုးသတ်ဆေး၊ပေါင်းသတ်ဆေးအသုံးပြုနည်းသင်တန်းများ သင်ကြားပေးသွားမည်ဖြစ်ပြီး သင်တန်းဆင်းလယ်သမားများကိုသာ ပိုးသတ်ဆေး၊ပေါင်းသတ်ဆေး အသုံးပြုခွင့်ပေးတော့မည်ဖြစ်ကြောင်း သိရသည်။

ထိုင်းနိုင်ငံအတွင်း ၂၀၁၈ ခုနှစ်က ပိုးသတ်ဆေး၊ ပေါင်းသတ်ဆေးကြောင့် ဆေးရုံတက်၍ ကုသမှုခံယူရသူပေါင်း (၆၀၇၉)ဦးရှိခဲ့ပြီး ဖျားနာသူ (၂၉၅၆)ဦး ရှိခဲ့သဖြင့် တစ်နိုင်ငံလုံးရှိ လယ်သမားများကို ပိုးသတ်ဆေး၊ပေါင်းသတ်ဆေးများ စနစ်တကျသုံးစွဲစေရေး သင်တန်းများတက်ရောက်ကြရမည့်သတ်မှတ်ချက်ကို ချမှတ်လိုက်ပြီး ၂၀၁၉ ခုနှစ် အောက်တိုဘာလ (၂၀)ရက်တွင် စတင်သက်ဝင်မည်ဖြစ်ကြောင်း သိရသည်။

အဆိုပါ သတ်မှတ်ချက်အရ သင်တန်းများအကောင်အထည်ဖေါ်ရန်အတွက် စိုက်ပျိုးရေးနှင့် အကျိုးတူပူးပေါင်းဆောင်ရွက်ရေးဝန်ကြီးဌာနက ဘတ် (၉၈)သန်း တင်ပြတောင်းခံထားကြောင်း သိရသည်။

ပိုးသတ်ဆေး၊ပေါင်းသတ်ဆေးကို စနစ်တကျသုံးစွဲခြင်းမရှိပါက မူးဝေအော့အန်ခြင်း၊ ခေါင်းကိုက်ခြင်း၊ ကြွက်သားများ တောင့်တင်းခြင်း၊ အသက်ရှုရပ်မေ့မျောခြင်းစသည့် ရုတ်တရက်ဖြစ်ပွားသည့်လက္ခဏာများအပြင် ရေရှည်တွင် ကင်ဆာ၊ ဆီးချိုသွေးချို၊ လေဖြတ်ခြင်းနှင့် အရေပြားရောဂါများ ဖြစ်ပွားနိုင်ခြင်းဖြစ်သည်။

Tachileik News Agency
Ref: The Nation