~~~~~~~~⊰❂ unicode ❂⊱~~~~~~~~

ထိုင်းနိုင်ငံ ချင်းရိုင်းတွင်ကျင်းပသည့် ရွှေ့ပြောင်းလုပ်သားများ၏ ကလေးသူငယ်များအခွင့်အရေးဆိုင်ရာ အလုပ်ရုံဆွေးနွေးပွဲတွင် တာချီလိတ်အခြေစိုက် CNCMC ပါဝင်ဆွေးနွေး
*************
ထိုင်းနိုင်ငံတွင်း ရွှေ့ပြောင်းအလုပ်သမားများ၏ ဘဝရပ်တည်မှုနှင့် ၎င်းတို့မိသားစု၊ ကလေးသူငယ်များ လုံခြုံမှုရှိစေရေး၊ လိင်ပိုင်းဆိုင်ရာလူကုန်ကူးမှုများ ရပ်တန့်ကာကွယ်စောင့်ရှောက်ရေး အလုပ်ရုံဆွေးနွေးပွဲကို ထိုင်းနိုင်ငံ၊ ချင်းရိုင်းခရိုင်၊ ချင်းရိုင်းမြို့  Night Bazaar WanKham Hotel ၌ ၂၀၁၈ ခုနှစ်၊ သြဂုတ်လ (၂၃) ရက်နေ့က ကျင်းပရာ မြန်မာဘက်မှ NGO အဖွဲ့အစည်းတစ်ခုဖြစ်သည့် CNCMC က မြန်မာလုပ်သားများအရေး ပါဝင်ဆွေးနွေးကြကြောင်း သိရသည်။

 “မြန်မာရွှေ့ပြောင်းလုပ်သားတွေ နေရပ်ပြန်ပြီး ထိုင်းနိုင်ငံကို နယ်စပ်ကပြန်ဝင်ရင် တစ်ချို့ ပြည်ဝင်ခွင့်တားမြစ်ခံရတာ၊ လုပ်ငန်းခွင်ပြင်ပမှာ မတော်တဆထိခိုက်မှုဖြစ်ပွားရင် နစ်နာကြေးခံစားခွင့်နဲ့ အလုပ်ရှင်သဘောထား ဘယ်လိုရှိသလဲ၊ ရွှေ့ပြောင်းလုပ်သားမိသားစုဝင် ကလေးတွေအတွက် ကျန်းမာရေးစောင့်ရှောက်မှုနဲ့ ပညာရေးရနိုင်တဲ့ အခြေအနေ၊ ပတ်စ်ပို့၊ ဗီဇာအတု ပြုလုပ်သူကို ဖေါ်ထုတ်အရေးယူမှုမလုပ်ဘဲ အတုကိုင်ဆောင်မှုနဲ့ ဘာမှ မသိနားမလည်တဲ့ အလုပ်သမားတွေ အရေးယူခံနေရတဲ့အခြေအနေ၊ အလုပ်ရှင်တွေရဲ့ လိင်ပိုင်းဆိုင်ရာ အကြမ်းဖက်မှုခံနေရတဲ့ အမျိုးသမီးငယ်တွေအကြောင်း မြန်မာဘက်က ဆွေးနွေးဖြစ်ပါတယ်”ဟု ထိုင်းနိုင်ငံမယ်ဆိုင်မြို့ရောက် မြန်မာနိုင်ငံသားများအား ကူညီစောင့်ရှောက်ရေးနှင့် စေ့စပ်ညှိနှိုင်းရေးကော်မတီ (Caring And Negotiating  Committee For Myanmar Citizens in Mae Sai Thailand – CNCMC)အဖွဲ့ဝင် ဦးစည်သူမောင်က တာချီလိတ်သတင်းအေဂျင်စီသို့ ပြောသည်။

 အဆိုပါ အလုပ်ရုံဆွေးနွေးပွဲကို ထိုင်းနိုင်ငံမှ ECPAT Foundation Thailandက ဦးစီးကျင်းပခြင်းဖြစ်ပြီး ထိုင်းနိုင်ငံမှ ချင်းရိုင်းခရိုင် လူဝင်မှုကြီးကြပ်ရေး၊ အလုပ်သမားလူမှုဖူလှုံရေးနှင့် ထိန်းသိမ်းစောင့်ရှောက်ရေးအဖွဲ့၊  ခရိုင်အာမခံ၊ ခရိုင်ပြည်သူ့ဆေးရုံမှ တာဝန်ရှိသူများ၊ ခရိုင်စည်ပင်အဖွဲ့၊ ခရိုင်အလုပ်သမားဦးစီးဌာမှ အရာရှိများနှင့် ရွှေ့ပြောင်းလုပ်သားများအရေး ဆောင်ရွက်ပေးနေသည့် ထိုင်းနိုင်ငံအခြေစိုက် NGO (၁၁) ဖွဲ့မှ ကိုယ်စားလှယ်(၄၀)ဦးနှင့်အတူ မြန်မာနိုင်ငံမှ ရှမ်းပြည်နယ်(အရှေ့ပိုင်း) တာချီလိတ်မြို့ အခြေစိုက် CNCMC မှ ကိုယ်စားလှယ်များအဖြစ် ဦးအောင်မြင့်ရှိန်၊ ဦးစည်သူမောင်၊ ဦးစိုင်းဝန်းတစ်၊ ဦးထွန်းနိုင်ဦးနှင့် ဦးငယ်လေးတို့ ပါဝင်ဆွေးနွေးကြခြင်းဖြစ်ကြောင်း သိရသည်။

အလုပ်ရုံဆွေးနွေးပွဲတွင် သက်ဆိုင်ရာဌာနဆိုင်ရာအသီးသီးမှ တာဝန်ရှိသူများ၊ အလုပ်သမားရေးရာ ဥပဒေကျွမ်းကျင်သူများက ရွှေ့ပြောင်းလုပ်သားများနှင့်ပတ်သက်သည့် ဥပဒေများ သိသင့်သိထိုက်သည်များကို ရှင်းလင်းပြောကြားပြီးနောက် ရွှေ့ပြောင်းလုပ်သားများကို မှီခိုနေထိုင်ကြသော ကလေးသူငယ်များ၏ ကျန်းမာရေး၊ ပညာရေး၊ လုံခြုံမှုရှိစေရေး၊ စိတ်ပိုင်းဆိုင်ရာမြှင့်တင်ပေးရေးတို့ကို တက်ရောက်လာသူများက အုပ်စုများခွဲ၍ ဆွေးနွေးအဖြေရှာကြခြင်းဖြစ်ကြောင်း သိရသည်။

အဆိုပါ ဆွေးနွေးပွဲမှ ရလဒ်များကို မှတ်တမ်းပြုစု၍ သက်ဆိုင်ရာဌာနအသီးသီးသို့ တင်ပြမည့်အပြင် ECPAT Foundation ၏ အဓိကရည်ရွယ်ချက်ဖြစ်သည့် လုံခြုံဘေးကင်းသည့် ရွှေ့ပြောင်းလုပ်ငန်းခွင်၊ ရွှေ့ပြောင်းလုပ်သားများ အခွင့်အရေးစီမံကိန်းကို (၃)နှစ်အတွင်း အကောင်အထည်ဖေါ်သွားမည့်အပြင် ရွှေ့ပြောင်းအလုပ်သမားများဆိုင်ရာ အခက်အခဲများကို NGO အဖွဲ့များကြား ချိတ်ဆက်ဆောင်ရွက်သွားနိုင်ရန် လုပ်ဆောင်သွားမည်ဖြစ်ကြောင်း ECPAT အဖွဲ့ခေါင်းဆောင်  Miss Ketsanee Jantrakol ထံမှ သိရသည်။
ECPAT ဖေါင်ဒေးရှင်းသည် ကလေးသူငယ်များအား လူကုန်ကူးခြင်း၊ လိင်ပိုင်းဆိုင်ရာ အမြတ်ထုတ်ခံရခြင်းစသည်တို့အပါအဝင် ကလေးသူငယ်အခွင့်အရေးချိုးဖေါက်ခံရမှုများ ကာကွယ်ရေးအတွက် ၁၉၈၈ ခုနှစ်ကတည်းက ထိုင်းနိုင်ငံ ချင်းရိုင်းတွင် အခြေစိုက်လုပ်ဆောင်နေသည့် အစိုးရမဟုတ်သည့် အဖွဲ့အစည်းတစ်ခုဖြစ်သည်။

CNCMC သည် မြန်မာ- ထိုင်းနယ်စပ် ရှမ်းပြည်နယ်(အရှေ့ပိုင်း) တာချီလိတ်မြို့တွင် ၂၀၁၃ ခုနှစ်၊ သြဂုတ်လ (၂၆) ရက်နေ့က စတင်ဖွဲ့စည်းခဲ့ကာ ထိုင်းနိုင်ငံရောက် မြန်မာလုပ်သားများအခက်အခဲကို ကူညီဖြေရှင်းပေးနေသည့် အစိုးရမဟုတ်သော အဖွဲ့အစည်းတစ်ခုဖြစ်သည်။

Tachileik News Agency
ဓါတ်ပုံ - စည်သူမောင်