~~~~~~~~⊰❂ unicode ❂⊱~~~~~~~~

တာလေမြို့ တာကြန့်ရွာမှ တောင်သူများကို စိုက်ခင်းများတွင် ကြွက်နှင့် ပိုးမွှားကျရောက်မှု ကာကွယ်ရေး သရုပ်ပြရှင်းလင်း
***************
ရှမ်းပြည်နယ်(အရှေ့ပိုင်း) တာချီလိတ်ခရိုင်၊ တာလေမြို့၊ တာကြန့်ကျေးရွာတွင် စိုက်ခင်းများအတွင်း ကြွက်နှင့် ပိုးမွှားရောဂါကျရောက်မှု ကာကွယ်ရေးနှင့် ပိုးမွှားရောဂါခွဲခြားနည်းတို့ကို ခရိုင်စိုက်ပျိုးရေးဦးစီးဌာနက တောင်သူများအား ၂၀၁၈ ခုနှစ်၊ သြဂုတ်လ(၂၉)ရက်နေ့ နံနက်ပိုင်းက လက်တွေ့သရုပ်ပြရှင်းလင်းကြောင်း သိရသည်။
တာကြန့်ရွာမှ တောင်သူ(၂၈)ဦးကို ခရိုင်စိုက်ပျိုးရေးဦးစီးဌာန၊ လက်ထောက်ညွှန်ကြားရေးမှူး ဦးလှဝင်း၊ ဒုတိယဦးစီးမှူး ဦးလွှမ်းမိုးသူ၊ မြို့ဦးစီးမှူး ဦးနေလင်းတို့က ပိုးမွှားရောဂါစနစ်တကျခွဲခြားနည်း၊ စပါးသီးနှံတွင် ကျရောက်တတ်သော ရောဂါများနှင့် ကာကွယ်နှိမ်နှင်းနည်း၊ ငမြှောင်တောင်ပိုးကာကွယ်နှိမ်နှင်းနည်းနှင့် ပိုးသတ်ဆေး စနစ်တကျအသုံးပြုနည်းတို့ကို လက်တွေ့သရုပ်ပြရှင်းလင်းကြခြင်းဖြစ်ကြောင်း သိရသည်။
တောင်သူများက ပိုးမွှားကျရောက်နေသည့် စပါးပင်များကို လက်တွေ့ခွဲခြားလေ့လာကြပြီး တောင်သူများအတွက် အသိပညာပေးလက်ကမ်းစာစောင်များကို ဖြန့်ဝေပေးကြောင်း သိရသည်။