~~~~~~~~⊰❂ unicode ❂⊱~~~~~~~~

မိုင်းဖုန်းဆရာတော်၏ သက်တော် (၅၆)နှစ်ပြည့် ဝိဇာတမွေးနေ့တရားအလှူပွဲအတွက် ပြင်ဆင်မှုများဆောင်ရွက်
********
မိုင်းဖုန်းဆရာတော် သဒ္ဓမ္မဇောတိကဓဇ ဘဒ္ဒန္တဉာဏသံဝရ၏ သက်တော်(၅၆)နှစ်ပြည့် ဝိဇာတမွေးနေ့ တရားအလှူပွဲတွင် တရားနာကြွရောက်ကြမည့် ဧည့်ပရိတ်သတ်များ အခက်အခဲမရှိစေရန် ရှမ်းပြည်နယ် (အရှေ့ပိုင်း) တာချီလိတ်မြို့နယ်၊ မိုင်းဖုန်း(က)ကျေးရွာအုပ်စု၊ ပါဆာကျေးရွာရှိ လွမ်းလိန်းကျောင်းတိုက် (မိုင်းဖုန်းဆရာတော်ကျောင်းတိုက်)တွင် တပည့်ဒါယိကာများက ပြင်ဆင်မှုများ ဆောင်ရွက်နေကြောင်း သိရသည်။

၂၀၁၉ ခုနှစ် ဇန်နဝါရီလ(၅)ရက်နေ့တွင်ကျရောက်မည့် မိုင်းဖုန်းဆရာတော်၏ သက်တော် (၅၆)နှစ်ပြည့် ဝိဇာတမွေးနေ့ကျရောက်မည်ဖြစ်ရာ အနယ်နယ်အရပ်ရပ်မှ လာရောက်ဖူးမြောက်ကြမည့် ဧည့်ပရိတ်သတ်များအတွက် သောက်သုံးရေလုံလောက်စေရေးနှင့် သန့်စင်ခန်းများ လုံလောက်ရေးအတွက် ထပ်တိုးတည်ဆောက်နိုင်ရေးအတွက် ၂၀၁၈ ခုနှစ်၊ နိုဝင်ဘာလ(၂၆)ရက်နေ့တွင် တပည့်ဒါယကာများက ကွင်းဆင်းဆောင်ရွက်နေကြကြောင်း သိရသည်။

အဆိုပါကျောင်းတိုက်အတွင်း ရေပိုက်လိုင်းများ၊ ရေကန်များစစ်ဆေးခြင်း၊ လက်ရှိ သန့်စင်ခန်းအလုံး (၁၀၀)ကျော်ရှိနေသော်လည်း ဧည့်ပရိတ်သတ်များလာနိုင်သည်ဟု ခန့်မှန်းထားသဖြင့် နောက်ထပ် သန့်စင်ခန်း အလုံးရေ (၆၀)တို့ကို ထပ်တိုးတည်ဆောက်ရေးတို့အတွက် တာချီလိတ်မြို့မှ တပင်ရွှေထီးကုမ္ပဏီက လှူဒါန်းမည်ဖြစ်ကြောင်း သိရသည်။

၂၀၁၈ ခုနှစ်က မိုင်းဖုန်းဆရာတော် သဒ္ဓမ္မဇောတိကဓဇ ဘဒ္ဒန္တဉာဏသံဝရ၏ သက်တော် (၅၅)နှစ်ပြည့် ဝိဇာတမွေးနေ့ အစီအစဉ်ကို ဇန်နဝါရီလ (၁)ရက်နေ့မှ (၅)ရက်နေ့အထိ ကျင်းပခဲ့ရာ အနယ်နယ်အရပ်ရပ်မှ လာရောက်ဖူးမြောက်ကြည်ညိုကြသည်။

Tachileik News Agency
ဓါတ်ပုံ -Tachileik News Agency၊ U San Thein