~~~~~~~~⊰❂ Unicode Version ❂⊱~~~~~~~~

ထိုင်းနို်င်ငံတွင် မုဒိမ်းမှုကို အမြင့်ဆုံးပြစ်ဒဏ် သေဒဏ်အထိ ပြင်ဆင်သတ်မှတ်
*************
ထိုင်းနိုင်ငံတွင် လူသေဆုံးမှုဖြစ်ပွားသည့် မုဒိမ်းမှုကို သေဒဏ်ချမှတ်ခြင်းအပါအဝင် မုဒိမ်းမှုနှင့် လိင်ပိုင်းဆိုင်ရာအဓမ္မမှုများကို ပြစ်ဒဏ်အသီးသီး တိုးမြှင့်သတ်မှတ်လိုက်ပြီဖြစ်သည်။

အဆိုပါဥပဒေပြင်ဆင်ချက်ကို ၂၀၁၉ ခုနှစ် မေလ (၂၇)ရက်နေ့က တော်ဝင်ဂေဇက်သတင်းစာတွင် ဖေါ်ပြခဲ့ခြင်းဖြစ်သည်။

ပြင်ဆင်လိုက်သည့် ဥပဒေပုဒ်မများအရ မုဒိမ်းမှုအပြင် စီးပွားရေးအတွက်လည်းကောင်း၊ ပုဂ္ဂိုလ်ရေးတိုက်ခိုက်ရန် လည်းကောင်း၊ အခြားသော မတရားသောနည်းလမ်းဖြင့်အသုံးပြုရန် ရည်ရွယ်ချက်ဖြင့် လိင်ပိုင်းဆိုင်ရာ ညစ်ညမ်းဗီဒီယိုရိုက်ကူးမှုများ၊ ယင်းကဲ့ဗီဒီယိုများကို အခြားသူများထံ ဖြန့်ဝေသူများကိုပါ ပြစ်ဒဏ်များ တိုးမြှင့်လိုက်ခြင်းဖြစ်သည်။

မိဘ၊ မောင်နှမ၊ အခြားဆွေမျိုးတော်စပ်သူ၊ သြဇာအာဏာလွှမ်းမိုးသူများစသည်တို့၏ မုဒိမ်းမှု ကျူးလွန်ခံရနိုင်သည့် မိမိကိုယ်ကိုမကာကွယ်နိုင်သေးသည့် အသက်အရွယ်နှင့် အခြေအနေတွင် ရှိနေသူများကို မုဒိမ်းကျူးလွန်ပါက အနည်းဆုံးပြစ်ဒဏ်မှာ ထောင်ဒဏ်နှစ်(၂၀)နှင့် ငွေဒဏ်ဘတ်(၄)သိန်း သတ်မှတ်ထားကြောင်း သိရသည်။

ဥပဒေပြင်ဆင်ချက်တွင် မုဒိမ်းမှုဟုသတ်မှတ်ရာ၌ စအိုနှင့် ပါးစပ်တို့ကိုအသုံးပြုပြီး လိင်ပိုင်းဆိုင်ရာ အဓမ္မပြုကျင့်မှုများကိုပါ ထည့်သွင်းသတ်မှတ်ထားကာ အခြားသူတစ်ဦးတစ်ယောက်၏ လိင်အင်္ဂါအတွင်းသို့ အခြားပစ္စည်းတစ်ခုခုအသုံးပြု၍ အဓမ္မထိုးသွင်းခြင်းကို မုဒိမ်းမှုတွင် ထည့်သွင်းမထားသော်လည်း  မုဒိမ်းမှုကဲ့သို့ ပြစ်ဒဏ်သတ်မှတ်ထားကြောင်း သိရသည်။

Tachileik News Agency
Ref: The Nation