************
ဧရာဝတီမြစ်ကြောင်းတစ်လျှောက် မြို့ပါင်း (၂၇)မြို့တွင်ဆိုက်ကပ်ပြီး ငြိမ်းချမ်းရေးနှင့်ပတ်သက်သည့် လူထုသဘောထားရယူမည့် ငြိမ်းချမ်းရေးသင်္ဘောသည် ၂၀၁၈ ခုနှစ်၊ နိုဝင်ဘာလ(၂၄)ရက်နေ့ နံနက်ပိုင်း၌ (၁၀)ခုမြောက်မြို့အဖြစ် မကွေးမြို့သို့ ဆိုက်ရောက်လာကြောင်း သိရသည်။

“လက်ရှိပြည်ထောင်စုမှာ အရေးတကြီးဖြစ်ပေါ်နေတဲ့ ပြည်တွင်းစစ်ပွဲတွေ အမြန်ဆုံးရပ်နားပေးဖို့၊ တန့်ရပ်နေတဲ့ ပြည်ထောင်စုငြိမ်းချမ်းရေးကြီး ဆက်လက်ပြီး ရှေ့ကိုရွေ့အောင် ထာဝရတည်တံ့ခိုင်မြဲတဲ့ ငြိမ်းချမ်းရေးဖြစ်စဉ်ကြီး ပေါ်ပေါက်လာစေရေးအတွက် ပြည်သူလူထုတွေရဲ့ဆန္ဒနဲ့အသံရယူပြီး ငြိမ်းချမ်းရေးညီလာခံမှာ တွန်းအားပေးနိုင်ရေး ဆောင်ရွက်သွားကြဖို့အတွက် ဒီခရီးစဉ်ကို စတုတ္ထအကြိမ်မြောက်ခရီးစဉ်အဖြစ် ဖော်ဆောင်တာပါ”ဟု မီဒီယာ နှင့်ပြန်ကြားရေးတာဝန်ခံ ဥပဒေအကြံပေး ဦးခင်မောင်မြင့်က တာချီလိတ်သတင်းအေဂျင်စီသို့ ပြောသည်။

ငြိမ်းချမ်းရေးတွဲလက်များ မြစ်ဧရာမှထပ်ဆင့်ပွားအစီအစဉ်ဖြင့်  မန္တလေးမြို့မှ ရန်ကုန်မြို့အထိ ဧရာဝတီမြစ်ကြောင်းတစ်လျှောက်ရှိ မြို့ပေါင်း(၂၇)မြို့တွင် ဆိုက်ကပ်မည့် အဆိုပါသင်္ဘောခရီးစဉ်သည် နိုဝင်ဘာ(၂၅)ရက်နေ့တွင် ဗိုလ်ချုပ်အောင်ဆန်း၏ ဇာတိမြေ နတ်မောက်မြို့သို့ ဆိုက်ကပ်ပြီး  ငြိမ်းချမ်းရေး ဂီတပွဲတော်ပြုလုပ်မည်ဖြစ်ကြောင်း သိရသည်။

အဆိုပါ သဘောၤာခရီးစဉ်တလျှောက် မြို့ပေါင်း (၂၇)မြို့မှ လူထု၏  ငြိမ်းချမ်းရေးဆန္ဒပြုလက်မှတ်များနှင့် ပြည်သူလူထု၏ ငြိမ်းချမ်းရေးနှင့်ပတ်သက်သည့် သဘောထားများကို အနီးဆုံး ငြိမ်းချမ်းရေးညီလာခံတွင် တင်ပြသွားမည်ဖြစ်ကြောင်း သိရသည်။

သင်္ဘောခရီးစဉ်ဆိုက်ကပ်သည့်မြို့များတွင် ငြိမ်းချမ်းရေးနှင့်ပတ်သက်သည့် သဘောထားရယူခြင်း၊ ဒေသခံပြည်သူများ၊ ကျောင်းသူ/ ကျောင်းသားများနှင့် ငြိမ်းချမ်းရေးစကားဝိုင်းများ ပြုလုပ်ခြင်း၊ ငြိမ်းချမ်းရေးဂီတပွဲတော်များကျင်းပခြင်းများ လုပ်ဆောင်ခြင်းဖြစ်ကြောင်း သိရသည်။

ငြိမ်းချမ်းရေးသဘောၤတွင် ခဝဲခြံမျက်မမြင်ကျောင်း၊ မြစ်ကြီးနားမျက်မမြင်ကျောင်း၊ သုံးရောင်ခြယ်လူမှုအကျိုးပြု ပြည်သူ့ကွန်ရက်၊ တိုင်းရင်းသားများထဲမှ ရခိုင်မျိုးနွယ်စုဝင် မာရမကြီးတိုင်းရင်းသားအဖွဲ့၊ သက်ဆိုင်ရာ မြို့ရွာအသီးသီးမှ လိုက်ပါပူးပေါင်းသည့် ၈၈ ငြိမ်းချမ်းရေးနှင့် ပွင့်လင်းလူ့အဖွဲ့အစည်း၊ စာပေပညာရှင်များနှင့် ဂီတအနုပညာရှင်များလိုက်ပါလာကြောင်း သိရသည်။

ယခုခရီးစဉ်မှာ စတုတ္ထအကြိမ်မြောက် မန္တလေး - ရန်ကုန် (၂၈)ရက်ခရီးစဉ်ဖြစ်ပြီး ပထမအကြိမ် မြစ်ကြီးနား- နေပြည်တော် တစ်လခရီး၊ ဒုတိယအကြိမ် ရှမ်းပြည်မြောက်ပိုင်း- နေပြည်တော် တစ်လခရီး၊ တတိယအကြိမ် ကော့သောင်း- ရန်ကုန် တစ်လခရီး ငြိမ်းချမ်းရေးခရီးစဉ်များဖော်ဆောင်ခဲ့ကာ မိမိတို့ဒေသတွင် ငြိမ်းချမ်းနေသော်လည်း မငြိမ်းချမ်းဘဲ စစ်ဘေးဒဏ်ခံစားနေရသောနေရာဒေသများ ရှိနေသည်ကို အသိပေးနှိုးဆော်ခြင်းဖြစ်ပြီး ငြိမ်းချမ်းရေးလုပ်ငန်းစဉ်တွင် ပူးပေါင်းပါဝင်လာစေရန် ရည်ရွယ်ခြင်းဖြစ်ကြောင်း သိရသည်။

သတင်း၊ဓာတ်ပုံ #ဖီးနစ်