**************
ရှမ်းပြည်နယ်အရှေ့ပိုင်း၊ တာချီလိတ်မြို့တွင် မူးယစ်ဆေး၊ မူးယစ်ဆေးထုတ်လုပ်သည့်စက်များဖြင့် ဖမ်းဆီးရမိသည့် ထိုင်းနိုင်ငံသား (၃)ဦးနှင့် အိမ်ခန်းငှားပေးထားသည့် အိမ်ရှင်တို့ကို လဝကအက်ဥပဒေဖြင့် ထပ်မံအမှုဖွင့်ထားပြီး အိမ်ခန်းငှားပိုင်ရှင်မှာ ထွက်ပြေးနေကြောင်း သိရသည်။
၂၀၁၉ ခုနှစ်၊ ဖေဖေါ်ဝါရီလ (၁၀)ရက်နေ့က ဝိန်းကျောက်ရပ်ကွက်၊ တော်ကော့(ပြင်)ရှိ နေအိမ်တွင် ငှားရမ်းနေထိုင်သည့် ထိုင်းနိုင်ငံသား လက်ချာနွန်းဖေးလောင်းထောင်ကို မူးယစ်ဆေး၊ မူးယစ်ဆေးထုတ်လုပ်သည့်စက်တို့ဖြင့် ဖမ်းဆီးရမိထားခြင်းဖြစ်ပြီး တော်ကော့(ပြင်)ရှိ ဟိုတယ်တစ်ခုတွင်လည်း ထိုင်းနိုင်ငံသူများဖြစ်သည့် Tidarut Lorprakansit နှင့် ဝမ်နာလီလီလော့ဖူ (Bai Tong Rodpor)တို့ကို မူးယစ်ဆေးများဖြင့် ဖမ်းမိထားခြင်းဖြစ်သည်။
၎င်းတို့ (၃)ဦးအား တာချီလိတ်မြို့မရဲစခန်းတွင် မူးယစ်မှုများဖြင့် အမှုဖွင့်စစ်ဆေးရာ မယ်ဆိုင်ချောင်းမှ တရားမဝင်ဖြတ်ကူးလာကြသူများဖြစ်ကြောင်း စစ်ဆေးတွေ့ရှိရသဖြင့် လဝကအက်ဥပဒေဖြင့် ထပ်မံအရေးယူလိုက်ခြင်းဖြစ်ပြီး နိုင်ငံခြားသားအား အိမ်ခန်းငှားပေးထားသော်လည်း တာဝန်ရှိသူများထံ သတင်းပေးပို့ရန်ပျက်ကွက်သည့် အိမ်ရှင် အိုက်လွတ်ကိုပါ လဝကအက်ဥပဒေဖြင့် အရေးယူလိုက်ခြင်းဖြစ်ကြောင်း သိရသည်။
ထိုင်းနိုင်ငံသားများဖြစ်သည့် လက်ချာနွန်းဖေးလောင်းထောင်း၊ Tidarut Lorprakansit ၊ ဝမ်နာလီလီလော့ဖူ နှင့် ထွက်ပြေးတိမ်းရှောင်နေသည့် အိမ်ရှင် အိုက်လွတ်တို့အား (ပ)၆၉/၂၀၁၉၊ လဝကအက်ဥပဒေပုဒ်မ ၁၃(၁)/၁၃(၅)ဖြင့် တာချီလိတ်မြို့မရဲစခန်းတွင် အမှုဖွင့် စစ်ဆေးနေကြောင်း သိရသည်။
Tachileik News Agency
ဓါတ်ပုံ - ရဲတပ်ဖွဲ့
