~~~~~~~~⊰❂ Unicode Version ❂⊱~~~~~~~~

တနင်္သာရီတိုင်းဒေသကြီးအစိုးရအဖွဲ့ဝင် ဝန်ကြီး (၂)ဦးကို ရာထူးမှ နှုတ်ထွက်ခွင့်ပြု
*************
တနင်္သာရီတိုင်းဒေသကြီးအစိုးရအဖွဲ့မှ စီမံကိန်းနှင့် ဘဏ္ဍာရေးဝန်ကြီး၊ လျှပ်စစ်နှင့် စွမ်းအင်ဝန်ကြီးတို့ (၂)ဦးအား ၂၀၁၉ ခုနှစ်၊ မတ်လ (၁၉)ရက်နေ့မှစ၍ ရာထူးမှ နှုတ်ထွက်ခွင့်ပြုလိုက်ကြောင်း နိုင်ငံတော်သမ္မတရုံးက မတ်လ (၂၀)ရက်နေ့တွင် သတင်းထုတ်ပြန်သည်။

နိုင်ငံတော်သမ္မတရုံး၏ အမိန့်အမှတ် ၁၀/၂၀၁၉၊ မတ်လ(၁၉)ရက်နေ့ ရက်စွဲဖြင့်ထုတ်ပြန်ထားသည့် ထုတ်ပြန်ချက်တွင် စီမံကိန်းနှင့် ဘဏ္ဍာရေးဝန်ကြီး ဦးဖြိုးဝင်းထွန်း၊ လျှပ်စစ်နှင့် စွမ်းအင်ဝန်ကြီး ဦးကြည်လှိုင်တို့ကို ၎င်းတို့၏ဆန္ဒသဘောအလျောက် တိုင်းဒေသကြီးဝန်ကြီးရာထူးများမှ နှုတ်ထွက်ခွင့်ပြုခြင်းဖြစ်ကြောင်း ဖေါ်ပြထားသည်။

ယင်းကဲ့သို့နှုတ်ထွက်ခွင့်ပြုလိုက်ခြင်းကြောင်း နိုင်ငံတော်သမ္မတရုံး၏ထုတ်ပြန်ချက်မှာ မတ်လအတွင်း တနင်္သာရီတိုင်းဒေသကြီးအစိုးရအဖွဲ့နှင့်ပတ်သက်၍ ဒုတိယမြောက်ထုတ်ပြန်ချက်ဖြစ်ပြီး မတ်လ (၁၁)ရက်နေ့ကလည်း နိုင်ငံတော်သမ္မတရုံး အမိန့်အမှတ်၊ ၉ / ၂၀၁၉ ဖြင့် တိုင်းဒေသကြီးအစိုးရအဖွဲ့ ဝန်ကြီးချုပ် ဒေါက်တာလဲ့လဲ့မော်ကို တာဝန်မှရပ်စဲကြောင်း ထုတ်ပြန်ခဲ့ခြင်းဖြစ်သည်။

တိုင်းဒေသကြီးဝန်ကြီးချုပ်မှာ အဂတိလိုက်စားမှုတိုက်ဖျက်ရေးကော်မရှင်က ၂၀၁၉ ခုနှစ် မတ်လ (၁၀)ရက်နေ့တွင် အဂတိလိုက်စားမှုတိုက်ဖျက်ရေးဥပဒေဖြင့် အမှုဖွင့်အရေးယူခံထားရခြင်းဖြစ်သည်။

လက်ရှိတွင် လစ်လပ်နေသည့် တနင်္သာရီတိုင်းဒေသကြီးဝန်ကြီးချုပ်အဖြစ် တိုင်းဒေသကြီးအစိုးရအဖွဲ့ဝင် သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီး ဦးမြင့်မောင်အား ခန့်အပ်တာဝန်ပေးနိုင်ရေး နိုင်ငံတော်သမ္မတရုံးက လွှတ်တော်၏သဘောထားတောင်းခံထားသဖြင့် တိုင်းဒေသကြီးလွှတ်တော် အရေးပေါ်အစည်းအဝေးကို မတ်လ (၂၂)ရက်နေ့တွင် ကျင်းပရန်စီစဉ်ထားခြင်းဖြစ်သည်။

Tachileik News Agency